ក្បាលចាមស្នាមស្នេហ៍

ក្បាលចាមភូមិខ្ញុំសុំបកស្រាយ                     យកប៊ិចកកាយស្រាយរឿងចាស់

រឿងស្នេហ៍អតីតចិត្តស្រីផ្លាស់                     នឹកឡើងសែនខ្មាសម្ចាស់ព្រឹកព្រៃ ។

ក្បាលចាមដាមដិតដោយទុក្ខព្រួយ             នឹកឃើញគ្រាមួយព្រួយហរទ័យ

កាលបងសាសងក្រងសម្តី                            នៅក្រោមដើមជ្រៃសាក្សីស្នេហ៍ ។

ក្បាលចាមចិត្តចងចាំវាចារ                          កាលនោះជីវាថាពុំប្រែ

ពុំព្រមបែព្រាត់ចិត្តគេចកែ                           អ្វីមកបង្វែរបែមិនបាន ។

ក្បាលចាមរឿងចាស់ផ្លាស់រឿងថ្មី               ពាក្យពៅពិសីស្រីកល្យាណ

ម៉ុមភ្លេចគ្មានសល់ខ្វល់ពេញប្រាណ                       ក្តីប៉ងខកខានបានតែទុក្ខ ។

ក្បាលចាមស្នាមស្នេហ៍ក្បែរដើមស្វាយ      អូនកុហកម្តាយភូតទាំងពុក

រកល្បិចគេចចេញមកជួបមុខ                     សាងជាទំនុកទុកជាកេរ្ត៍ ។

ក្បាលចាមស្រីចប់សព្វប្រការ                      ភ្លេចអានុស្សាមិនចាំទេ

ព្រោះនាងវាងវៀកងាករកគេ                       ពាលពៅចិត្តរេព្រោះដុល្លា ។

ក្បាលចាមជួយចាំផ្តាំទៅស្រី                                    សូមឲ្យពិសីស្រីជីវា

កុំបីជួបទុក្ខមុខស្រស់ថ្លា                                រស់នៅហ៊ឺហាដរាបអើយ ។

និពន្ធដោយៈ តិក លីហ៊ាន