រាត្រីនឹកអូន

យប់យន់ត្រជាក់ធ្លាក់ជំនោរ

ចង្រិតស្រែកថ្ងូរសូររណ្តំ

សន្សើមថ្តើមធ្លាក់ភ្ងាក់ផ្កាខ្ទុំ

ផ្លែត្នោតទុំៗជ្រុះបន្ត ។

យប់យន់ស្ងប់ស្ងាត់បាត់សម្រស់              រុក្ខាលែងស្រស់អស់បវរ

ធម្មជាតិស្ងាត់ស្ងៀមត្រៀមលម្អ              អន្ធការកំដរពេលរាត្រី ។

សម្លឹងចន្រ្ទានាយប់យន់                         ភ្នែកប្រឹងគយគន់កើតអាល័យ

មើលឃើញដួងផ្កាយឆ្ងាយផែនដី   ប្រឹងផ្តល់រស្មីឲ្យលោកា ។

ពេលឃើញព្រះចន្ទកាន់តែខ្វល់              រឭកនឹកដល់ស្រ់ជីវា

នឹកមាសស្នេហ៍ស្និទ្ធចិត្តប្រាថ្នា                នឹកម្ចាស់នេត្រាស្នហាបង ។

ដួងចន្ទអ្នករះជះរស្មី                               ដូចស្រស់ចរណៃមាសស្នេហ៍ស្នង

បញ្ចេញមន្តស្នេហ៍ល្អកន្លង           ដួងចិត្តសៅហ្មងប៉ងចង់បាន ។

សម្រស់តូចតន់គន់មិនស្កប់          ពាលពៅសំណព្វស្រស់កល្យាណ

បងស្ម័គ្រដាក់ចិត្តលុះអវសាន្ត                 ទាំងចិត្តទាំងប្រាណបូជាស្នេហ៍ ។

ពេលព្រះចន្ទរះឈ្នះតារា                        ដែលផ្ញើអាត្មាលើមេឃដែរ

ដូចខ្លួនរៀមតូចគួចចង់ក្បែរ                   កើតទុក្ខឥតល្ហែដោយក្តីព្រួយ ។

យប់ជ្រៅបងនៅតែម្នាក់ឯង          ទ្រូងទ្រាំចំបែងចិត្តរលួយ

ខ្វាយខ្វល់គិតដល់តែអូនមួយ                  ចន្ទអើយសូមជួយប្រាប់ស្រីផង ។

ខ្យល់អើយសូមជួយប្រាប់ពុំងា               ប្រាប់ស្រីសោភាស្រស់នួនល្អង

ថាខ្ញុំរឭកនឹកកន្លង                                យប់ថ្ងៃគេងផ្សងចងចិត្តស្នេហ៍ ។

អង្គុយម្នាក់ឯងថ្លែងប្រាប់មេឃ                ដួងចិត្តសង្វេគខ្វល់ឥតល្ហែ

ព្រលឹមព្រលប់ក៏ខ្វល់ដែរ                        ខ្វល់ព្រោះខ្លាចស្នេហ៍បែឃ្លាតឆ្ងាយ ។

រៀមព្រួយខ្លាំងណាស់ម្ចាស់ជីវិត              ព្រោះស្នេហ៍ស្រីពិតណាឆោមឆាយ

ទ្រូងមួយព្រួយពុំមានរសាយ          សូមកែវកុំណាយណានឹមនួន ។

និពន្ធដោយៈ តិក លីហ៊ាន