ឃ្លាខ្មែរ

និពន្ធដោយ៖ កវី.អ៊ីវ ហួត(ដងប៉ាក់កាប្រាក់)

‑ឃ្លាខ្មែរឃ្លីងឃ្លោង ដូចដំណើរទូក            យោលតាមប្រយោគ បូកគុណអត្ថន័យ

លឿនដូចព្រួញទិព្វ ឬខ្សឹបហឫទ័យ          គយគន់ផ្កាភ្ញី ល្បើកក្បាច់អង្គរ។

‑រៀបពាក្យណែងណង ន័យនិងខ្លឹមសារ     ជាភួងបុប្ផា ចម្រុះពណ៌ល្អ

អត្ថន័យពាក់ព័​ន្ធ ឆ្លងឆ្លើយបន្ទរ                ណែងណងបញ្ឈរ គំនូរគំនិត។

‑ឃ្លាខ្មែរដង្ហែរ ដង្ហើមវប្បធម៌                     ក្បួនអាចារ្យធម៌ គម្ពីជីវិត

ព្រលឹងជាតិខ្មែរ ជ្រោមជ្រែងថ្លែងឫទ្ធិ          ទោះនៅឆ្ងាយជិត រួមឫទ្ធិជិតគ្នា។

‑ពាក្យពេជ្រពីរោះ ន័យនិងខ្លឹមសារ            ឆ្លាក់ចិត្តខេមរា សាមគ្គីសាមគ្គា

ជាតិខ្មែរជួបជុំ ផ្តុំកម្ពុជា                           ដួងកាយខេមរា អមតៈរៀងអើយ។

២១/០១/១៩៩២