ឃ្លាតទាំងអាល័យ(បទពាក្យប្រាំពីរ)

និពន្ធដោយ៖ អ្នកគ្រូ មិត្ត ផល្លា

១៥ តុលាសែនរន្ធត់

ក្នុងចិត្តតក់ស្លុតឥតឧបមា

ទទួលដំណឹងពេញរដ្ឋា

អង្គសម្តេចតាឃ្លាតចាកលោក។

ប្រជាប្រុសស្រីទុក្ខចំបែង

ស្រែកយំក្តែងៗសែនសោយសោក

អាណិតស្រលាញ់ដល់រូបលោក

មិនគួរឡើយមកអស់ជន្មា។

ស្តាយស្នាមញញឹមស្តាយស្នាដៃ

តាំងពីក្មេងវ័យខំបូជា

​​ប្រឹងប្រែងខ្នះខ្នែងខំពុះពារ

ដើម្បីប្រជាជាតិខេមរា។

ទោះបីនឿយហត់ក៏ឥតគិត

ប្តូរកាយជីវិតព្រោះស្នេហា

ស្រឡាញ់កូនចៅស្មើអាត្មា

លំបាកម្តេចម្តាមិនថយរា។

ឥឡូវឃ្លាតឆ្ងាយទាំងកាយចិត្ត

ក្តុកក្តួលអួលពិតសែនគ្រាំគ្រា

គ្មានថ្ងៃវិលវិញជួបភក្រ្តា

លើកហត្ថទ្វេហាបន្ទន់ប្រាណ។

សូមវិញ្ញាណខន្ធអង្គសម្តេច

ទ្រង់បានសម្រេចព្រះនិព្វាន

មានសេចក្តីសុខគ្រប់ជាន់ឋាន

ខ្ពង់ខ្ពស់ថ្កើងថ្កានគ្រប់ៗជាតិ។

កូនចៅនៅរស់នឹងប្តេជ្ញា

ស្តារជាតិខេមរាមិនឱ្យឃ្លាត

ខិតខំពុះពារមិនរវាត

ដើម្បីស្ទួយជាតិឆ្ពោះទៅមុខ។

និពន្ធដោយ៖ អ្នកគ្រូ មិត្ត ផល្លា