កំណាព្យ “ក ខ”

និពន្ធដោយ៖ លោក តិក លីហ៊ាន

ក កម្មអ្វីខ្ញុំម៉ុមបែកបែរ

ខ ខំខិតថែស្នេហ៍ឥតហ្មង

គ គិតគ្រប់គ្រាពុំងាបង

ឃ ឃ្លាតម្តងៗបងទុក្ខព្រួយ។

ង ងាកឆ្វេងស្ដាំចាំឈ្មោះពៅ

ច ចិត្តគិតទៅពន្លកត្រួយ

ឆ ឆោមឆើតឆាយកាយតែមួយ       ជ ជូនចាំជួយជំនួយស្នេហ៍។

ឈ ឈឺឮពាក្យពោលទ្រគោះ         ញ ញ័ររង្គោះព្រោះស្រីបែរ

ដ ដិតដាមដោយពាក្យស្បថស្បែ     ឋ ឋានភពស្នេហ៍ប្រែព្រាត់ឆ្ងាយ។

ឌ ឌុកដាក់ដេញពេញឱរា               ឍ ធ្វើម្តេចម្តាបានរសាយ

ណ ​ណែនាំផងណាឆោមឆាយ       ត តបរ៉ាប់រ៉ាយមកមាសបង។

ថ ថាមកម៉ុមកុំនៅស្ងៀម                ទ ទើបទ្រូងរៀមផុតសៅហ្មង

ធ ធុញថប់ថ្វីស្រស់ស្នេហ៍ស្នង         ន នួនស្តីសងផងណាស្រី។

ប បើរូបបងបានជាខុស                 ផ ផុងកំហុសណាមួយក្ដី

ព ពោលពាក្យពេចន៍មកចរណៃ      ភ ភ័ក្ដ្រពិសីកុំបីបែរ។

ម មើលឲ្យចំកុំខំគេច                     យ យល់ដូចម្ដេចទើបគេចកែ

រ រៀមរស់រងទុក្ខព្រោះស្នេហ៍           ល លង់ព្រោះតែសម្ដីអូន។

វ វេលាណាចិន្ដាផ្សង                     ស សូមនួនល្អងកុំស្រពោន

ហ ហ៊ានលះបង់មិនខ្លាចសូន្យ        ឡ អ ឡើយអូនម្ចាស់ជីវិត៕

តិក លីហ៊ាន