រឿងខ្លី “បេះដូងក្រោមពន្លឺព្រះចន្ទ”
នៅក្រោមពន្លឺព្រះចន្ទព្រាលៗ គេឃើញស្រ្តីវ័យប្រមាណជាម្ភៃឆ្នាំ កំពុងបីកូន ដើរចូលទៅក្នុងផ្ទះឈើបុរាណមួយ។ ប្តីប្រពន្ធមួយគូក៏ដើរចេញមកពីក្នុងផ្ទះ ដោយទឹកមុខរួសរាយរាក់ទាក់ ទៅរកស្រ្តីម្នាក់នោះ។ ពួកគេទាំងបីនាក់ពុំបានអង្គុយឡើយ គ្រាន់តែស្រ្តីបីកូនបន្លឺឡើង ពីរនាក់ប្តីប្រពន្ធផ្លាស់ប្តូរទឹកមុខមួយរំពេច។
-ចាត់ទុកថាឯងជួយខ្ញុំទៅណា ខ្ញុំសូមអង្វរ!
-ឯងមិនអាចធ្វើអ៊ីចឹងបានទេ ក្មេងនេះនៅតូចណាស់ ឯងមិនអាណិតវាទេអ្ហេ?
-ខ្ញុំមិនទៅចោលវារហូតឯណា ពីរឬបីឆ្នាំក្រោយ ខ្ញុំនឹងមកយកវាទៅរស់នៅជាមួយខ្ញុំ ខ្ញុំសូមអង្វរណា មានតែឯងទេ ដែលខ្ញុំអាចទុកចិត្តបាន
-ឯងនិយាយតាមត្រង់មក ហេតុអីក៏ឯងមិនអាចយកកូនទៅជាមួយបាន? ប្រុសនោះ ម៉េចនឹងអាចមិនដឹងថា ឯងកូនខ្ចីនោះ?
-ខុសមកពីខ្ញុំ គាត់ដឹងថា ខ្ញុំទើបតែសម្រាលកូនពិតមែន តែខ្ញុំកុហកគាត់ ថាកូនស្លាប់បាត់ទៅហើយ
-ម៉េចក៏ឯងធ្វើអ៊ីចឹង?
-ខ្ញុំខុសហើយ! ឯងជួយខ្ញុំផងទៅបានទេ? ឯងក៏ដឹង ថាខ្ញុំមិនអាចឲ្យក្មេងនេះ ទៅប៉ារបស់គេបានទេ
-ចុះបើប៉ារបស់គេមករកដល់ទីនេះ?
-ទោះយ៉ាងណា ក៏ឯងមិនត្រូវឲ្យកូននេះទៅគេឡើយ ជួយខ្ញុំផងទៅណា ខ្ញុំពិតជាមិនចង់វេទនាតទៅទៀតទេ ខ្ញុំសូមអង្វរ!
-អ៊ីចឹងឯងត្រូវតែសន្យានឹងខ្ញុំ ពេលដែលបានចូលសញ្ជាតិហើយ ត្រូវតែមកយកកូននេះត្រឡប់ទៅវិញ ស្តាប់បានទេ?
-អរគុណ! ខ្ញុំនឹងមកវាត្រឡប់ទៅវិញ អរគុណ
បន្ទាប់ពីប្រគល់កូនហើយ ស្រ្តីម្នាក់នោះក៏ចាកចេញទៅ។ ពីរនាក់ប្តីប្រពន្ធ សម្លឹងមើលទារិកាដោយទឹកមុខស្រទន់ ប្រកបដោយក្តីមេត្តា តែស្រាប់តែឮសំឡេងចេញពីក្នុងផ្ទះប្រាវ៖
-បង! កូនយើង?
-បងទៅមើល!
វគ្គ១ សេចក្តីស្រលាញ់
ប្រាំពីរឆ្នាំក្រោយមក
ក្រោមពន្លឺព្រះចន្ទដ៏ស្រទន់ ស្រ្តីជាប្រពន្ធបន្លឺទៅកាន់ស្វាមី៖
-ស្អែកនេះ ជាខួបគម្រប់អាយុប្រាំពីរឆ្នាំរបស់ចន្រ្ទាហើយ គិតទៅមួយប៉ប្រិចភ្នែកសោះ កូននេះធំយ៉ាងនេះទៅហើយ តែនៅមិនទាន់ដឹងថា ឪពុកម្តាយជានរណាឡើយ តែវាបែរជាហៅពួកយើងថា ប៉ាម៉ាក់ឡើងពេញមាត់
-គ្មានដំណឹងពីស៊ីណាទេអ្ហេ?
-គ្មានទេ! មិនដឹងថានាងជួបទុក្ខ ឬក៏សុខទេ ទើបបាត់ដំណឹងសូន្យឈឹងយ៉ាងនេះ ហ៊ឺ!………..
-អូនមិនអីទេអ្ហេ?
-ចុះបង?
-បងយ៉ាងម៉េច?
-បងមិនស្តាយក្រោយ ដែលយើងទទួលក្មេងនេះមកចិញ្ចឹមទេអ្ហេ?
-កាលពីដំបូង បងដូចជាមានអារម្មណ៍ទើសទាល់មែន តែពេលនេះ បងក៏មិនចង់បាត់បង់ក្មេងស្រីនេះដែរ ព្រោះពួកយើងបានស្រលាញ់នាងដូចជាកូនទៅហើយ តើពិតទេ?
-ពិតមែនហើយ!
-អ៊ីចឹង តើពួកយើងមានរឿងអីត្រូវបារម្ភទៀត? ចាប់ពីថ្ងៃនេះទៅ អ្វីដែលសំខាន់នោះ គឺផ្តល់ភាពកក់ក្តៅឲ្យនាង ត្រូវឲ្យនាងមានអារម្មណ៍ថា ជីវិតរស់នៅរបស់នាង គឺដូចជាបេះដូងដែលស្ថិតនៅក្រោមពន្លឺព្រះចន្ទអ៊ីចឹង
-ពិតមែនហើយ! តែមើលទៅកូនប្រុសរបស់យើង ដូចជាមិនចូលចិត្តនាងសោះ ចេះតែធ្វើបាបនាងរហូត
-កុំបារម្ភអី ពួកយើងត្រូវធ្វើឲ្យវា ស្រលាញ់ប្អូនឲ្យបាន
……………………………………………………………………………………………
តើភាពកក់ក្តៅបែបណា ដែលដូចជាបេះដូងនៅក្រោមពន្លឺព្រះចន្ទនោះ? អ្នកស្រីចរិយា និងលោកវិបុត្រ បានបេ្តជ្ញាសហការគ្នានឹងចិញ្ចឹមបីបាច់កូនចិញ្ចឹមម្នាក់នេះ ឲ្យដូចជាកូនបង្កើតរបស់ខ្លួន។ វិសិទ្ធិ មានអាយុដប់មួយឆ្នាំ រៀននៅថ្នាក់ទីប្រាំមួយគឺជាកូនប្រុសបង្កើតរបស់លោកទាំងពីរ ប៉ុន្តែក្មេងប្រុសម្នាក់នេះ ចូលចិត្តលេងច្រើន ហើយពុំសូវចូលចិត្តប្អូនឡើយ គេតែងតែធ្វើឲ្យចន្រ្ទាយំជារៀងរាល់ថ្ងៃ ដូចជាពេលនេះអ៊ីចឹង គេប្រើសំឡេងខ្លាំងៗបង្រៀនប្អូន៖
-ចាំស្តាប់សំនួរ តើប៉ាធ្វើការងារអី?
-ប៉ាធ្វើការនៅពន្ធដារ
-ចុះម៉ាក់?
-ម៉ាក់មេផ្ទះ
-ល្អ ឥឡូវបងសួរមេលេខម្តង បីប្រាំដងប៉ុន្មាន?
-បីម្តងបី បីពីរដងប្រាំមួយ បីបីដង………………..
-ថ្នាក់ទីពីរហើយ នៅមិនទាន់ចេះមេបីទៀត ម៉េចក៏ខួរក្បាលឯងល្ងង់ម្ល៉េះ បើតែអ៊ីចឹងធ្វើម៉េចរៀនឈ្នះគេ?
-បងកុំថាឲ្យអូនបានទេ?
-យ៉ាងម៉េច! យើងថាឲ្យមិនបានអ្ហេ? ខួរក្បាលឯងនេះ មិនសមជាប្អូនយើងសោះ យើងសង្ស័យថាឯង មិនមែនជាកូនប៉ាម៉ាក់ទេ ទើបល្ងង់យ៉ាងនេះ?
ឲ្យតែឮពាក្យនេះ ចន្រ្ទាតែងតែយំហ៊ូ៖
-យំទៀតហើយអ្ហេ! បើឯងរវល់តែយំអ៊ីចឹង យើងឈប់បង្រៀនហើយ ទៅបន្ទប់វិញប្រសើរជាង
-តើមានរឿងអីហ្នឹងកូន?……….ឯងធ្វើអីប្អូនទៀតហើយ?
-ខ្ញុំមិនបានវ៉ៃវាផងហ្នឹង? ខ្ញុំទៅធ្វើលំហាត់ហើយ
-បានហើយ! ឈប់យំទៅកូន ប្រាប់ម៉ាក់មកមើល តើបងធ្វើអីកូនមែនទេ?
-………..បងថាអូនល្ងង់ មិនមែនជាកូនម៉ាក់ប៉ាទេ………….
-បានហើយៗ!……..អ្នកណាថា កូនជាកូនប៉ាម៉ាក់តើ ……..មក! ឆាប់ធ្វើលំហាត់ទៅ ម៉ាក់បង្រៀន
បន្ទាប់ពីលួងកូនស្រីហើយ អ្នកស្រីចរិយាក៏ទៅបន្ទប់វិសិទ្ធិ៖
-កូនកំពុងធ្វើលំហាត់អ្ហេ?
-បាទ! ម៉ាក់មានការអីមែនទេ?
-តើឯងឈប់ស្តីឲ្យប្អូនទៅបានទេ?
-ខ្ញុំមែនបានស្តីឲ្យវា………………………ខ្ញុំមែនបានស្តីឲ្យអូនឯណា?
-បើមិនបានស្តីឲ្យប្អូន ហេតុអីក៏ប្អូនយំ?
-អ្នកណាឲ្យអូនល្ងង់យ៉ាងនោះ?
-តើមាននរណាចង់កើតមកល្ងង់នោះ? កូនគិតថា ប្អូនឯងចង់ល្ងង់ណាស់ទៅអ្ហេ? រាល់ថ្ងៃនេះ កូនមិនឃើញប្អូនខំរៀនទេអ្ហេ? ឬសប្បាយចិត្ត នៅពេលដែលធ្វើឲ្យប្អូនយំ?
-……….សូមទោសម៉ាក់!
-ម៉ាក់សង្ឃឹមថា កូននឹងស្រលាញ់ប្អូន តោះ! ពួកយើងទៅញ៉ាំបាយទៅ
នៅពេលដែលម្តាយនិយាយ វិសិទ្ធិហាក់ដូចជាយល់ និងស្តាប់បង្គាប់ណាស់ ប៉ុន្តែចរិតជាក្មេងនៅតែជាក្មេងដដែល។ គេតែងតែឮសំឡេងចន្រ្ទាស្រែកយំឡើង នៅពេលដែលបងប្រុសបង្រៀនស្ទើរស៊ាំត្រចៀកទៅហើយ។ ចំណែកអ្នកស្រីចរិយា និង
លោកវិបុត្រក៏មិនដឹងដោះស្រាយតាមវិធីណាដែរ។
ជាធម្មតា វិសិទ្ធិជិះកង់ឌុបចន្រ្ទាទៅរៀន តែល្ងាចនេះ បន្ទាប់ពីចេញពីរៀនហើយ បែរជាមិនឃើញវិសិទ្ធិទាល់តែសោះ។ ក្មេងស្រីតូច ឈរចាំបង នៅក្លោងទ្វារសាលាកន្លះម៉ោងទៅហើយ មេឃក៏បង្អុរភ្លៀងឈូ នាងបម្រុងស្ទុះរត់រកកន្លែងជ្រក ស្រាប់តែនឹកឃើញសំដីបងប្រុស ដែលមករកនាងមិនឃើញនៅថ្ងៃមុន៖
-បងថាឲ្យឯងមកចាំបងមុខក្លោងទ្វារ តើឯងរវល់តែទៅណា?
-អូនចាំបងយូរពេក ទើបអូនទៅអង្គុយសិនទៅ
-ថ្ងៃក្រោយមិនឲ្យអង្គុយទេ ត្រូវចាំបងនៅទីនេះរហូត បើបងមកមិនឃើញឯង ទេ បងនឹងទៅចោលឯងហើយ
-ចាស!
ឱ!ក្មេងតូចដ៏ឆោតល្ងង់ នាងពិតជាមិនហ៊ានទៅណាមែន ក្រោមដំណក់ភ្លៀង ខ្ពោកៗ នាងបែរជាឈរឱបកាតាបដោយរងាញ័រញាក់។ ពុទ្ធោអើយ! ក្មេងប្រុសម្នាក់នេះ រវល់លេងបាច់ឃ្លីទេតើ! គេទើបតែនឹកឃើញដល់ប្អូន ក៏ស្ទុះទាញកង់ចេញមក។ តើអាល្អិតនេះ មានចិត្តអាណិតប្អូនដែរទេ? មើលគេចុះ ហេតុអីក៏ប្រើសំឡេងខ្លាំងៗ ម៉្លេះ៖
-ឯងឆ្កួតទេអ្ហេ! ហេតុអីក៏មកឈរហាលភ្លៀងអ៊ីចឹង?
-បងនិយាយថា ឲ្យអូនឈរចាំបង មិនឲ្យទៅណានោះ
-ហេតុអីក៏យើងមានប្អូនស្រីម្នាក់ល្ងង់ដូចជាឯងយ៉ាងនេះ?………ពាក់អាវភ្លៀង ទៅ………ឆាប់ឡើងកង់មក!
នៅក្រោមដំណក់ភ្លៀងតិចៗ ធ្វើឲ្យក្មេងតូចត្រជាក់ណាស់ នាងលូកដៃទៅឱបចង្កេះបង តែក៏ត្រូវដកចេញយ៉ាងលឿន៖
-បងប្រាប់ហើយថាមិនឲ្យឱបចង្កេះបងទេ ព្រោះរសើប
តើនេះជានិស្ស័យកម្មមែនទេ? ហេតុអីក៏ក្មេងប្រុសម្នាក់នេះគ្មានមនោសញ្ចេត-នាសូម្បីតែបន្តិច ជាមួយក្មេងស្រីនេះ? ឃើញមេឃភ្លៀងដូចនេះ អ្នកស្រីចរិយា និងស្វាមីពិតជាបារម្ភណាស់ចំពោះកូន។ លោកទាំងពីរឈរចាំកូននៅមុខក្លោងទ្វារផ្ទះ គ្រាន់តែក្រលេកឃើញកង់ជិះចូលមក លោកក៏បាំងឆ័ត្រចេញមកទទួលកូន តែមិនទាន់ចេញមកដល់ផង ចន្រ្ទាក៏សន្លប់ធ្លាក់ពីកង់ចុះមក។ ពិតជាគួរឲ្យភ័យណាស់ ហើយក៏គួរឲ្យខឹងណាស់ដែរ ម្តងនេះអ្នកស្រីចរិយាទ្រាំនឹងកូនប្រុសមិនបានឡើយ។ បន្ទាប់ពីមើលថែកូនស្រីហើយ អ្នកស្រីក៏ដើរចូលទៅបន្ទប់វិសិទ្ធិ និយាយសំឡេង ខ្លាំងៗ៖
-ឯងនិយាយទៅ ហេតុអីក៏ប្អូនទទឹកខ្លួនជោកយ៉ាងនេះ?
-………………………..គឺ………………………….
-គឺស្អី?……….ឬឯងរវល់លេង ទុកប្អូនចោលហាលភ្លៀង
-សូមទោសម៉ាក់!
-សូមទោសអ្ហេ!…………………ឯងនេះ! ហេតុអីក៏មិនចេះស្រលាញ់ប្អូនយ៉ាងនេះ
-អូយម៉ាក់ឈឺ
-ឯងចេះឈឺដែរអ្ហេ! ចុះកាលដែលឯងទុកប្អូនចោលនោះ ឯងគិតថាប្អូនឯងស្រួលខ្លួនអ៊ីចឹងអ្ហេ?
-ម៉ាក់! ខ្ញុំសូមទោស…………….
វិសិទ្ធិត្រូវម្តាយវាយឡើងកន្តួលពេញខ្លួន។ លោកវិបុត្រកំពុងលាបថ្នាំឲ្យកូនប្រុស ហើយស្រដីដោយសំដីទន់ភ្លន់៖
-កូនដឹងថា ហេតុអីទើបម៉ាក់កូនវាយកូនទេ?
-គឺកូនខុស ដែលមិនបានមើលថែប្អូន ធ្វើឲ្យប្អូនធ្លាក់ខ្លួនឈឺយ៉ាងនេះ
-ចុះកូនខឹងនឹងម៉ាក់ទេ?
-អត់ទេ! កូនឈប់ធ្វើបែបនេះទៀតហើយ………….ម៉ាក់!
-កុំភ័យអី! ម៉ាក់មិនវាយកូនទៀតទេ អូនមានការអីមែនទេ?
អ្នកស្រីចរិយាអង្គុយចុះ ហើយដកដង្ហើមធំ ទើបនិយាយ៖
-ម៉ាក់ដឹងថា ទោះម៉ាក់ណែនាំឯងយ៉ាងណា ក៏ឯងនៅតែមិនស្រលាញ់ប្អូនដែរ ម៉ាក់ប្រាប់ការពិតដល់ឯងក៏បាន
-អូនចង់និយាយអី?
-យើងគួរតែឲ្យគេដឹង ដូចកូនធ្លាប់និយាយអ៊ីចឹង ចន្ទ្រាមិនមែនជាប្អូនឯង នាងមិនមែនកូនបង្កើតរបស់ប៉ាម៉ាក់ទេ នាងគ្មានឪពុកម្តាយ ម៉ាក់និងប៉ាឯង គឺចង់មើលថែនាងឲ្យដូចជាកូនបង្កើត ព្រោះតែអាណិតនាង មិនចង់ឲ្យនាងក្លាយជាកូនកំព្រា តែបើឯងមិនស្រលាញ់នាងហើយ ម៉ាក់នឹងយកនាងទៅដាក់នៅមណ្ឌលកុមារកំព្រាវិញ ព្រោះនាងនឹងអាចបានសុខជាងនៅទីនេះ ម៉ាក់មិនចង់ឃើញកូនរបស់ម៉ាក់ មានចិត្តឃោរឃៅ ធ្វើបាបក្មេងស្រីម្នាក់នេះទេ ចាំពេល នាងជាសះស្បើយហើយ ម៉ាក់មិនឲ្យនាងនៅទីនេះទៀតទេ
-កុំអីម៉ាក់! …………សូមទោស! ខ្ញុំមិនចង់ឲ្យអូនទៅនៅមណ្ឌលកុមារកំព្រាទេ
-តែម៉ាក់មិនចង់ឃើញកូនធ្វើបាបនាងទេ
-ខ្ញុំសន្យា! ខ្ញុំឈប់ធ្វើបាបអូនហើយ ហើយក៏ឈប់ជេរអូនទៀតដែរ ខ្ញុំនឹងស្រលាញ់អូន ម៉ាក់កុំយកអូនទៅអីណា
-ក្រែងកូនមិនចូលចិត្តប្អូនទេអ្ហេ?
-អូនល្ងង់មែន តែខ្ញុំនឹងជួយបង្រៀនអូន ឲ្យអូនឆ្លាតដូចជាខ្ញុំអ៊ីចឹង ម៉ាក់កុំយកអូនទៅណា ស្រណោះអូន ឥឡូវខ្ញុំទៅមើលអូនហើយ ខ្ញុំនឹងធ្វើជាបងប្រុសល្អរបស់អូន មិនធ្វើឲ្យអូនយំទៀតទេ
និយាយចប់ ក្មេងប្រុសតូចក៏រត់វឹង ទៅបន្ទប់ចន្រ្ទា។ ឃើញកូនមានអាការបែបនេះ
លោកទាំងពីរហាក់ដូចជាសប្បាយចិត្តបន្តិច ប៉ុន្តែមិនដឹងថា អាល្អិតកូនប្រុសរបស់ខ្លួនអាចធ្វើបានប៉ុណ្ណានោះទេ។ លោកវិបុត្រស្រដី៖
-ហេតុអីក៏អូននឹកឃើញវិធីនេះ?
-អូននិយាយមែនណា
-អូននិយាយមែន!
-បងស្មានថាខ្ញុំនិយាយលេងអ្ហេ? បើកូនប្រុសបងនៅតែធ្វើបាបនាងយ៉ាងនេះ តើកូនស្រីនេះ អាចទ្រាំទ្ររួចទេ? ការពិតវាក៏ស្រលាញ់ប្អូនដែរតើ ចាំមើលមើល តើគេមើលថែប្អូនគេយ៉ាងម៉េច?
-អ៊ីចឹងពួកយើងទៅមើលគេទៅ
លោកទាំងពីរឈរសម្លឹងមើលកូន ដែលកំពុងលុតជង្គង់នៅពីមុខគ្រែនាងតូចចន្រ្ទា។ បើកភ្នែកឡើង ចន្រ្ទាឃើញបងប្រុសលុតជង្គង់ ក៏ស្រដីទាំងងឿងឆ្ងល់៖
-តើបងធ្វើអីហ្នឹង?
-បងសូមទោស ដែលធ្វើឲ្យអូនឈឺយ៉ាងនេះ
-បងមិនបានធ្វើអីអូនឯណា អូនឈឺខ្លួនឯងតើ
-ឯងនេះ ពិតជា………………..
-បងថា អូនល្ងង់ទៀតហើយអ្ហេ?
-អត់ទេ! អូនឆ្លាត ចាប់ពីថ្ងៃនេះទៅ បងឈប់ថាអូនល្ងង់ទៀតហើយ
-ហេតុអី?
-ព្រោះអូនជាប្អូនបងហ្នឹងណា អូនគេងទៅ យប់នេះ បងគេងជាមួយផងបានទេ?
-ពីមុនបងមិនចូលចិត្តគេងក្បែរអូនទេ
-តែពេលនេះបងចង់គេងក្បែរអូន ឬអូនមិនចង់គេងក្បែរបង?
-ចង់ អូនចង់! ………..បងគេងត្រង់នេះមក
-……………….ត្រូវហើយ! ថ្ងៃក្រោយ បើចាំបងយូរ ពេលភ្លៀង អូនត្រូវរត់ទៅជ្រកភ្លៀង ពេលក្តៅអូនត្រូវរត់ទៅរកម្លប់ ស្តាប់បានទេ?
-ហេតុអី?
-ចំជា…………..
-អូនល្ងង់ទៀតហើយ……..
-មិនមែនទេ! អូនគ្រាន់តែឆោតបន្តិចតើ បើអូនឈរហាលភ្លៀង ឬក៏ហាលក្តៅនោះ គឺដូចជាពេលនេះអ៊ីចឹង អូនប្រាកដជាឈឺ
-អូនយល់ហើយ!
ទាំងពីរនាក់បងប្អូនជជែកគ្នា រហូតលង់លក់រៀងខ្លួន។
ចាប់តាំងពីថ្ងៃនោះមក វិសិទ្ធិមិនដែលយឺតពេលទៅទទួលប្អូនឡើយ ហើយក៏
មិនដែល លេងឃ្លីជ្រុលម៉ោងដែរ។ គ្រាន់តែឡើងដល់លើកង់ កុមារតូចបន្លឺ៖
-ឱបចង្កេះបងមក!
-ក្រែងបងរសើបអ្ហេ?
-បងលែងរសើបហើយ
-អូនឱបហើយណា!
-អ៊ឺ!
ទាំងពីរនាក់បងប្អូនឌុបគ្នាយ៉ាងសប្បាយរីករាយ រហូតមកដល់ផ្ទះ។ បន្ទាប់ពីស្រស់ស្រូបអាហារពេលល្ងាចរួចហើយ វិសិទ្ធិក៏ឡើងទៅបង្រៀនប្អូន៖
-ថ្ងៃនេះ បងសួរមេលេខអូន ចាំឆ្លើយណា……..ពីរប្រាំដង?
-ដប់
សួរមេពីរដល់មេបី ចន្រ្ទាឆ្លើយរួចយ៉ាងរហ័ស តែមកដល់មេបួន នាងត្រូវគិត ហើយសូត្រពីដើមឡើងវិញ តែម្តងនេះ វិសិទ្ធិមិនគំហោកនាងដូចពីពេលមុនឡើយ ក្មេងប្រុសតូច បែរជាអង្គុយញញឹមស្ងៀមចាំស្តាប់ចម្លើយ។ បន្ទាប់ពីបានចម្លើយហើយ វិសិទ្ធិក៏បន្លឺ៖
-ត្រូវរៀនមេបួនម្តងទៀត ហ៏ហ្វឺត! សរសេរតាមអាន
-បងឲ្យអូនសរសេរ ហេតុអីក៏បងគេង?
-បងគេងមើលអូនសរសេរហ្នឹងណា ចាប់ផ្តើមសរសេរ…….កាលពីព្រឹកមិញ
ការពិតក្មេងប្រុសតូចម្នាក់នេះ ពិតជាធ្វើបានមែន។ បេះដូងក្មេងតូចចន្រ្ទាពេលនេះ គឺកំពុងស្ថិតនៅក្រោមពន្លឺព្រះចន្ទ ពោរពេញទៅដោយភាពកក់ក្តៅ។ នាងបានទទួលសេចក្តីស្រលាញ់ យ៉ាងពិតប្រាកដពីប៉ាម៉ាក់ និងបងប្រុសរបស់ខ្លួន។ គេមិនបានឮសំឡេងយំរបស់នាងទៀតឡើយ ផ្ទុយទៅវិញ សំឡេងសើចរបស់នាងបែរជាលាន់ឮឡើងមិនចេះធុញទ្រាន់ទាល់តែសោះ។
ប្រាំឆ្នាំកន្លងផុតទៅ
ក្មេងស្រីជំទង់ កំពុងឈររង់ចាំបងប្រុសរបស់ខ្លួននៅមុខក្លោងទ្វារសាលា ទន្ទឹមនឹងក្មេងប្រុសជំទង់ម្នាក់ទៀត ដែលមិនទាន់ស្គាល់ថាជានរណា ប៉ុន្តែពួកគេទាំងពី ហាក់កំពុងតែជជែកគ្នា។ គ្រាន់តែក្រលេកឃើញបងប្រុសភ្លាម យុវតីក៏ស្ទុះទៅឡើង ម៉ូតូពីក្រោយ ឱបចង្កេះជាប់៖
-តើនរណាគេឈរជិតឯងនោះ?
-អូ! គាត់ជាបងមិត្តភក្តិអូន រៀននៅថ្នាក់ទីដប់
-រៀននៅថ្នាក់ទីដប់ ហេតុអីក៏មករកឯងដែលរៀនថ្នាក់ទីប្រាំបី?
-គាត់មិនបានរកអូនទេ ចៃដន្យតើ
-តែបងឃើញពីបីថ្ងៃហើយ
-ពិតមែនហើយ
-ឯងនេះ ចំជាល្ងង់មែន!
-បងថាឲ្យអូនល្ងង់ទៀតហើយ
ចន្រ្ទាហាក់ដូចជាខឹងណាស់។ ទៅដល់ផ្ទះ នាងចុះពីលើម៉ូតូ ហើយក៏ដើរចូលទៅក្នុងបន្ទប់ទាំងកំបុតកំបុយ។ អ្នកស្រីចរិយាបន្លឺ៖
-មានរឿងអីអ្ហេកូន?
-បងថាឲ្យអូនល្ងង់ទៀតហើយ!
ស្តីហើយ យុវតីក៏ចូលទៅក្នុងបន្ទប់បាត់។ អ្នកស្រីចរិយាបន្ត៖
-ហេតុអីក៏ថា ឲ្យប្អូនទៀតហើយ?
-សូមទោសម៉ាក់ ខ្ញុំជ្រុលមាត់ ចាំខ្ញុំទៅសូមទោសនាង
-កូននេះ!
បន្ទាប់ពីងូតទឹករួចរាល់ហើយ វិសិទ្ធិក៏ទៅគោះទ្វារយុវតី៖
-គឺបងណា! បងអាចចូលបានទេ?
-មិនឲ្យចូលទេ!
-មិនឲ្យចូលក៏ចូលដែរ ម៉េចក៏គេងទាំងក្បាលល្ងាចអ៊ីចឹង មិនទាន់ញ៉ាំបាយផងហ្នឹង ……..អ្នកណាហ៊ានធ្វើឲ្យប្អូនស្រីបង ខឹងយ៉ាងនេះ? ប្រាប់បងមក បងនឹងទៅវាយវាឲ្យណាណីម្តង……………..ខ្ញុំខ្លាចហើយៗ សូមទោសដែលធ្វើឲ្យអូនតូចខឹង សូមអភ័យទោសឲ្យខ្ញុំផង
យុវជនកំលោះ លលេងជាមួយយុវតីរហូតធ្វើឲ្យនាងសើចចេញមក៖
-ឈប់ខឹងហើយអ្ហេ?
-អូនមិននិយាយជាមួយបងទេ! ទៅញ៉ាំបាយហើយ
ឆាប់ខឹង តែក៏ងាយស្រួលលួងដែរ។ បន្ទាប់ពីស្រស់ស្រូបអាហារហើយ វិសិទ្ធិក៏ទៅគោះទ្វារចន្រ្ទាម្តងទៀត៖
-ក្រែងថា យប់នេះ បងមិនបង្រៀនអូនទេអ្ហេ?
-បងចង់និយាយជាមួយឯង!…………..យប់នេះ ដូចជាចង់គេងក្នុងបន្ទប់នេះ ដល់ហើយ!
-មិនឲ្យគេងទេ!
-ម៉េចក៏ចិត្តអាក្រក់ម្ល៉េះ ក្រែងពីមុនអ្នកណាតែងតែហៅបងឲ្យមកគេងក្បែរនោះ?
-ពីមុនមកពីអូននៅតូច តែពេលនេះ អូនធំហើយ
-ធំហើយ! ឲ្យបងមើលបន្តិចមើល ឯងធំត្រង់ណាខ្លះ?
-បងនេះ!
-មើលទៅឯងធំពិតមែនហើយ ចេះអៀនហើយតើ
-បងមានរឿងអីចង់និយាយជាមួយអូនអ្ហេ?
-ត្រូវហើយ! គឺរឿងបងប្រុសមិត្តភក្តិឯងហ្នឹង
-យ៉ាងម៉េច?
-កុំឈរក្បែរគេពេក ឯងធំហើយ ហើយជាស្រីទៀត នៅក្បែរមនុស្សប្រុសពេកគេមើលមកមិនល្អទេ?
-តែគាត់ចេះតែមកឈរជិតខ្ញុំ
-ដើរចេញពីគេ ឬក៏ប្រាប់គេតាមសម្រួលទៅ
-តែមើលទៅស្អែក ប្រហែលជាមិនចៃដន្យទៀតទេ
-ប្រហែលជាចៃដន្យរាល់តែថ្ងៃហ្នឹងឯង បានហើយ! ឯងឆាប់គេងទៅ បងទៅបន្ទប់ហើយ
-ឈប់សិន! បងថា មនុស្សស្រីមិនឲ្យក្បែរមនុស្សប្រុសពេកទេ ចុះបងនោះ?
-ឯងនេះពិតជា……………….ឆោតមែន! បងជាបងប្រុសឯង មិនមែនអ្នកដទៃឯណា
-ពិតមែនហើយ!
-រាត្រីសួស្តី!
-សុបិន្តល្អបង
ជាធម្មតា បងប្រុសតែងតែការពារប្អូនបែបនេះហើយ។ ចន្រ្ទាបានព្យាយាមធ្វើតាមសំដីបងប្រុសខ្លួន ប៉ុន្តែល្ងាចនេះ យុវជនហតុអីក៏យឺតខ្លាំងម្ល៉េះ? វាសនាជាបងប្រុសណាវី ដែលជាមិត្តរួមថ្នាក់របស់នាង។ ការពិតយុវជន ក៏ឌុបប្អូនទៅរៀនដូចគ្នា ដោយឃើញយុវតីឈរចាំយូរយ៉ាងនេះ នាយក៏បន្លឺឡើង៖
-ចន្រ្ទាមកជាមួយពួកបងមក
-ត្រូវហើយ! ឯងជិះជាមួយខ្ញុំមក ខ្ញុំជូនឯងទៅផ្ទះ
-មិនអីទេ! អរគុណ បន្តិចទៀតបងខ្ញុំមកហើយ
-តែល្ងាចហើយណា! ចុះបងឯងមានតេមកទេ?
-គាត់ប្រាប់ថា មួយសន្ទុះទៀតគាត់មកដល់ហើយ ឯងទៅមុនចុះ
-អ៊ីចឹង គ្នាទៅហើយណា
-បងទៅមុនហើយណា!
-ចាស!
តើយុវជនកំលោះរវល់ធ្វើអីទៀតហើយ? មិនមែនរវល់លេងបាច់ឃ្លីរហូតដល់ភ្លេចប្អូនទៀតទេអ្ហេ? មេឃបង្អុរភ្លៀងហើយ តើម្តងនេះ ក្មេងស្រីនេះ ឈរចាំបងហាលភ្លៀងទៀតទេ? ប្រហែលមិនដូចមុនទេ យុវជនមកដល់មុខក្លោងទ្វារសាលា ដោយកាយវិការតក់ក្រហល់ស្វែងរកប្អូន ស្រាប់តែសំឡេងបន្លឺឡើង៖”បង!”។យុវជនក្រលេកឃើញចន្រ្ទាកំពុងឈរនៅក្នុងរោងយាមសាលា នាយអរណាស់ ក៏បណ្តើរម៉ូតូចូលទៅ
ទើបស្រដី៖
-បងស្មានថា……………..
-អូនឈរហាលភ្លៀងចាំបងអ៊ីចឹងអ្ហេ?
-ត្រូវហើយ!
-អូនមិនល្ងង់ទេ!
-ត្រូវហើយ! ឯងឆ្លាតហើយ
-ចុះបង ហេតុអីក៏ទទឹកអស់អ៊ីចឹង?
-បងមិនអីទេ! សូមទោសណា ដែលឲ្យឯងចាំបងយូរយ៉ាងនេះ
-មិនអីទេ! ចុះមិត្តភក្តិបងយ៉ាងម៉េចហើយ?
-ផុតពីគ្រោះថ្នាក់ហើយ ពេលនេះកំពុងនៅមន្ទីរពេទ្យនៅឡើយ
-ឡានបុក ឬក៏ម៉ូតូ?
-ម៉ូតូដូចគ្នាហ្នឹង បានហើយ! ឆាប់ពាក់អាវភ្លៀងទៅ ប៉ាម៉ាក់ប្រហែលជាមើលផ្លូវពួកយើងស្លាប់ហើយ………បងជួយពាក់……….ដាក់ដៃមក……រួចរាល់ហើយ តោះពួកយើងទៅ
-ចុះបង?
-បងមិនអីទេ
-បងត្រូវតែពាក់ បើបងមិនពាក់អូនមិនទៅទេ
-សូមខ្លាចឯងហើយ! បងភ្លេចអាវភ្លៀងនៅផ្ទះឯណោះ
-អ៊ីចឹងបងពាក់របស់អូនទៅ
-អូនធ្វើអីហ្នឹង?
-អូនដោះឲ្យបងពាក់
-ឯងចង់ឲ្យម៉ាក់វាយបងទៀតអ្ហេ?
-អ្នកណាថា? បងពាក់ទៅ អូនទទូរពីក្រោយ ធ្វើអ៊ីចឹង ពួកយើងអត់ទទឹកទាំងពីរនាក់ មែនទេ?
-មែនហើយ!
-បងល្ងង់ណាស់
-ត្រូវហើយបងល្ងង់! ឯងឆ្លាតណាស់ ……តោះ!
យុវជនពាក់អាវភ្លៀងហើយ ក៏ទាញអាវភ្លៀងទៅគ្របលើប្អូន ឡើងម៉ូតូបើកចេញទៅ។ ចន្រ្ទាឱបចង្កេះបងយ៉ាងជាប់នៅក្នុងអាវភ្លៀង។ ពិតជាកក់ក្តៅណាស់ បេះដូងប្រៀបដូចជានៅក្រោមពន្លឺព្រះចន្ទអ៊ីចឹង។ ឪពុកម្តាយពិតជាសប្បាយចិត្តណាស់ នៅពេលឃើញកូនចេះស្រលាញ់គ្នា ចេះចែករំលែកគ្នាយ៉ាងនេះ។
ពេលវេលា ចេះតែដើរទៅមុខ ថ្ងៃប្រឡងសញ្ញាបត្រទុតិយភូមិក៏ជិតមកដល់។ ថ្វីត្បិតតែមមាញឹកក្នុងការសិក្សាបន្តិចមែន តែវិសិទ្ធិមិនដែលភ្លេចបង្រៀនប្អូនឡើយ។ ម្តងនេះ មើលទៅនាយ ដូចជាហត់នឿយមែនហើយ បង្រៀនប្អូន រហូតគេងលក់ខ្លួនឯងនៅលើគ្រែចន្រ្ទា។ ឃើញបងប្រុសមានការហត់នឿយដូចនេះ នាងអាណិត យុវជនណាស់។ យុវតីដណ្តប់ភួយឲ្យបង ចំណែកខ្លួនក៏អង្គុយរៀនបន្តទៅទៀត។ ជិតពាក់កណ្តាលអាធ្រាត្រទើបនាងងើបមករកកន្លែងដេក។ ក្រលេកឃើញបងគេងលក់ស្កប់ស្កល់យ៉ាងនេះ នាងក៏ដើរលបៗ ហើយក៏ដាក់ខ្នងគេងក្បែរយុវជន។ ទាំងពីរនាក់បងប្អូនក៏លង់លក់ទៅ។
មាន់រងាវម៉ោងប្រាំហើយ យុវជនបើកភ្នែកឡើង គិតមួយសន្ទុះក៏ស្ទុះងើបឡើង យកដៃគោះក្បាលតិចៗ មិនអស់ចិត្តនឹងខ្លួនឯង៖”ម៉េចក៏គេងលក់មិនដឹងខ្លួនយ៉ាងនេះ? សូមទោស! បងមិនគួរគេងលក់យ៉ាងនេះទេ”។ យុវជនសម្លឹងទៅប្អូនដែលកំពុងគេងលក់ ពិតជាគួរឲ្យស្រលាញ់ណាស់ នាយក៏ស្ទុះចូលទៅជិតនាង ហើយថើបនាងមួយខ្សឺត ទើបបន្លឺឡើយ៖
-ងើបឡើងភ្លឺហើយ
-តែអូនទើបតែគេងអម្បាញ់មិញហ្នឹង?
-ម៉ោងប្រាំហើយ! បើអូនមិនងើបទេ បងចូលបន្ទប់ទឹកមុនហើយណា
-ថ្ងៃនេះ អូនឲ្យបងចូលមុន បងចូលមុនអូនទៅ អូនចង់គេងបន្តិចទៀត បងកុំភ្លេចមកដាស់អូនផងណា
-អ៊ីចឹងក៏បាន!
យុវជនងើបរូតរះរៀបចំខ្លួនយ៉ាងស្អាត ក៏ចូលមកបន្ទប់យុវតីម្តងទៀត៖
-ងើបឡើង! ម៉ោងប្រាំពីរហើយ
-ម៉ោងប្រាំពីរហើយអ្ហេ! ម៉េចក៏ទើបតែដាស់អូនអ៊ីចឹង?
-តាមសម្រួលទៅ បងនិយាយលេងតើ
-ម៉ោងមិនទាន់ប្រាំមួយផង បងនេះ!
វិសិទ្ធិឈរញញឹមទៅកាន់ប្អូន។ បន្ទាប់ពីស្រស់ស្រូបអាហារពេលព្រឹកហើយ ទាំងពីរនាក់ក៏ឡើងម៉ូតូចេញទៅ។ ថ្ងៃនេះចេញពីរៀនគួ ចន្រ្ទាក៏ទៅបណ្ណាគារទិញសៀវភៅជាមួយមិត្តភក្តិ។ វិសិទ្ធិបន្លឺ៖
-អូននៅឯណា?
-អូននៅបណ្ណាគារក្នុងផ្សារឡាក់គី បងមកដល់ហើយអ្ហេ ចាំអូនបន្តិចណា
-មិនអីទេ ចាំបងទៅយកអូននៅទីនោះ
និយាយហើយ យុវជនក៏បើកម៉ូតូចេញទៅ។ ទៅដល់យុវតីឈរចាំជាស្រេច៖
-ទិញសៀវភៅបានហើយអ្ហេ?
-ចាស!
-ចង់ទៅដើរលេងទេអ្ហេ?
-តែបងជិតប្រឡងហើយ
-ជិតប្រឡង វាយ៉ាងម៉េច? ថ្ងៃនេះបងឌុបអូនដើរលេងចុះ
វិសិទ្ធិឌុបប្អូន ទៅលេងប្រាសាទអង្គរ។ ពួកគេទាំងពីរអង្គុយញ៉ាំអាហារនៅកសិណទឹកខាងជើង ស្រាប់តែមានយុវជនបួនប្រាំនាក់ដើរចូលទៅ៖
-វិសិទ្ធិ!
-ឧត្តម!……………ពួកឯងមកដើរលេងដែរអ្ហេ?
-យ៉ាងម៉េច! ជិតប្រឡងហើយ នៅមានអារម្មណ៍ដើរជាមួយ………
-នាងជាប្អូនគ្នាទេ!
-ពិតមែនអ្ហេ!…………សូមទោស……….សួស្តីនាងតូច!
-ចាសបង!
-ពួកគេជាមិត្តភក្តិបង
-មិនរំខានឯងទេ ពួកយើងទៅមុនហើយ ………….គ្នាសួរឯង នាងជាប្អូនដែលឯងឌុបទាំងព្រឹកទាំងល្ងាចនោះអ្ហេ?
-ត្រូវហើយ!
-មើលទៅឯងស្រលាញ់ប្អូនណាស់ សូម្បីមកដើរលេងក៏យកនាងមកដែរ
-បើឯងច្រណែន ឯងឌុបប្អូនឯងមកដែរមក
-បានហើយ! យើងទៅហើយ…………ចន្រ្ទា! បងទៅមុនហើយ
-ចាសបង!
-មើលទៅអាល្អិតនេះ ពិតជាស្រលាញ់ប្អូនវាមែនវ៉ី
-ពួកគាត់ស្មានថា អូនជាសង្សារបងមែនទេ?
-មែនហើយ! …………..ម៉េចក៏ធ្វើមុខអ៊ីចឹង?
-រាល់ថ្ងៃនេះ បងប្រហែលជាមិនចង់ឌុបអូនទេមែនទេ?
-ម៉េចក៏អូននិយាយអ៊ីចឹង?
-ព្រោះគេគ្រប់គ្នាប្រហែលជាគិតដូចជាពួកគាត់អ៊ីចឹង ថាអូនជាសង្សារបង អូនប្រហែលជាធ្វើឲ្យស្រីៗមិនហ៊ានស្រលាញ់បងទេ មែនទេ?
-បើអូនគិតអ៊ីចឹង អូនល្មមដឹងខ្លួនហើយ?…………បងនិយាយលេងទេ អូនចេះគិតបែបនេះតាំងពីពេលណាមក? ញ៉ាំទៅ!
បន្ទាប់ពីញ៉ាំអាហាររួចហើយ ទាំងពីរនាក់បងប្អូនក៏ឡើងម៉ូតូត្រឡប់មកផ្ទះវិញ។ ម្តងនេះ ចន្រ្ទាលែងឱបចង្កេះបងប្រុសទៀតហើយ។ វិសិទ្ធិស្រដី៖
-មិនឱបចង្កេះបង ប្រយ័ត្នធ្លាក់ណា…………យ៉ាងម៉េចក៏មិននិយាយអ៊ីចឹង?
-អូនខ្លាចគេថា អូនជាសង្សារបង?
-មិនមែនខ្លាចគេថា បងជាសង្សារអូនទេអ្ហេ? ឬមួយក៏ខ្លាច បងប្រុសរៀនថ្នាក់ទីដប់នោះឃើញ?
-បងនិយាយអី?
-និយាយលេងតើ!
យុវជន និងយុវតីត្រឡប់មកផ្ទះវិញដោយសប្បាយរីករាយ។ ល្ងាចនេះ គ្រួសារទាំងមូលជួបជុំពិភាក្សាគ្នា ព្រោះតែស្អែកនេះ វិសិទ្ធិត្រុវប្រឡងបញ្ចប់ថ្នាក់ហើយ។ លោកវិបុត្របន្លឺ៖
-កូនភ័យទេ?
-មិនភ័យទេប៉ា!
-បងឯណាទៅចេះភ័យដូចអូននោះ
-អ៊ីចឹងកូនរៀនតាមបងទៅ
-អូនក៏ចង់ដែរ តែអូនមិនឆ្លាតដូចបងទេ អ្ហើយ!
-ម៉េចក៏ដកដង្ហើមធំកូន?
-ពេលបងប្រឡងជាប់ហើយ បងទៅរៀននៅភ្នំពេញ តើបាននរណាឌុបអូន ទៅរៀនទៀត?
-ក្រែងអូនថាអូនធំហើយអ្ហេ ចង់ឲ្យបងឌុបដល់ពេលណាទៀត?
-ត្រូវហើយ! ចាំបងឯងប្រឡងហើយ រៀនជិះម៉ូតូទៅ
-តែអូនមិនចង់ជិះទេម៉ាក់
-មិនចង់ក៏ត្រូវតែជិះដែរ
វគ្គ២ ក្រោយថ្ងៃប្រឡង
បន្ទាប់ពីប្រឡងហើយ វិសិទ្ធិក៏បង្រៀនប្អូនឲ្យជិះម៉ូតូ។ ចន្រ្ទាកាន់ចង្កូតម៉ូតូ ចំណែកយុវជនគឺជិះពីក្រោយជាប់រហូត។ លុះត្រឡប់មកដល់ផ្ទះ៖
-យ៉ាងម៉េចកូន ថ្ងៃនេះជិះទៅដល់ត្រឹមណា?
-ជិតដល់ស្រុកពួកឯណោះម៉ាក់
-អូនចេះជិះហើយម៉ាក់
-កូនម៉ាក់គឺឆ្លាតអ៊ីចឹង
-បង! ស្អែកអូនឌុបបងទៅមើលឈ្មោះណា
-បានតើ!
ស្អែកឡើង ចន្រ្ទាពិតជាឌុបវិសិទ្ធិទៅមើលឈ្មោះមែន តែកន្លែងមើលឈ្មោះ ហាក់ដូចជាមនុស្សច្រើនពេកហើយ៖
-អូនចូលទៅមើលឲ្យបង
-មិនបានទេ! មនុស្សច្រើនណាស់ ឃើញទេ សុទ្ធតែមនុស្សប្រុស ចាំបងនឹងម៉ូតូហើយ
-ចាស!
-សួស្តីចន្រ្ទា!…………….បងជាមិត្តភក្តិវិសិទ្ធិដែលជួបឯងនៅអង្គរណា
-អូ! សួស្តីបង បងប្រឡងជាប់ទេ?
-មិនទាន់បានមើលឈ្មោះផងហ្នឹង ចុះឯណាវិសិទ្ធិ?
-គាត់ចូលទៅមើលឈ្មោះហើយ
-នេះសូម្បីតែមើលឈ្មោះ ក៏គេឌុបឯងមកដែរ
-មិនមែនទេ គឺខ្ញុំជាអ្នកឌុបគាត់មកតើ
-អូ! អ៊ីចឹងទេអ្ហេ
-បងយ៉ាងម៉េចហើយ?
វិសិទ្ធិដើរចូលមកដោយទឹកមុខស្រងូត ឧត្តមក៏បន្លឺ៖
-នែ! ឯងកុំប្រាប់ថា សិស្សពូកែដូចជាឯងប្រឡងធ្លាក់ណា
-ខ្ញុំមិនធ្លាក់ទេ តែពួកឯង!
-ពួកឯងយ៉ាងម៉េច?
-ពួកឯងទាំងប្រាំនាក់ គ្មានជាប់នរណាម្នាក់ទេ
-មិនពិតទេ!
-ពួកយើងឆាប់ចូលទៅមើលទៅ
-ពិតមែនអ្ហេបង?
-បងនិយាយលេងជាមួយពួកគេតើ ពួកយើងឆាប់ទៅ!
វិសិទ្ធិលលេងជាមួយមិត្តរបស់ខ្លួនហើយ ក៏ប្រញាប់ឲ្យចន្រ្ទាបើកម៉ូតូចេញមក គ្រាន់តែចូលទៅមើលហើយ ពួកគេទាំងប្រាំនាក់ក៏ចេញមកវិញ ជួននឹងម៉ូតូយុវជនបើកចេញទៅល្មម ពូកគេស្រែកព្រមគ្នា៖”ឯងហ៊ានកុហកពួកយើងផងអ្ហ៊ៃ!”។ យុវជនសើចយ៉ាងស្រស់សម្លឹងទៅរកមិត្តរបស់ខ្លួន។
នៅក្រោមពន្លឺព្រះចន្ទពេញបូរមី យុវតីទឹកមុខស្រងូតមិននិយាយស្តីអ្វីទាំងអស់ យុវជនបន្លឺ៖
-មើលទៅឯងដូចជាមិនសប្បាយ ដែលបងប្រឡងបាននិទ្ទេសAសោះហ្ន៎
-បងទៅចោលអូនហើយមែនទេ?
-ត្រូវហើយ! បងមិននៅក្បែរក្មេងរឹងរូសដូចជាឯងទៀតទេ ពេលទៅដល់ភ្នំពេញ បងនឹងរស់នៅតែម្នាក់ឯងយ៉ាងមានក្តីសុខ ដោយគ្មាននរណាមករំខានឡើយ អូហូ! ពិតជាមានក្តីសុខណាស់
ចន្រ្ទាយំហ៊ូ យុវជនភ័យណាស់ ស្រដីទៅកាន់នាងទាំងរដិបរដុប៖
-នែ! ម៉េចក៏ឯងយំ?
-បង….អត់ស្រលាញ់អូនទេ…. ហើយអត់នឹកអូនទៀត
-បងនិយាយលេងតើ! បានហើយៗ បើប៉ាម៉ាក់ឃើញឯងយំ បងប្រាកដជាវីវរហើយ បងមានតែអូនម្នាក់ បើបងមិននឹកឯងឲ្យទៅនឹកអ្នកណា?
យុវជនទាញប្អូនមកឱប ហើយគោះក្បាលនាងតិចៗ ហើយនិយាយបន្តដោយស្នាមញញឹម៖
-នរណាទៅភ្លេចក្មេងស្រីល្ងង់ម្នាក់នេះនោះ?
-បងថាឲ្យអូន អូនទៅប្រាប់ម៉ាក់ហើយ
-នែ!
ចន្រ្ទារត់ចូលទៅក្នុងផ្ទះ ដោយទឹកភ្នែកនៅប្រឡាក់ពេញមុខនៅឡើយ។ ឃើញកូនដូចនេះ អ្នកស្រីចរិយាបន្លឺ៖
-កូនកើតអី? វិសិទ្ធិធ្វើអីកូនមែនទេ?
-អត់ទេម៉ាក់! បងអត់បានធ្វើអីអូនឯណា
-អ៊ីចឹងទៅស្លៀកពាក់ទៅ ពួកយើងទៅញ៉ាំបាយនៅហាងយប់នេះ
ថ្ងៃនេះជាថ្ងៃដ៏រីករាយ របស់គ្រួសារលោកវិបុត្រ ព្រោះវិសិទ្ធិ ប្រឡងបាននិទ្ទេសA។ យុវជនត្រូវបានចូលរៀននៅសាលាឱសថស្ថាននៅភ្នំពេញដោយឥតបង់ថ្លៃ។ បន្ទាប់ពីជប់លៀង សម្រាប់ភាពជោគជ័យហើយ គ្រួសារនេះ ក៏ត្រឡប់មកផ្ទះវិញដោយក្តីរីករាយ តែមកមុខផ្ទះ វាគួរឲ្យភ្ញាក់ផ្អើលណាស់ នៅពេលរំលេចស្រ្តីវ័យ កណ្តាលម្នាក់កំពុងឈរញញឹមមករកពួកគេ អ្នកស្រីចរិយាបន្លឺឡើង៖
-ស៊ីណា!
-ម៉ាក់យ៉ាងម៉េចហើយ! (យុវជនបន្លឺ)
អ្នកស្រីស៊ីណា សម្លឹងមើលទៅចន្រ្ទាដោយស្នាមញញឹម និងរលីងរលោងទឹកភ្នែក។ ដោយទប់មិនបាន គាត់ក៏រត់ទៅឱបយុវតីព្រមទាំងបន្លឺឡើង៖”កូនស្រី!”។ ចន្រ្ទាហាក់ដូចជាភាំងណាស់ នាងឈរឈ្មឹងមិនតបតអ្វីឡើយ តែសម្លឹងទៅប៉ាម៉ាក់របស់ នាង។ ពួកគេទាំងអស់ក៏ចូលមកដល់ក្នុងផ្ទះ អ្នកស្រីចរិយាបន្លឺ៖
-វិសិទ្ធិនាំប្អូនទៅបន្ទប់ទៅ
-បាទ! តោះ
វិសិទ្ធិនាំប្អូនទៅដល់បន្ទប់ តែចន្រ្ទាបន្លឺឡើង៖
-អ្នកណាគេហ្នឹងបង?
-បងក៏មិនស្គាល់ដែរ ប្រហែលជាមិត្តភក្តិម៉ាក់ហើយមើលទៅ ឯងឆាប់ទៅងូតទឹកទៅ
-ចាស!
យុវជនដើរចេញមកក្រៅវិញ តែក៏ត្រូវឈរធ្មឹងមួយកន្លែងនៅពេលឮឪពុក ម្តាយជជែកគ្នា៖
-ឯងចង់បានន័យថា រាល់ថ្ងៃនេះ នាងហៅពួកឯងថាប៉ាម៉ាក់អ្ហេ?
-ត្រូវហើយ! ខ្ញុំចង់ប្រាប់នាងពីការពិតដែរ តែខ្ញុំមិនដាច់ចិត្ត ព្រោះខ្ញុំខ្លាចឯងមិនត្រឡប់មកវិញ
-ខុសមកពីខ្ញុំ
-សូមទោស! តើឯងអាចប្រាប់ខ្ញុំបានទេ ហេតុអីក៏ឯងបាត់ឈឹងយ៉ាងនេះ?
-ប្តីខ្ញុំគ្រោះថ្នាក់ចរាចរណ៍ស្លាប់បាត់ហើយ បន្ទាប់ពីគាត់ស្លាប់ទៅ អ្វីៗ ខ្ញុំត្រូវចាប់ផ្តើមសារឡើងវិញ ដូច្នេះ បើខ្ញុំត្រឡប់មកស្រុកវិញ ខ្ញុំមានតែបាតដៃទទេប៉ុណ្ណោះ ខ្ញុំដឹងថា ឯងអាចមើលថែនាង ទើបខ្ញុំសម្រេចចិត្តរកស៊ីនៅទីនោះសិន សូមទោស ដែលខ្ញុំមិនបានផ្តល់ដំណឹងដល់ឯង ខ្ញុំមកនេះ គឺចង់យក ចន្រ្ទាទៅរស់នៅទីនោះ តើឯងយល់ព្រមទេ?
-នាងជាកូនរបស់ឯង ខ្ញុំឃើញឯងមកនេះ ខ្ញុំក៏សប្បាយចិត្តដែរ តែឯងទុកពេលឲ្យខ្ញុំពីបីថ្ងៃសិនណា ខ្ញុំនឹងនិយាយប្រាប់នាងពីរឿងនេះ
-មិនអីទេ! ខ្ញុំរង់ចាំបាន អរគុណឯង
-ពេលនេះឯងសម្រាកនៅឯណា?
-ខ្ញុំស្នាក់នៅសណ្ឋាគារ ត្រូវហើយ! ក្មេងប្រុសនោះ ជាកូនរបស់ឯងមែនទេ?
-ត្រូវហើយ!
-គួរឲ្យស្រលាញ់ណាស់ បានហើយ ខ្ញុំមិនរំខានឯងទេ ខ្ញុំទៅវិញសិនហើយ
វិសិទ្ធិហាក់ដូចជាក្តុកក្តួលណាស់ នាយដើរចូលទៅរកឪពុកម្តាយទាំងរលីងរលោងទឹកភ្នែក៖
-ម៉ាក់គិតឲ្យអូនទៅគាត់វិញអ្ហេ?
-នេះហើយជាម៉ាក់បង្កើតរបស់ចន្រ្ទា គាត់មកទទួលនាងទៅវិញហើយ
-តែម៉ាក់សន្យានឹងខ្ញុំហើយ បើខ្ញុំស្រលាញ់អូន មិនធ្វើបាបអូន ម៉ាក់មិនឲ្យអូនទៅណាទេ?
-ម៉ាក់ក៏មិនចង់ឲ្យនាងទៅដែរ ប៉ុន្តែចន្រ្ទាត្រូវតែរស់នៅជាមួយម្តាយនាងវិញ
-ម៉ាក់កុហក! អូនម៉េចនឹងអាចចាកចេញពីទីនេះទៅ
វិសិទ្ធិរត់ទៅបន្ទប់ខ្លួនវិញទាំងខ្សឹកខ្សួល។ លោកវិបុត្រក្រលេកមកឃើញកូនស្រីអង្គុយយំនៅក្បែរទ្វារ ក៏ស្ទុះចូលទៅ៖
-កូនស្រី!
-ប៉ា!
-កូនបានឮហើយមែនទេ?
-ឲ្យម៉ាក់សូមទោស ដែលមិនបានប្រាប់រឿងនេះដល់កូន
-ប៉ាម៉ាក់អត់ខុសទេ តែអូនត្រូវទៅជាមួយម៉ាក់អូនមែនអ្ហេ?
-យ៉ាងណា គាត់ជាម៉ាក់បង្កើតរបស់កូន កូនត្រូវតែកតញូចំពោះគាត់
-ការពិតបងដឹងពីយូរមកហើយមែនទេ ថាអូនមិនមែនជាប្អូនបង្កើតរបស់គាត់
-អ៊ឺ!
-អរគុណប៉ា និងម៉ាក់!
ទាំងបីនាក់ឪម៉ែកូន យំឱបគ្នាជាប់។ ចន្រ្ទាបានសម្រេចចិត្តទៅជាមួយម្តាយបង្កើតរបស់ខ្លួន។ ការពិតនាងពិតជាអាល័យទីកន្លែងដែលនាងធ្លាប់រស់នៅណាស់ តែនាងសន្យានឹងប៉ាម៉ាក់ចិញ្ចឹមរួចហើយ ថាធ្វើជាកូនកតញូ នាងដឹងថា ប៉ុន្មានថ្ងៃនេះ បងប្រុសមិនសប្បាយចិត្តឡើយ ទើបទៅគោះទ្វារយុវជន៖
-បងខឹងអូនមែនទេ?
-អត់ទេ!
-តែបងអត់ញញឹមដាក់អូនទេ បងប្រាកដជាខឹងអូន
-បងមានរឿងអីដែលខឹងអូននោះ បងគ្រាន់តែបារម្ភ តើក្មេងល្ងង់ម្នាក់នេះ អាចទៅរស់នៅបរទេសបានទេ
-បងកុំភ័យអី អូននឹងមិនល្ងង់ទៀតទេ អូននឹងខំរៀន ម៉ាក់ថា ពេលអូនទៅដល់ទីនោះ អូនមានប្អូនប្រុសម្នាក់ ដូចនេះ អូននឹងមិនល្ងង់ទៀតទេ អូនក្លាយជាបងស្រីគេហើយ
ទោះជាខំនិយាយរ៉ាយរ៉ាប់យ៉ាងណា ក្មេងស្រីនេះ នៅតែដូចជាល្ងង់ដដែល។ យុវជនក្តុកក្តួលណាស់ នាយស្រវាឱបក្មេងតូចជាប់លាយនឹងដំណក់ទឹកភ្នែក ដែលស្រក់ហូរចុះដោយមិនដឹងខ្លួន។ ចន្រ្ទាស្រដីត៖
-ការពិតអូនមិនមែនជាប្អូនបង្កើតបងទេ អ៊ីចឹងហើយ ទើបអូនមិនឆ្លាតដូចជាបង អូនចេះតែបន្ទោសប៉ាម៉ាក់ ហេតុអីបង្កើតអូនមកមិនឆ្លាតដូចជាបង ពេល
នេះអូនដឹងហើយ……..
-អូនឈប់និយាយទៅ!
-អរគុណបងដែលស្រលាញ់អូន មើលថែអូនដូចជាប្អូនបង្កើត អូនស្មានថាអូនជាអ្នកជូនដំណើរបងទៅភ្នំពេញ តែការពិតមិនមែនទេ អូនមិនបាននៅជូនដំណើរបងទេ
-ឈប់និយាយទៅ!
-អូន……..សូម………ទោស!
យុវជនឱបប្អូនជាប់មិនព្រមលែងទាល់តែសោះ ចំណែកទឹកភ្នែកចេះតែស្រក់ចុះស្ទើរតែធ្លុះធ្លាយឱរា។ រីឯក្មេងស្រីតូចចេះតែនិយាយបន្ត៖
-បងប្រាប់អូនថា មិនឲ្យអូននៅក្បែរមនុស្សប្រុសពេកទេ ព្រោះអូនជាស្រី ពេលនេះ អូនដឹងថា បងមិនមែនជាបងបង្កើតអូនទេ អូនឱបបងអ៊ីចឹង បងមិនថាទេអ្ហេ?
-មិនថាទេ!
-យប់នេះ អូនអត់ចង់គេងទេ អូនចង់មើលព្រះចន្ទ
-ពួកយើងចេញទៅក្រៅទៅ
ពីរនាក់បងប្អូនដឹកដៃគ្នា មកអង្គុយលើអង្រឹងក្រោមពន្លឺព្រះចន្ទ។ ចន្រ្ទាស្រដី៖
-តើនៅប្រទេសណរវែសន៍ មានព្រះចន្ទមើលទេបង?
-ឲ្យតែអូនចង់មើលប្រាកដជាមាន
-ការពិតពន្លឺព្រះចន្ទស្អាតណាស់ អាចធ្វើឲ្យមនុស្សមានអារម្មណ៍កក់ក្តៅទៀតផង
-ហេតុអីក៏អូនដឹង?
-អូនប្រាប់ហើយ ថាអូនអត់ល្ងង់ទេ ទោះជាយ៉ាងណា អូននឹងចងចាំបេះដូងដែលនៅក្រោមពន្លឺព្រះចន្ទមួយនេះ
-អ្ហឹះ!
-ឃើញទេ បងអត់ឆ្លាតជាងអូនទេ នេះគឺបេះដូងអូន បង ប៉ា និងម៉ាក់គឺជាពន្លឺព្រះចន្ទ បេះដូងនៅក្រោមពន្លឺព្រះចន្ទ គឺជាបេះដូងដែលមានសេចក្តីសុខបំផុតដូចជាពេលនេះអ៊ីចឹង ពន្លឺស្រទន់របស់ព្រះចន្ទ ធ្វើឲ្យយើងមើលឃើញភាពស្រស់ស្អាតរបស់ផែនដី ប៉ុន្តែ!
-ប៉ុន្តែយ៉ាងម៉េច?
-អូនអត់ឃើញស្នាមញញឹមបងទេ
-ឯងនេះ!
-ការពិតមុខបងស្អាតណាស់ តែតាំងពីតូចមក បងមិនដែលឲ្យអូនប៉ះមុខបងទេ បងថាដៃអូនមិនស្អាត អាចធ្វើឲ្យមុខបងកើតមុនបាន
-បើអូនចង់ប៉ះ ប៉ះមក
-ពិតមែនអ្ហេ?……..បងជាអ្នកនិយាយទេណា
-តែមានលក្ខខណ្ឌ
-លក្ខខណ្ឌ!
-ឯងត្រូវតែចងចាំបង………..បិទភ្នែកទៅ
-ហេតុអីក៏ចាំបាច់បិទភ្នែក?
-នៅពេលបិទភ្នែក បានន័យថា អូនកំពុងតែប្រមូលអារម្មណ៍ ស្រវាយកពន្លឺព្រះចន្ទនេះ ដាក់ក្នុងបេះដូងរបស់អូនហើយ ពេលនោះ ទោះជាមានរឿងអីក៏ដោយ អ្នកដែលអូននឹកឃើញមុនគេ គឺជាបង តើត្រឹមត្រូវទេ?
-ពិតមែនហើយ! អ៊ីចឹងអូនបិទភ្នែកហើយ
ក្មេងស្រីតូច បិទភ្នែក ហើយយកដៃទៅស្ទាបផ្ទៃមុខយុវជន។ វិសិទ្ធិសម្លឹងមើលមុខប្អូន មិនព្រិចភ្នែក ក្នុងអារម្មណ៍ខ្សឹកខ្សួលមិនឈប់។
យន្តហោះបានចាកចេញទៅហើយ ឡានក្រុងក៏បានចាកចេញទៅដែរ។ ពេលនេះនៅក្នុងផ្ទះបុរាណមួយនេះ មានតែពីរនាក់ប្តីប្រពន្ធប៉ុណ្ណោះ។ វិសិទ្ធិបានចាកចេញទៅរៀនផ្នែកឱសថនៅរាជធានីភ្នំពេញ។ ក្មេងប្រុសម្នាក់នេះ ពិតជាមានឆន្ទៈ និងមនសិការគួរឲ្យស្រលាញ់រាប់អានណាស់។ យុវជនបានបួករៀនដោយឥតបង់ថ្លៃ ប៉ុន្តែឲ្យតែសល់ពេលពីការសិក្សា នាយតែងតែឆ្លៀតទៅធ្វើការក្រៅម៉ោងរកប្រាក់ទៀត ផង។ ការធ្វើការងារក្រៅម៉ោងនេះ ធ្វើឲ្យយុវជនពុំសូវបានមកលេងស្រុកកំណើតឡើយ តែនាយតែងតែតេមកលេងឪពុកម្តាយជាញឹកញាប់៖
-អាឡូម៉ាក់!
-វ៉ាកងហើយ ហេតុអីក៏កូនមិនមកផ្ទះអ៊ីចឹង?
-ម៉ាក់កុំបារម្ភអី កូនជាប់ធ្វើការងារសិន
-កូនឯងនេះ!
-ខែនេះ ម៉ាក់មិនចាំបាច់ផ្ញើប្រាក់មកទេ កូនមានចាយហើយ
-មានចាយហើយក៏ដោយ នោះជាប្រាក់ផ្ទាល់ខ្លួនរបស់កូន ម៉ាក់ផ្ញើទៅ កូនត្រូវតែយក គិតពីសុខភាពផងណាកូន
-ម៉ាក់កុំបារម្ភអី ចុះលោកប៉ាសុខសប្បាយទេម៉ាក់?
-គាត់មិនអីទេ ពេលនេះប្រហែលជាកំពុងធ្វើដំណើរតាមផ្លូវហើយ
-និយាយអ៊ីចឹង តើអូនមានតេទៅលេងម៉ាក់ទេ?
-មួយរយៈនេះ ប្រហែលជារវល់ហើយ ទើបមិនឃើញតេមក
-ម៉ាក់មើលថែសុខភាពផងណាម៉ាក់
-ម៉ាក់ដឹងហើយ ឯងក៏ដូចគ្នា ប៉ុណ្ណឹងបានហើយ!
-ជម្រាបលាម៉ាក់!
បន្ទាប់ពីដាក់ទូរស័ព្ទចុះ យុវជនក៏ទៅយកកុំព្យូទ័រ មកcheck internet។ នៅពេលបើក យុវជនតែងតែរអ៊ូតែម្នាក់ឯង៖”មើលទៅឯងល្ងង់យ៉ាងនេះ ប្រហែលជាមិនចេះលេងface bookទេ។ អ្នកណាគេឈ្មោះសុខ ណាវី? អូ! ជាមិត្តភក្តិអូនទេតើ!”។ បន្ទាប់ពីconfirmហើយ ណាវីក៏ឆ្លើយឆ្លងchatជាមួយយុវជន៖
-សួស្តីបង! តើបងនៅចាំខ្ញុំទេ ខ្ញុំជាមិត្តភក្តិចន្រ្ទាណា?
-សួស្តី! បងនៅចាំ តើឯងសុខសប្បាយទេ?
-ខ្ញុំសុខសប្បាយទេ ចុះបងវិញ?
-បងសុខសប្បាយទេ!
-តើបងបានទទួលដំណឹងពីចន្រ្ទាទេ?
– កាលពីពីរខែមុន នាងបានតេមកម៉ាក់ នាងសុខសប្បាយទេ
-អ៊ីចឹង តើនាងមានបានបង្កើតacountតាមface bookទេ? ខ្ញុំរកឈ្មោះនាងមិនឃើញសោះ
-ប្រហែលជាអត់ហើយ បងក៏ធ្លាប់ស្វែងរកនាងដែរ
-បើបងរកនាងឃើញ បងប្រាប់ខ្ញុំផងណា
-មិនអីទេ!
-អ៊ីចឹង ខ្ញុំលាបងសិនហើយ ជួបបងពេលក្រោយ
-សុខសប្បាយណា………..អ្ហើយ!
វិសិទ្ធិបិទកុំព្យូទ័រ លើកដាក់ទៅម្ខាង ក៏ដកដង្ហើមធំ រួចក៏ទាញរូបថតមកមើល៖
-តើស្រីច្រម៉ក់ឯងនេះ មាននឹកបងទេ?
វគ្គ៣ បេះដូងក្រោមពន្លឺព្រះចន្ទ
ប្រាំមួយឆ្នាំក្រោយមក
ប្រទេសណរវែសន៍
យុវតីស្រស់ស្អាត មានទឹកមុខស្រស់ថ្លា អង្គុយមុខកុំព្យូទ័រញញឹមតែម្នាក់ឯង នាងរអ៊ូតិចៗ៖”បងថា ខ្ញុំល្ងង់ តែបងទេដែលល្ងង់នោះ ខ្ញុំអាចមើលឃើញបង តែបងបែរជាមើលមិនឃើញខ្ញុំទៅវិញ”។
-បងស្រី!
-គឺឯងទេអ្ហេ!
ខេវិនគឺជាប្អូនប្រុសបង្កើត ឪពុកទីទៃរបស់ចន្រ្ទា។ ថ្វីត្បិតតែកូននេះ មានឪពុកជាជនជាតិណរវែសន៍ ហើយកើតនៅបរទេសក៏ពិតមែន ប៉ុន្តែយុវជនគឺចេះភាសាកំណើតរបស់ខ្លួនច្បាស់ណាស់។ នេះមកពីការព្យាយាមរបស់អ្នកស្រីស៊ីណា ក្នុងការចិញ្ចឹមបីបាច់កូនមិនឲ្យភ្លេចកំណើតរបស់ខ្លួន។ ពិតមែនហើយ ដោយសារតែកូនប្រុសនេះហើយ ទើបធ្វើឲ្យអ្នកស្រីស៊ីណា ក្លាយជាម្ចាស់ផ្សារទំនើបមួយកន្លែងនៅប្រទេសណរវែសន៍ ដែលផ្សារទំនើបនេះ គឺជាកេរមរតករបស់ប្តីគាត់។
ចន្រ្ទាប្រឡងជាប់សញ្ញាបត្រទុតិយភូមិហើយ ហើយនៅខែក្រោយនេះ នាងមានគម្រោងមកលេងស្រុកកំណើតវិញ។
ថ្លែងពីយុវជនកំលោះឈ្មោះវិសិទ្ធិ ការពិតនាយមានរូបរាងសង្ហារណាស់ ខ្ពស់ស្រឡះតែម្តង។ បន្ទាប់ពីរៀនចប់ ហើយប្រឡងជាប់ក្របខណ្ឌរដ្ឋមក នាយក៏ត្រឡប់មកធ្វើការនៅស្រុកកំណើតវិញ។ យុវជនធ្វើការនៅមន្ទីរពេទ្យបង្អែក ផ្នែកឱសថជិតមួយឆ្នាំហើយ ហើយពេលនេះ កំពុងត្រៀមបើកគម្រោងអាជីវកម្មមួយថែមទៀតផង។ អ្នកស្រីចរិយាបន្លឺ៖
-កូនគិតបើកកន្លែងលក់ថ្នាំពេទ្យមែនអ្ហេ?
-ម៉ាក់ប៉ាត្រូវតែចូលហ៊ុនជាមួយខ្ញុំ
-ចុះឯងមានប្រាក់ប៉ុន្មានដែរ?
-ប៉ាមើលទៅ! (យុវជនហុចសៀវភៅធនាគារទៅប៉ារបស់ខ្លួន)
-សាមសិបលានរៀល
-បងថាម៉េច? ឲ្យអូនមើលវិញ………តើកូនបានប្រាក់ច្រើនយ៉ាងនេះមកពីណា?
-ក្រែងម៉ាក់ដឹងហើយតើ ថាខ្ញុំធ្វើការ បូកផ្សំនឹងប្រាក់ ដែលប៉ាម៉ាក់ផ្ញើទៅឲ្យខ្ញុំផងនោះ ឬប៉ាម៉ាក់មិនជឿលើសមត្ថភាពកូនខ្លូនឯងទេ?
-មិនគួរឲ្យជឿទេ ថាកូនម៉ាក់ចេះសន្សំប្រាក់យ៉ាងនេះ
-តើប៉ាព្រមបណ្តាក់ទុនជាមួយខ្ញុំទេ?
-បាន!
នៅទីបំផុតហាងឱសថស្ថានដ៏តូចមួយបានកើតឡើង។ តើហាងឱសថស្ថាន
នេះមានឈ្មោះអ្វីដែរ? យុវជនឈរសម្លឹងមើលផ្លាកហាងរបស់ខ្លួន ហើយញញឹមតិចៗ ក្នុងចិត្តដូចជាស្កប់ស្កល់ណាស់។ ហាងដ៏តូចល្មមនេះ មានបុគ្គលិកពីរនាក់ជាអ្នកលក់ថ្នាំ អ្នកស្រីចរិយានៅក្នុងហាងជាប្រចាំជំនួសកូនប្រុស។ នៅពេលចេញពីធ្វើការនៅពេលថ្ងៃត្រង់ និងល្ងាច ទើបវិសិទ្ធិមកដូរម្តាយឲ្យត្រឡប់ទៅផ្ទះវិញ។
ម៉ោងប្រាំកន្លះ បុគ្គលិកតែងតែត្រឡប់ទៅផ្ទះវិញ ចំណែកអ្នកស្រីចរិយាត្រឡប់មកធ្វើម្ហូបនៅផ្ទះ យុវជនក៏ក្លាយជាអ្នកលក់ថ្នាំវិញម្តង។ យប់នេះ ហាក់ដូចជាជ្រុលម៉ោងបន្តិចហើយ វិសិទ្ធិនៅអង្គុយមុខកុំព្យូទ័រលេងឆាតនៅឡើយ។ តើនាយកំពុងឆាតជាមួយអ្នកណា?
-តើឯងមិនចង់មកលេងកម្ពុជាទេអ្ហេ?
-ខ្ញុំក៏ចង់ដែរបង តែម៉ាក់និងបងស្រីខ្ញុំ គាត់មិនឲ្យខ្ញុំមកទេ គាត់ថា ចាំឲ្យខ្ញុំប្រឡងជាប់សិន
-អ៊ីចឹង ត្រូវប្រឹងប្រឡងឲ្យជាប់ណា មើលទៅម៉ាក់ និងបងស្រីឯង ប្រហែលជាស្រលាញ់ឯងណាស់ហើយមើលទៅ?
-ពិតណាស់បង ពួកគាត់ស្រលាញ់ខ្ញុំ ជាពិសេស បងស្រីដ៏ល្ងង់របស់ខ្ញុំ
-ហេតុអីក៏ឯងថាឲ្យបងស្រីអ៊ីចឹង?
-ខ្ញុំនិយាយលេងទេ ថ្វីត្បិតតែគាត់មើលទៅដូចល្ងង់បន្តិចមែន តែគាត់ស្រលាញ់ខ្ញុំណាស់ ហើយខ្ញុំក៏ស្រលាញ់គាត់ដែរ ពេលដែលគាត់ទៅកម្ពុជា ខ្ញុំប្រហែលជាអផ្សុកណាស់ហើយមើលទៅ តើបងមានបងស្រីទេ?
-បងគ្មានទេ! តែបងធ្លាប់មានប្អូនស្រីល្ងង់ម្នាក់ដែរ
-ធ្លាប់មាន!
-ត្រូវហើយ! ពេលនេះ នាងមិននៅជាមួយបងទេ នាងទៅរស់នៅប្រទេសណរវែសន៍ជាមួយម្តាយនាងបាត់ហើយ
-បានន័យថា បងនិងនាងមានប៉ាតែមួយ ម៉ាក់ផ្សេងគ្នាមែនទេ?
-មិនមែនទេ! ការពិតបងនិងនាង មិនមែនជាបងប្អូនបង្កើតទេ ប៉ុន្តែបងធ្លាប់រស់នៅជាមួយនាងអស់រយៈពេលដប់បីឆ្នាំ ពួកយើងស្រលាញ់គ្នាដូចជាបងប្អូនបង្កើតអ៊ីចឹង
-ចុះពេលនេះ បងនឹកគាត់ទេ?
-បងនឹកនាងណាស់! បងបានស្វែងរកនាងលើទំព័រface bookដែរ ព្រោះចង់ដឹងថា តើនាងធំប៉ុនណាហើយ ប៉ុន្តែបងរកនាងមិនឃើញសោះ
-ចុះនាងមានតេទៅបងទេ?
-នាងមិនដែលតេមកទេ
-គាត់ប្រហែលជាមានការរវល់ហើយមើលទៅ បើខ្ញុំបានជួបគាត់នៅទីនេះ ខ្ញុំនឹងប្រាប់គាត់ថា បងនឹកគាត់
-អរគុណហើយ!
-ចុះពេលនេះ បងមានសង្សារហើយនៅ?
-អាល្អិតឯងនេះ ម៉េចក៏សួរបងពីរឿងនេះ?
-ខ្ញុំចង់ដឹង! បងប្រហែលជាមិនទាន់មានទេមែនទេ?
-ត្រូវហើយ!
-ចុះបងធ្លាប់មានទេ?
-មិនធ្លាប់ទេ!
-ខ្ញុំប្រាប់បងណា ថ្វីត្បិតតែខ្ញុំមានអាយុតិចជាងបង តែខ្ញុំធ្លាប់មានសង្សារច្រើននាក់ហើយ ហើយពេលនេះ ខ្ញុំកំពុងតែទាក់ទងជាមួយនារីម្នាក់ទៀត ដូចនេះ ខ្ញុំមានបទពិសោធន៍ស្នេហាច្រើនជាងបង បងស្រលាញ់ប្អូនស្រីបងមែនទេ?
-ត្រូវហើយ! បងស្រលាញ់នាងតើ
-ជាស្នេហាមែនទេ?
-មិនមែនទេ!
-មែន! មួយរយភាគរយ អារម្មណ៍របស់បងជាមួយប្អូនស្រីបង គឺស្នេហា គ្រាន់តែបងមិនបានចាប់អារម្មណ៍ មកពីបងនិងគាត់រស់នៅជាមួយគ្នា
-តែពេលនេះ បងមិនបានរស់នៅជាមួយនាងឯណា?
-តែបងបានចងចាំរឿងគ្រប់យ៉ាងដែលទាក់ទងនឹងគាត់ មែនទេ? សូម្បីតែហាងឱសថរបស់បង ក៏បង្ហាញពីអារម្មណ៍របស់បងចំពោះគាត់ដែរ បើបងមិនជឿ បងសាកល្បងគិតឡើងវិញទៅ ថាអារម្មណ៍របស់បងកន្លងមកជាស្នេហា ឬជាបងប្អូន?
-អាល្អិតឯងនេះ!
-ខាងអ្វីផ្សេងខ្ញុំមិនដឹងទេ តែបើនិយាយពីស្នេហា មួយរយភាគរយ ខ្ញុំនិយាយខុសតែមួយភាគរយប៉ុណ្ណោះ បងសំណាងហើយ ដែលបានស្គាល់ខ្ញុំនោះ
-អរគុណឯងហើយ!
-កុំអរគុណខ្ញុំអី គួរតែអរគុណFace book ដែលធ្វើឲ្យពួកយើងស្គាល់គ្នា បងកុំ ភ្លេចសំដីខ្ញុំ បងស្រីខ្ញុំហៅខ្ញុំហើយ ជួបគ្នាលើកក្រោយណាបង!
-សុខសប្បាយ!
-លេងឆាតជាមួយមនុស្សស្រីទៀតហើយមែនទេ?
-មានឯណា?
-បងមិនជឿទេ! ឲ្យបងមើលបន្តិចមើល
-បិទហើយហ្នឹង!
-អាល្អិតឯងនេះ!…………..នែ! ឯងធ្វើអី?
-ខ្ញុំចង់ថើបបង!
ខេវិនចាប់ឱបបងស្រីជាប់ ហើយក៏ថើបនាងមួយខ្សឺត រួចរត់ចេញទៅក្រៅបាត់ ចំណែកយុវតីក្នក់ខ្នាញ់ណាស់ ក៏ស្ទុះរត់ចេញទៅជួបនឹងម្តាយល្មម៖
-មានរឿងអីកូន?
-អាល្អិតនោះ វាថើបខ្ញុំទៀតហើយណាម៉ាក់
-បានហើយ! ថ្ងៃក្រោយបើប្អូនថើបឯង ឯងថើបវាវិញទៅ ឱ្យវារួចគ្នា
-ម៉ាក់!
-ម៉ាក់និយាយលេងទេ តោះ ទៅញ៉ាំបាយទៅ
ថ្លែងពីណាវី នាងកំពុងនៅមុខកុំព្យូទ័រដូចគ្នានៅឡើយ ហើយក៏បើកភ្នែកធំៗ បន្លឺដោយការភ្ញាក់ផ្ញើល៖”ស្រីច្រម៉ក់ឯងនេះ ពេលនេះហើយទើបតែAddខ្ញុំ ឯងមិនដឹងថា ខ្ញុំនឹកឯងប៉ុណ្ណាទេអ្ហេ?”។ ណាវីរអ៊ូបណ្តើរយំបណ្តើរ វាសនាឃើញដូចនោះក៏ដើរចូលមក។ នាយបន្លឺ៖
-បេះដូងក្រោមពន្លឺព្រះចន្ទ! ចន្រ្ទាមែនទេ?
-ចាសបង គឺនាង!
-ពេលនេះនាងធំប៉ុនណាហើយ បើកមើលរូបថតនាងទៅ
-យ៉ាងម៉េចហ្នឹង សុទ្ធតែរូបនៅក្មេងទាំងអស់ហ្នឹងបង
-មើលទៅនាង ប្រហែលជាស្រលាញ់វ័យកុមារនាងណាស់ហើយមើលទៅ
-ពិតមែនហើយ! ពិសេសគឺបងប្រុសរបស់នាង………..បង! នេះរូបបង និងខ្ញុំតើ ការពិត នាងក៏នឹកពួកយើងដែរតើ ប៉ុន្តែហេតុអីក៏នាងមិនuploadរូបបច្ចុប្បន្នរបស់នាងអ៊ីចឹង……..តើបងកើតអីមែនទេ?
-គ្មានទេ! បងទៅបន្ទប់ហើយ
-ការពិតបងនៅតែស្រលាញ់នាងទៀតអ្ហេ?…………….. តើបងវិសិទ្ធិដឹងពីprofile ចន្ទ្រាទេហ្ន៎ គួរតែrequestទៅឲ្យគាត់
ណាវីសប្បាយចិត្តណាស់ ព្រោះតែបានជួបមិត្តចាស់របស់ខ្លួនលើបណ្តាញInternet ប៉ុន្តែវាសនា បែរជាអស់សង្ឃឹមបន្ទាប់ពីបានឃើញprofileរបស់យុវតី។ នាយឈរសម្លឹងមើលព្រះចន្ទក្បែរបង្អួត ហើយគិតតែម្នាក់ឯង៖”ការពិតអ្នកដែលនាងស្រលាញ់គឺបងប្រុសរបស់នាង ទោះនាងទៅដល់ទីណា ក៏ពន្លឺព្រះចន្ទនេះ នៅតែតាមបំភ្លឺនាង ឲ្យមានរស្មីត្រចះត្រចង់ជានិច្ច។ ហេតុអ្វីក៏ខ្ញុំគ្មានវាសនា ធ្វើជាពន្លឺព្រះចន្ទបំភ្លឺបេះដូងរបស់នាង?”។ ហ៊ឺ!……….លួចស្រលាញ់មនុស្សម្នាក់ ពិតជាឯកាណាស់ហ្ន៎ ឱ! អ្នកកំលោះអើយ បើអ្នកដឹងហើយ យល់ហើយ អ្នកគួរតែកាត់ចិត្តទៅ ព្រោះនៅមិនទាន់លង់ជ្រៅនៅឡើយ។ ចំណែកឯអ្នកកំលោះវិសិទ្ធិវិញ បន្ទាប់ពីស្តាប់ពាក្យទូន្មាន របស់កំលោះតូចតាមបណ្តាញInternetរួចមក ហាក់ដូចជាយោលយោគ និងរសាប់រសល់ខ្លាំងណាស់។ តើអារម្មណ៍ដែលមានកន្លងមក ជាស្នេហាឬជាបងប្អូន? ត្រឹមត្រូវណាស់! សូម្បីតែឈ្មោះហាង ក៏រំលឹកដល់មនុស្សស្រីម្នាក់នោះដែរ តើមានអ្វីត្រូវសង្ស័យទៀត។ រឹតតែគិត រឹតតែវិលវល់ ប្រុសនិមលក៏លើកកុំព្យូទ័រមក check Internetដើម្បីបំបាត់អារម្មណ៍រវើរវាយទាំងអស់នេះ។ តើមានអ្វីកើតឡើង? វិសិទ្ធិស្ទើរញញឹម ស្ទើរសើច ស្ទើរយំ មានអារម្មណ៍ក្តុកក្តួលណាស់ នាយរអ៊ូតិចៗ៖”ហេតុអីក៏បងមិននឹកឃើញពាក្យមួយឃ្លានេះ? ក្មេងល្ងង់ឯងនេះ តើឯងចង់លេងអីជាមួយបងមែនទេ ទើបមិនAddបង? ហេតុអីក៏កំណាញ់យ៉ាងនេះ សូម្បីតែរូបថតបច្ចុប្បន្នមួយសន្លឹកក៏ឯងមិនuploadដែរ។ បាន! បងAddឯងមុន”។ ចន្រ្ទាភ្ញាក់ព្រើត៖”បង! ក្មេងស្រីល្ងង់ដូចជាឯងអ៊ីចឹង ហ៊ានលេងជាមួយបងផងអ្ហេ? បងថាឲ្យខ្ញុំផងអ្ហេ!”។ ចន្រ្ទាaceptហើយក៏តបតទៅបងតាមchat៖
-បងស្តីឲ្យខ្ញុំទៀតហើយណា!
-យ៉ាងម៉េច! បងជាបង ថាឲ្យឯងមិនបានអ្ហេ?
-បានតើ! តើប៉ាម៉ាក់សុខសប្បាយទេ?
-ពួកគាត់សុខសប្បាយទេ តែនឹកអូនខ្លាំងណាស់ដឹងទេ?
-ខ្ញុំក៏នឹកពួកគាត់ដែរ បងប្រាប់គាត់ផងណា ថាខ្ញុំសុខសប្បាយទេ ពេលនេះ ខ្ញុំកំពុងត្រៀមចូលមហាវិទ្យាល័យហើយ
-តើរៀនពិបាកទេ?
-បងបារម្ភពីខ្ញុំមែនទេ? ខ្ញុំមិនល្ងង់ទេ បងកុំភ័យ
-ល្អណាស់អ៊ីចឹង! ចុះអ្នកមីង និងប្អូនប្រុសអូនសុខសប្បាយទេ?
-ពួកគាត់សុខសប្បាយទេ
-ចុះឯងវិញ?
-ខ្ញុំក៏សុខសប្បាយដែរ ចុះបង?
-បងមិនសុខទេ ព្រោះនឹកប្អូនស្រីល្ងង់ដូចជាអូននេះ បងបានស្វែងរកអូន តែមិននឹកស្មានថា អូនប្តូរឈ្មោះទៅជាបេះដូងក្រោមពន្លឺព្រះចន្ទសោះ
-បេះដូងនៅក្រោមពន្លឺព្រះចន្ទ គឺជាបេះដូងដែលមានសេចក្តីសុខបំផុត អូនបានប្រាប់បងហើយ តើមែនទេ?
-ពិតមែនហើយ! ម្តងនេះ គឺអូនឆ្លាត តែបងទេ ដែលល្ងង់ សូមទោសណា!
-មិនអីទេ នរណាឲ្យបង ជាបងប្រុសរបស់អូន បងដឹងទេ? បងសង្ហារគួរឲ្យស្រលាញ់ណាស់ តើបងខ្ពស់ជាងមុនមែនទេ?
-ប្រាកដហើយ! បើសិនជាបងឃើញអូន តើបងចំណាំអូនបានទេ?
-បើអូនស្អាតជាងមុន អ៊ីចឹងបងប្រហែលជាមើលអូនមិនស្គាល់ទេ
-បងចង់និយាយថា កាលនៅតូចអូនមិនស្អាតមែនទេ?
-ប្រហែលហើយ! បើមិនជឿ ចាំសួរប្អូនប្រុសអូនទៅ
-ឈប់និយាយជាមួយបងហើយ
-នែ! កូនក្មេងនៅតែក្មេងដដែលហ្នឹង
-អូនធំហើយ!
-ធំឯណា បើរូបនៅក្នុងprofileសុទ្ធតែកូនក្មេងហ្នឹង
-ឈប់និយាយជាមួយបងហើយ
-នែ!………ស្រីច្រម៉ក់នេះ ចង់បិទក៏បិទភ្លាម
ចន្រ្ទាហាក់សប្បាយចិត្តណាស់ បន្ទាប់ពីchatជាមួយបងប្រុស ឃើញដូចនោះ ខេវិនបន្លឺ៖
-តើchatជាមួយអ្នកណា ហេតុអីក៏សប្បាយចិត្តម្ល៉េះ?
-ជាមួយអ្នកណាមានទាក់ទងអីហ្នឹងឯង
-បើខ្ញុំស្មានមិនខុសទេ ប្រហែលជាមួយបងប្រុសហើយមែនទេ?
-ត្រូវហើយ!
-ក្រែងគាត់មិនស្គាល់ឈ្មោះបងលើface bookទេអ្ហ៊ៃ?
-តែពេលនេះ ស្គាល់ហើយ យ៉ាងម៉េច?
-មើលទៅបងសប្បាយចិត្តជាងខ្ញុំchatជាមួយសង្សារទៀត បងនិយាយទៅ បងស្រលាញ់គាត់ជាស្នេហាមែនទេ?
-ឯងនិយាយអី?
-ខ្ញុំក៏មានមិត្តម្នាក់នៅកម្ពុជា មានរឿងរ៉ាវប្រហាក់ប្រហែលនឹងបងដែរ តែខ្ញុំយល់ថា វាជាស្នេហា មិនមែនបងប្អូនទេ?
-ខួរក្បាលឯងមានតែរឿងមួយនេះទេអ្ហេ? ឲ្យខំរៀនមិនខំទេ បងឈប់និយាយជាមួយឯងហើយ
-ខ្ញុំនិយាយហើយមួយរយភាគរយ ខ្ញុំថាខុសតែមួយភាគរយទេ
បន្ទាប់ពីឆ្លងឆ្លើយជាមួយប្អូនស្រីហើយ បែរជាមានកម្លាំង ហើយគេងលក់ស្កប់ស្កល់ទៀតផង។
នៅក្នុងហាងឱសថ សំឡេងអតិថិជនម្នាក់បន្លឺឡើង៖
-តើអ្នកលក់ទៅណាបាត់ហើយ?
-អូ! សូមទោស …………..តើអ្នកនាងទិញថ្នាំអីដែរ?
វិសិទ្ធិដើរចេញមក។ មកដល់ជិតគ្នា ទាំងពីរនាក់ហាក់ដូចជាភាំងមួយស្របក់ ណាវីបន្លឺ៖
-គឺបងវិសិទ្ធិមែនទេ?
-នាងគឺ………….
-ខ្ញុំណាវីណាបង
-ត្រូវហើយ! បងស្ទើរចាំឯងមិនបាន មើលរូបថតឯង ស្មានតែឯងតូចល្អិតតើ?
-ខ្ញុំខ្ពស់ពេកមែនទេបង?
-អត់ទេ! សមល្មមហើយ អរគុណហើយ ដែលឯងrequestចន្រ្ទាទៅឲ្យបង
-ចាស! ………..តើនេះជាហាងរបស់បងមែនទេ?
-ត្រូវហើយ! យ៉ាងម៉េចដែរ?
-មិនធំតែក៏មិនតូចដែរ អនាគតប្រហែលជាធំជាងនេះ មែនទេបង?
-ប្រហែលហើយ ត្រូវហើយ! តើឯងត្រូវការទិញថ្នាំអីដែរ?
-នេះវិជ្ជបញ្ជាបង
-ចាំបងមួយភ្លែត
-ចន្រ្ទាដឹងទេ ថាបងបើកហាងឱសថនេះ?
-បងមិនបានប្រាប់នាងទេ? តើឯងទិញថ្នាំទៅឲ្យអ្នកណា?
-គឺបងប្រុសខ្ញុំ!
-វាសនាមែនទេ?
-បងនៅចាំគាត់ដែរអ្ហេ?
-នៅចាំតើ តែបងភ្លេចមុខគេហើយ តើគេឈឺយូរហើយអ្ហេ?
-ពីរបីថ្ងៃហើយ ផ្លូវកាយមិនប៉ុន្មានទេបង តែប្រហែលជាផ្លូវចិត្ត
-យ៉ាងម៉េចហ្នឹង!
-គាត់នឹកប្អូនស្រីបងហ្នឹងណា
-គេនៅមិនទាន់ភ្លេចចន្រ្ទាទៀតអ្ហេ?
-ចាស! តែគាត់ដឹងហើយ ថាចន្រ្ទាមានមនុស្សដែលនាងស្រលាញ់ហើយ
-ពូទិញថ្នាំ! (អតិថិជនម្នាក់បន្លឺឡើង)
-បាទ! នេះថ្នាំឯង
-ចាស! នេះប្រាក់បង ខ្ញុំទៅវិញហើយ
-អរគុណ!
-អូនត្រូវការថ្នាំអី?
-ថ្នាំផ្តាសាយពូ
វិសិទ្ធិគិតសំដីណាវីឡើងវិញ ហើយក៏សួរខ្លួនឯង៖”អូនមានសង្សារហើយអ្ហេ! ហេតុអីក៏មិនប្រាប់បងផង? មើលទៅខ្ញុំប្រហែលជាជិតឆ្កួតហើយ”។ យុវជនអង្គុយស្លុង ស្រាប់តែសំឡេងសារchatបន្លឺឡើង៖
-សួស្តីបងប្រុស!
-សួស្តី!
-តើបងគិតយល់ហើយនៅ ថាជាស្នេហាឬបងប្អូន?
-ឯងនៅចងចាំដែរអ្ហេ?
-ប្រាកដហើយ!
-បងគិតថា ឯងប្រហែលជាគិតច្រើនពេកហើយ ពួកយើងគឺជាបងប្អូនប្រាកដណាស់ មិនអាចជាស្នេហាទេ
-មនុស្សចាស់ដូចជាពួកបង តើកំពុងគិតអីហ្នឹង វាជាស្នេហាប្រាកដណាស់ នៅបដិសេធទៀត
-តែបងថា ក្មេងដូចជាឯងទេ ដែលគិតច្រើននោះ
-បងចាំមើលណា ខ្ញុំនឹងខំប្រឡងឲ្យជាប់ ដើម្បីទៅកម្ពុជាជួបបង ហើយខ្ញុំនឹងចាំមើលពួកបង តើជាស្នេហាឬមិនមែន?
-ឯងនិយាយលេងទេអ្ហេ ធ្វើម៉េចឯងនឹងអាចជួបពួកបងក្នុងពេលតែមួយនោះ បើពេលនេះ ប្អូនស្រីបងមិនទាន់ត្រឡប់មកវិញផង
-ចុះបើខ្ញុំអាចជួបពួកបងក្នុងពេលតែមួយ តើបងហ៊ានសារភាពស្នេហ៍ជាមួយប្អូនស្រីបងទេ?
-វាមិនអច្ឆរិយដល់ថ្នាក់ហ្នឹងទេ?
-តែខ្ញុំជាទេវតាស្នេហា ខ្ញុំអាចធ្វើឲ្យកើតមានរឿងអច្ឆរិយឡើង តើបងហ៊ានភ្នាល់ជាមួយខ្ញុំទេ?
-បើឯងអួតថា ឯងជាទេវតាស្នេហាហើយ អ៊ីចឹងបងភ្នាល់ជាមួយឯងចុះ ឯងនិយាយទៅ តើភ្នាល់យ៉ាងម៉េច?
-បើរវាងពួកបងពិតជាបងប្អូន មួយជាតិនេះ ខ្ញុំនឹងមិនញ៉ែស្រីទៀតទេ តែបើជាស្នេហា បងត្រូវថើបគាត់ចំពោះមុខខ្ញុំ
-ឯងលេងមែនទែនអ្ហេ?
-បងហ៊ានទេ?
-បាន! សង្ឃឹមថា ឯងប្រឡងជាប់ ហើយមកលេងកម្ពុជា
-រាត្រីសួស្តីបង!
ពិតជាគួរឲ្យអស់សំណើតណាស់។ យុវជនបន្លឺហួសចិត្តតែម្នាក់ឯង៖”ហេតុអីក៏អាល្អិតម្នាក់នេះ ចាប់អារម្មណ៍ពីរឿងខ្ញុំយ៉ាងនេះ? ហេតុអីក៏ខ្ញុំត្រូវភ្នាល់ពីអារម្មណ៍ខ្លួនឯងជាមួយនឹងគេ? តែវាក៏គួរឲ្យអស់សំណើចដែរ”។
ថ្លែងពីយុវតី នាងកំពុងរៀបចំអីវ៉ាន់យ៉ាងសប្បាយរីករាយ។ ខេវិនដើរចូលមក ហើយក៏លោតទៅលើគ្រែរបស់នាង ទើបស្រដី៖
-បានទៅកម្ពុជា បងសប្បាយចិត្តណាស់មែនទេ?
-ត្រូវហើយ!
-ប្អូនប្រុសបង្កើតមិននឹក បែរជាទៅនឹកបងប្រុសចិញ្ចឹមទៅវិញ
-ឯងចង់បានន័យថាម៉េច?
-បងដឹងខ្លួនឯងច្បាស់ហើយ ពិតមែនហើយ មនុស្សស្រីឲ្យតែមានស្នេហាហើយគឺប្រាកដជាភ្លេចអ្វីៗទាំងអស់
-ស្នេហាក្បាលឯងអី!
-ឈឺណាបង!
-ឯងឈប់និយាយផ្តេសផ្តាសទៀតទៅបានទេ?
-បង! បងចង់ឲ្យខ្ញុំឈប់ញ៉ែស្រី តើមែនទេ?
-យ៉ាងម៉េច! ឯងមានអារម្មណ៍ធុញទ្រាន់ហើយមែនទេ?
-អ្នកណាថា? បើបងចង់ឲ្យខ្ញុំឈប់ញ៉ែស្រី បងភ្នាល់ជាមួយខ្ញុំទៅ
-ឯងចង់លេងល្បិចអីទៀតហើយ?
-គ្មានទេ! តែខ្ញុំគ្រាន់តែចង់ភ្នាល់ជាមួយបង ឬបងមិនចាប់អារម្មណ៍ទេ ដែលប្អូនប្រុសរបស់បង ឈប់ញ៉ែស្រីនោះ?
-អ៊ីចឹងឯងនិយាយទៅ ចង់ភ្នាល់អី?
-ខ្ញុំគិតថា រវាងបងនិងបងប្រុស គឺស្នេហា បើមិនមែនជាស្នេហាទេ ខ្ញុំជាអ្នកចាញ់ តែបើជាស្នេហា បងត្រូវថើបបងប្រុសចំពោះមុខខ្ញុំ
-ឯងឆ្កួតទេអ្ហេ! រឿងបែបនេះក៏នឹកឃើញដែរ?
-ក្រែងបងជឿជាក់ ថាជាបងប្អូនអ្ហេ អ៊ីចឹងភ្នាល់ទៅ ឬមិនមែន…
-បាន! បងភ្នាល់ក៏ភ្នាល់
-សម្រេចអ៊ីចឹងចុះ……………ម្តងនេះ មិនត្រឹមតែបានទៅកម្ពុជាទេ នៅមានល្ខោនល្អមើលទៀតផង
-ប្រាកដថាប្រឡងជាប់ហើយអ្ហេ?
-ខ្ញុំទៅរៀនហើយ ខ្ញុំត្រូវប្រឡងឲ្យជាប់ ដើម្បីមើលបងស្រីខ្ញុំថើបមនុស្សប្រុស
-ឡប់សតិ!
…………………………………………………………………………………………………
ខេត្តសៀមរាប
អ្នកស្រីចរិយាស្រដីទៅកាន់ស្វាមី៖
-បងមកដល់ល្មម តើបងមានត្រូវទៅណាទៀតទេ?
-ម៉ោងប្រាំពីរយប់នេះ បងមានណាត់ជាមួយមន្រ្តីពន្ធដារ
-អ៊ីចឹងមិនអីទេ អូនទៅផ្សារទិញបន្លែមួយភ្លែត
អ្នកស្រីចរិយាចេញផុត សំឡេងទូរស័ព្ទលោកវិបុត្របន្លឺឡើង៖
-អាឡូ!
-លោកប៉ាគឺអូនណា!
-ចន្រ្ទា គឺកូនមែនទេ?
-ចាស!
-កូនសុខសប្បាយទេ?
-អូនសុខសប្បាយទេ ប៉ា! ពេលនេះ អូននៅព្រលានយន្ត ប៉ាមកយកអូន បានទេ?
-ឈប់ៗ! តើកូននិយាយថាម៉េច កូននៅឯណា?
-ពេលនេះ អូននៅព្រលានយន្តហោះសៀមរាប ប៉ាមកយកអូនបានទេ?
-បានៗ! កូនចាំប៉ា ប៉ាចេញទៅហើយ
លោកវិបុត្រ ពិតជារំភើប និងត្រេកអរខ្លាំងណាស់ ក៏បើកឡានចេញទៅ ភ្លេចគិតថាគ្មាននរណានៅផ្ទះឡើយ។ លុះអ្នកស្រីចរិយាមកដល់ ឆ្ងល់ណាស់មិនឃើញស្វាមី ក៏តេទៅ៖
-អាឡូ!
-ក្រែងបងថា ទៅនៅម៉ោងប្រាំពីរអ្ហេ?
-បងមានការបន្ទាន់ អូនធ្វើម្ហូបថែមទៅ យប់នេះ មានភ្ញៀវម្នាក់ទៅផ្ទះរបស់យើងហើយ បានហើយ! បងកំពុងបើកឡាន
-តើមានភ្ញៀវមកពីណាហ្នឹង?
ទៅដល់ព្រលានយន្តហោះ លោកវិបុត្រឈរចាំកូនស្រីដោយអន្ទះសា ប៉ុន្តែគាត់មិនដឹងទេថា កូនស្រីកំពុងតែឈរក្បែរគាត់នោះទេ។ ការពិតចន្រ្ទាចង់ឱបប៉ាណាស់ តែនាងដឹងច្បាស់ ថាប៉ារបស់នាងចំណាំនាងមិនបានឡើយ ទើបនាងស្រដី៖
-សួស្តីលោកពូ តើលោកពូកំពុងចាំនរណាហ្នឹង?
-អូ! ខ្ញុំចាំកូនស្រីខ្ញុំ នាងតូចកំពុងតែចាំប៉ាម៉ាក់មែនទេ?
-ចាស! កូនស្រីអ៊ំមកពីណាដែរ
-នាងមកពីណរវែសន៍
-គាត់រស់នៅទីនោះមែនទេ?
-ត្រូវហើយ! នាងទៅរស់នៅទីនោះតាំងពីអាយុដប់បីឆ្នាំម្ល៉េះ គិតទៅអស់រយៈពេលប្រាំមួយឆ្នាំហើយ
-អ៊ីចឹង តើអ៊ំចំណាំគាត់បានទេ?
-ត្រូវហើយ! អ៊ំក៏មិនប្រាកដដែរ ពេលនេះ នាងប្រហែលជាពេញវ័យហើយ ហើយប្រហែលជាស្របាក់ស្របាលនឹងនាងតូចដែរ
-តើអ៊ំនឹកនាងទេ?
-អ៊ំពិតជានឹកនាងខ្លាំងណាស់
-អ៊ីចឹង! អ៊ំមើលមកខ្ញុំមើល………….ប៉ា!
លោកវិបុត្រសម្លឹងមើលកូនស្រីយ៉ាងយូរ ទើបដឹងថា នាងតូចនេះ គឺជាកូនស្រីរបស់ខ្លួន។ យុវតីឱបឪពុកដោយក្តីរលឹក ទឹកភ្នែកស្រក់ចុះ តែមិនបង្អង់យូរ ទាំងពីរនាក់ឪកូន ក៏ឡើងឡានត្រឡប់មកផ្ទះ។ គ្រាន់តែឮសូរឡាន អ្នកស្រីចរិយាក៏ដើរចេញមក។ អ្នកស្រីឃើញយុវតីចុះពីលើឡានមក ក៏ឈរស្ងៀមមួយសន្ទុះ ព្រោះគិតថា ប្រហែលជាភ្ញៀវរបស់ស្វាមី។ អ្នកស្រីញញឹមហើយក៏សម្លឹងទៅប្តី ដែលកំពុងញញឹមមិនព្រមស្រដីអ្វីសោះ។ ចន្រ្ទាស្ទុះរត់ទៅឱបម្តាយ ដោយបន្លឺឡើង៖”ម៉ាក់!”។ អ្នកស្រីចរិយាហាក់ដូចជាភាំងមួយស្របក់ ទើបនឹកឃើញបន្លឺឡើង៖
-គឺកូន……….. កូនគឺចន្រ្ទាមែនទេ?
-ចាស! គឺអូនណាម៉ាក់
-នេះកូនមកផ្ទះ ម៉េចមិនប្រាប់ម៉ាក់មុនអ៊ីចឹង
-អូនចង់ធ្វើឲ្យម៉ាក់ភ្ញាក់ផ្អើលហ្នឹងណា
-ពួកយើងចូលទៅក្នុងផ្ទះទៅ
-ប៉ាយកអីវ៉ាន់ ទៅដាក់បន្ទប់ឯងហើយ
អ្នកស្រីចរិយា ជួយរៀបទុកដាក់អីវ៉ាន់កូនបណ្តើរជជែកបណ្តើរ ចំណែកលោក វិបុត្រក៏អង្គុយក្បែរនោះដែរ ដោយញញឹមជាប់រហូត ចន្រ្ទាបន្លឺ៖
-ម៉ាក់មិនដឹងថាអូនមកទេ តែហេតុអីបន្ទប់អូនស្អាតដដែលម៉ាក់
-ម៉ាក់ឯងសម្អាតវាជាប្រចាំហ្នឹងណា
-ម៉ាក់គិតថា ថ្ងៃណាមួយកូននឹងត្រឡប់មកផ្ទះ ដូចនេះទើបម៉ាក់សម្អាតវាជាប្រចាំរង់ចាំកូនហ្នឹងណា
-អរគុណម៉ាក់!
-ក្រែងបងមានការណាត់ជួបយប់នេះអ្ហេ?
-ត្រូវហើយ! បងភ្លេច ប៉ាទៅសិនហើយចន្រ្ទា
-ចាស!
-មើលទៅប៉ាកូនសប្បាយចិត្តជាងម៉ាក់ទៅទៀត
-ប៉ានិងម៉ាក់ គឺសុទ្ធតែសប្បាយចិត្តនៅពេលជួបអូនមែនទេ?
-ប្រាកដហើយ! ត្រូវហើយ នៅពេលទៅយកកូននោះ តើប៉ាចំណាំកូនបានទេ?
-អត់ទេម៉ាក់! អូនឈរក្បែរគាត់យ៉ាងយូរ តែគាត់អត់ស្គាល់អូនផងហ្នឹង
-ត្រូវហើយ! បើកូនម៉ាក់ធំពេញវ័យ ហើយស្អាតយ៉ាងនេះនោះ
-អូនស្អាតជាងពីតូចមែនទេម៉ាក់?
-ស្អាត ហើយឆ្លាតទៀតផង
-អរគុណម៉ាក់!…………ត្រូវហើយ! ពេលនេះបងនៅឯណាម៉ាក់
-ត្រូវហើយ! បងឯងប្រហែលជាចាំផ្លូវម៉ាក់ហើយ ម៉ាក់ទៅដួសបាយសិន…..
-អូនជួយម៉ាក់
-កូនប្រហែលមិនដឹងទេ ពេលនេះ បងកូនក្លាយជាម្ចាស់ហាងលក់ថ្នាំហើយ ម៉ាក់តែងតែទៅចាំហាងនៅពេលគេទៅធ្វើការ ពេលល្ងាច ម៉ាក់តែងតែខ្ចប់បាយទៅឲ្យគេ ហើយត្រឡប់មកវិញនៅម៉ោងប្រាំបួនជាមួយគ្នា និងពេលខ្លះ បងកូនគឺគេងនៅហាងតែម្តងហ្នឹង
-អ៊ីចឹងថ្ងៃនេះ អូនយកបាយទៅឲ្យគាត់ ម៉ាក់ឲ្យមកអូនមក
-នែ! ……………ចំមែនកូននេះ ថាហើយក៏ទៅភ្លាម………..តើទៅរកហាងឃើញ ទេ?
ចន្រ្ទាសប្បាយចិត្តណាស់ ព្រោះនឹងបានជួបបងប្រុស តែពេលមកដល់ជិតផ្សារចាស់ដែលមានហាងថ្នាំបួនប្រាំ ទើបនាងបន្លឺឡើង៖”……..ទូរស័ព្ទ វីវរហើយ! ទូរស័ព្ទនៅផ្ទះឯនោះ តើហាងឱសថបងឈ្មោះអីទៅហ្ន៎? ខ្ញុំមិនគិតថា ខ្ញុំរកមិនឃើញនោះទេ!”។ ចន្រ្ទាសម្លឹងមើលឈ្មោះហាងថ្នាំទាំងអស់នៅម្តុំផ្សារចាស់ លុះមកដល់ហាងថ្នាំមួយ ទើបនាងបន្លឺឡើង៖”ពន្លឺព្រះចន្ទ!……….ប្រាកដជាហាងនេះ……..ការពិតបងនៅនឹកឃើញខ្ញុំ”។ យុវតីហាក់ដូចជាមានអារម្មណ៍ក្តុកក្តួល និងបុកពោះណាស់ នាងដើរចូលទៅក្នុងហាងថ្នាំ តែពុំឃើញមាននរណាទាល់តែសោះ មួយសន្ទុះទើបសំឡេងយុវជនបន្លឺឡើង ដើរចេញមក៖”ប្អូនទិញថ្នាំអ្ហេ?”។ ចន្រ្ទាសម្លឹងទៅបងប្រុសតាំងពីក្បាលដល់ចុងជើង ហើយក៏គិតតែម្នាក់ឯង៖”បងខ្ពស់ណាស់ ហើយសង្ហារជាងមុន តើផ្ទៃមុខបង ធំជាងមុនដែរអត់ហ្ន៎? ខ្ញុំចង់ស្ទាបមុខបងណាស់”។ យុវជនគិតស្លុង តែភ្ញាក់ព្រើត ពេលសំឡេងយុវជនបន្លឺឡើងសារជាថ្មី៖
-ប្អូនត្រូវការអី?
-អូ!……….ហេតុអីក៏ហាងនេះ មានឈ្មោះថាពន្លឺព្រះចន្ទ?
-សូមទោស……………..
-លោកប្រហែលជាឆ្ងល់ហើយ ថាហេតុអីក៏ខ្ញុំសួរសំនួរនេះមែនទេ? បេះដូងក្រោមពន្លឺព្រះចន្ទ ហេតុអីពេលនេះ មានតែពន្លឺព្រះចន្ទ មិនឃើញបេះដូងអ៊ីចឹង?
-បេះដូងក្រោមពន្លឺព្រះចន្ទ
-បងល្ងង់ណាស់! ហេតុអីមើលអូនមិនស្គាល់អ៊ីចឹង?
-គឺអូន!………….ពិតជាអូនមែនអ្ហេ!
-បងលាងដៃហើយនៅ ស្ទាបមុខអូនអ៊ីចឹង មុខអូនប្រាកដជាចេញមុន
អ្នកកំលោះត្រេកអរខ្លាំងណាស់ មានអារម្មណ៍ថា ហាក់ដូចជារកឃើញបេះដូងរបស់ខ្លួនមកវិញ។ នាយឱបយុវតីឡើងជាប់ណែននឹងដើមទ្រូងដោយមិនព្រម ព្រលែងទាល់តែសោះ ចំណែកស្រីល្ងង់ម្នាក់នេះ ក៏ឱបតបបងប្រុសរបស់ខ្លួនវិញ ដោយឥតញញើតឡើយ ហើយក៏ចេះតែគិតតែម្នាក់ឯង៖”ពេលដែលខ្ញុំឱបបង គឺមានអារម្មណ៍កក់ក្តៅណាស់ តែខ្ញុំចាំ កាលពីប្រាំមួយឆ្នាំមុន បេះដូងខ្ញុំមិនលោតញាប់យ៉ាងនេះទេ តើមានរឿងអីកើតឡើងមែនទេ?”។ គិតមកដល់ចំណុចនេះ ទាំងពីរនាក់ក៏នឹកឃើញដល់សំដីមួយដូចគ្នា៖”បងគិតមើលទៅ ថារវាងពួកបង ជាស្នេហាឬបងប្អូន?”។ គ្រប់យ៉ាងប្រែប្រួលមួយរំពេច ទាំងពីរនាក់ ងាកចេញពីគ្នារៀងខ្លួន ដោយលែងស្តីអ្វីទាំងអស់។ មួយសន្ទុះស្រាប់តែសំឡេងទូរស័ព្ទបន្លឺឡើង៖
-អាឡូម៉ាក់!
-តើកូនមានឃើញប្អូនស្រីទៅដល់ហើយនៅ?
-បាទ! អូនមកដល់ហើយម៉ាក់
-អ៊ីចឹងបានហើយ
-ម៉ាក់តេមកអ្ហេ?
-អ៊ឺ!
-ត្រូវហើយ់! នេះខ្ញុំយកបាយមកឲ្យបង ទីនេះមានបន្ទប់ទឹកទេ?
-នៅខាងក្នុង អូនចូលទៅ
-ចាស!
យ៉ាងម៉េចហ្នឹង! ហេតុអីក៏ទាំងពីរនាក់បងប្អូននេះ ក៏ស្រាប់តែប្រែដូចជាអ្នកដទៃទៅហើយ? យុវតីចូលមកដល់ក្នុងបន្ទប់ទឹក ក៏បន្លឺឡើងនៅពីមុខកញ្ចក់៖”អាល្អិត!ឯងនេះ ហេតុអីក៏ធ្វើឲ្យបង មានអារម្មណ៍មិនស្រួលយ៉ាងនេះទៅវិញ? ក្រែងខ្ញុំនឹកគាត់អ្ហេ ចុះហេតុអី ក៏មិនហ៊ានមើលមុខគាត់អ៊ីចឹង? ត្រូវហើយ! គាត់ខ្ពស់យ៉ាងនេះ គឺពិតជាពិបាកហើយ ក្នុងការសម្លឹងមើលគាត់នោះ អ្ហឺយ! គួរតែត្រឡប់ទៅផ្ទះមុនគាត់ហើយ”។ ចន្រ្ទាចេះតែគិត ហើយនិយាយម្នាក់ឯងរហូតមិនឃើញចេញមកសោះ អ្នកកំលោះក៏ទៅគោះទ្វារ៖
-តើឯងធ្វើអីហ្នឹង ហេតុអីក៏យូរម្ល៉េះ?
-រួចហើយ!
-ឆាប់ចេញមកញ៉ាំបាយមក
-អូនគិតថា អូនចង់ត្រឡប់ទៅផ្ទះវិញ
-ញ៉ាំបាយសិនទៅ បន្តិចទៀតបងបិទហាងហើយ ចាំទៅទាំងអស់គ្នា
-តែ!
-បងមើលទៅអូន ដូចជាប្លែកជាងមុនច្រើនណាស់
-អូនប្លែកអ្ហេ!
-ត្រូវហើយ! មើលទៅមិនល្ងង់ដូចមុនទេ ហើយថែមទាំងចេះអៀនទៀតផង
-អ្នកណាអៀននោះ
-មិនមែនអ្ហេ! អ៊ីចឹងអង្គុយញ៉ាំបាយជាមួយបងមក
-ញ៉ាំក៏ញ៉ាំ
ពេញមួយល្ងាចនេះ វិសិទ្ធិញញឹមរហូតដល់ម៉ោងត្រឡប់ទៅផ្ទះវិញ។ បន្ទាប់ពីបិទហាងហើយ យុវជនក៏ទាញម៉ូតូចេញមក ដូចតាមទម្លាប់ យុវតីឡើងជិះពីក្រោយហើយក៏ឱបចង្កេះបងប្រុសជាប់។ អ្វីៗដូចជាពេលពីប្រាំមួយឆ្នាំមុនអ៊ីចឹង តែប្លែកម្យ៉ាងគឺអារម្មណ៍។ ចន្រ្ទានឹកឃើញសំដីប្អូនប្រុសទៀតហើយ នាងក៏ដកដៃយ៉ាងលឿនចេញពីយុវជន ស្រាប់តែម៉ូតូចាប់ហ្រ្វាងង៉ក់៖
-……………….កំពុងគិតអី?………..
-គ្មានទេ!
-ឱបចង្កេះបង!
-បង! ខ្ញុំចង់ទៅលេងផ្ទះណាវីបានទេ?
-បងជូនឯងទៅ
គ្រាន់តែឃើញពីរនាក់បងប្អូនទៅដល់ ណាវីត្រេកអរឥតឧបមា ក៏ស្ទុះទៅទាញបងប្រុសឲ្យចេញមក៖
-បងមើលទៅ តើនរណាគេមកលេងនឹងពួកយើងហ្នឹង?
-បងវិសិទ្ធិ!
-សួស្តីបង! ខ្ញុំគឺចន្រ្ទាណា
-ចន្រ្ទា! ……………អូនត្រឡប់មកពីអង្កាល់ហ្នឹង?
វាសនាសប្បាយចិត្តមិនចាញ់វិសិទ្ធិឡើយ។ ពួកគេជជែកគ្នា ស្ទើរតែភ្លេចថា យប់ទៅហើយ។
វគ្គ៤ ស្នេហា ឬបងប្អូន?
ជិតមួយសប្តាហ៍ទៅហើយ ដែលចន្រ្ទាមកជួយលក់ថ្នាំបង។ ចំណែកឯកំលោះតូចខេវិនឯនេះវិញ ហាក់បីដូចជាអផ្សុកណាស់។ នាយប្រាស់ខ្លួនទៅលើគ្រែ ហើយរអ៊ូតែម្នាក់ឯង៖
-ពួកបងប្រហែលជាមានក្តីសុខណាស់ហើយមើលទៅ ទើបមិនដែល0n lineយ៉ាងនេះ គ្មាននឹកដល់ខ្ញុំបន្តិចសោះ
-ឯងរអ៊ូអីហ្នឹង?
-តើបងស្រីមានតេមកលេងទេម៉ាក់?
-គ្មានទេ! តែនាងប្រាប់ថា នាងសុខសប្បាយទេ យ៉ាងម៉េច! ឯងចេះនឹកបងស្រីឯងដែរអ្ហេ គ្មាននរណាជេរ ប្រហែលជាអផ្សុកហើយមើលទៅ?
-គាត់ប្រហែលជាមិននឹកខ្ញុំទេ
-ឯងមិនទៅសាលាទេអ្ហេ?
-ម៉ាក់! ល្ងាចនេះខ្ញុំដឹងលទ្ធផលហើយ ម៉ាក់កុំភ្លេចសន្យាណា
-ឯងជឿជាក់ហើយអ្ហេ ថាឯងប្រឡងជាប់?
-ខ្ញុំប្រាកដជាបានទៅកម្ពុជា!………ម៉ាក់ទៅណាហ្នឹង?
-ម៉ាក់ទៅហាង!
-ម៉ាក់ខ្ញុំចង់និយាយរឿងមួយប្រាប់ម៉ាក់
-ម៉ាក់គ្មានពេលទេ ចាំយប់ទៅ
-ម៉ាក់!…………ម៉ាក់ស្តាប់ខ្ញុំតែមួយនាទីក៏បានដែរ
-និយាយទៅ!
-ម៉ាក់ស្គាល់បងវិសិទ្ធិទេ?
-វិសិទ្ធិ បងប្រុសរបស់បងស្រីឯងហ្នឹងមែនទេ?
-បាទ!
-ម៉ាក់ធ្លាប់ជួបគេបង កាលទៅយកចន្រ្ទាមករស់នៅទីនេះ ម៉េចក៏ឯងស្គាល់គេដែរ?
-គឺបងស្រីឧស្សាហ៍រំលឹកពីគាត់ហ្នឹងណា ម៉ាក់ដឹងទេ ពួកគាត់ស្រលាញ់គ្នាណាម៉ាក់………..មិនមែនបងប្អូនទេ គឺស្នេហា!
-ឯងនិយាយផ្តេសផ្តាសស្អីហ្នឹង?
-ក្រែងម៉ាក់និយាយថាខ្ញុំជាអ្នកជំនាញខាងស្នេហាណា ខ្ញុំគ្រាន់តែប្រាប់ម៉ាក់ឲ្យបានដឹងជាមុនតែប៉ុណ្ណោះ ថាកូនស្រីម៉ាក់មានស្នេហាហើយ
-មើលទៅខួរក្បាលឯង ផ្ទុកទៅដោយស្នេហាហើយ
-ម៉ាក់អ្ហាក! …………..ហេតុអីក៏ម្នាក់ៗមិនជឿខ្ញុំអ៊ីចឹង មួយរយភាគរយគឺស្នេហា ខ្ញុំនឹងបំបែកឯកទត្តកម្មមួយនេះ
តើអាល្អិតនេះប្រុងធ្វើអី? ថ្លែងពីយុវតី បិទភ្នែកកំពុងស្រដីជាមួយព្រះចន្ទ្រាយ៉ាងអណ្តែងអណ្តែងតែម្នាក់ឯង៖”ប្រាំមួយឆ្នាំហើយ ដែលខ្ញុំមានអារម្មណ៍ថា បេះដូងខ្ញុំបាត់បង់ពន្លឺព្រះចន្ទមួយនេះ ពេលនេះ ខ្ញុំអាចមើលព្រះចន្ទស្រូបយកអារម្មណ៍ពីពេលមុនមកវិញ ពិតជាមានក្តីសុខណាស់”។ កំពុងតែអណ្តែងអណ្តូង ស្រាប់តែយុវ-ជនទៅអង្គុយក្បែរនាង។ មាណវីបើកភ្នែកសន្សឹមៗ មើលឃើញវង់ភ័ក្ររបស់យុវជនក៏គិតក្នុងចិត្តថា៖”នៅក្រោមពន្លឺព្រះចន្ទ ផ្ទៃមុខបងគួរឲ្យចង់អង្អែលណាស់”។ គិតហើយនាងលូកដៃបម្រុងប៉ះមុខយុវជន តែត្រូវអ្នកកំលោះចាប់ដៃជាប់៖
-អូនចង់ធ្វើអី?
-ប៉ះមុខបង!
-មិនឲ្យប៉ះទេ ព្រោះធ្វើឲ្យចេញមុន
-តែបងក៏ប៉ះមុខអូនដែរ
-តែពេលនេះមិនឲ្យប៉ះទេ
-តែអូនចង់ប៉ះ
-មិនឲ្យប៉ះ
-តែអូននឹងប៉ះឲ្យបាន ធ្វើឲ្យមុខបងចេញមុនម្តង
-ឯងហ៊ានលេងជាមួយបងផងអ្ហេ
សម្រែកក្អាកក្អាយបន្លឺឡើង ទាំងពីរនាក់ប្រឡែងគ្នាដូចជាកូនក្មេងនៅលើអង្រឹងឈើមួយ តែក៏ស្រាប់តែស្ងៀមឈឹង។ មាណវីត្រូវកម្លាំងយុវជនសង្កត់ផ្អែកនឹងអង្រឹង ឯដៃរបស់នាង ក៏ត្រូវអ្នកកំលោះចាប់ជាប់ កែវភ្នែកទាំងគូកំពុងត្របាញ់ចូលគ្នា។ នេះមិនមែនជាអារម្មណ៍បងប្អូនទេ តើកម្លាំងស្នេហាកំពុងតែសង្កត់ពួកគេមែនទេ? ច្រមុះនិងបបូរមាត់យុវជនកាន់តែខិតជិតហើយ ចន្រ្ទាមិនបម្រាស់ តែបែរជាបិទភ្នែកទៅវិញ។ មិនខុសទេ! នេះគឺជាស្នាមថើប គឺស្នាមថើបដំបូង។ អីយ៉ា! ដូចត្រូវមួយដំបងអ៊ីចឹង តើពួកគេទាំងពីរនឹកឃើញអ្វីមែនទេ ទើបស្ទុះងាកពីគ្នាលឿនយ៉ាងនេះ? យុវជនស្រដីទាំងរដិបរដុប៖
-បង……….បង…សូម…………ទោស……………
-អូនទៅក្នងផ្ទះមុនហើយ
-តើខ្ញុំកំពុងធ្វើអីហ្នឹង?
បេះដូងចាប់ផ្តើមកញ្រ្ជោលហើយ។ យប់នេះ ពិតជាគេងមិនលក់ទេ។ ខេវិនបន្លឺឡើង៖
-អីយ៉ា! ថ្ងៃនេះមានអារម្មណ៍ហើយអ្ហេ ទើប0n lineទាំងពីរនាក់តែម្តង…សួស្តីបងប្រុស! តើបងបានជួបនឹងបងស្រីហើយមែនទេ?
-ម៉េចក៏ឯងដឹង?
-ខ្ញុំចេះតែថាៗទៅ ព្រោះមួយរយ
ៈនេះ មិនឃើញបងon lineសោះ តើខ្ញុំនិយាយ
ត្រូវមែនទេបង?
-ពិតមែនហើយ!
-បងបានថើបនាងហើយមែនទេ?
-ម៉េចក៏ឯងដឹងទៀតហើយ?
-ខ្ញុំប្រាប់ហើយ ថាខ្ញុំជាអ្នកជំនាញស្នេហា ខ្ញុំពិតជាអាចវិភាគអំពីស្ថានភាពរបស់ពួកបង បងនិយាយទៅ ថាជាអារម្មណ៍ស្នេហាឬបងប្អូន? គ្មានបងប្រុសណាទៅថើបបបូរមាត់ប្អូនស្រីពេញវ័យបែបនេះទេមែនទេ? ខ្ញុំពិតជាមានល្ខោនល្អមើលហើយ
-បានន័យថាម៉េច?
-ខានស្អែកនេះ ខ្ញុំទៅកម្ពុជាហើយ
-ឯងប្រឡងជាប់ហើយអ្ហេ?
-ប្រាកដហើយ! បងកុំភ្លេចពីការភ្នាល់របស់ពួកយើងណា
-អាល្អិតអ្ហា៎ នោះមិនយកជាការទេ
-បងចាញ់ខ្ញុំហើយ! ខ្ញុំមិនដឹងទេ ទៅដល់កម្ពុជា ខ្ញុំនឹងទៅរកបង ហើយស្នាក់នៅជាមួយបងទៀតផង ដើម្បីមើលបងថើបបងស្រី ខ្ញុំឈប់ជជែកជាមួយបងហើយ bye bye~!
-ចំមែន!
យុវតីអង្គុយសម្លឹងកុំព្យូទ័ររហូត ស្រាប់តែសំឡេងសារបន្លឺឡើង៖
-បងត្រូវបងប្រុសថើបហើយមែនទេ?
-ឯងនិយាយអី?
-អ្នកជំនាញស្នេហា ថាហើយគឺមិនខុសទេ បងមានអារម្មណ៍យ៉ាងម៉េចដែរ? ពេលដែលខ្ញុំថើបបង និងពេលដែលគាត់ថើបបង មិនដូចគ្នាទេមែនទេ? បងសារភាពចុះចាញ់ទេ?
-មិនចុះចាញ់ទេ!
-គ្រាន់បើ! ខានស្អែកនេះ ខ្ញុំទៅកម្ពុជាហើយ
-ថាម៉េច!
-បងត្រៀមស្នាមថើបជួបខ្ញុំទៅ bye bye~!
-ម្តងនេះ ត្រូវអាល្អិតនេះគំរាមហើយ
នៅទីបំផុត ខេវិន និងអ្នកស្រីស៊ីណា ក៏បានមកដល់កម្ពុជា។ កំលោះតូចបន្លឺ៖
-ម៉ាក់! ខ្ញុំចង់ទៅគេងផ្ទះប៉ាម៉ាក់ចិញ្ចឹមបងស្រី
-ឯងចង់បង្ករឿងអីហ្នឹង?
-ម៉ាក់អ្ហាក! ខ្ញុំទៅការពារបងស្រីតើ ហើយក៏ទៅយកការឲ្យម៉ាក់ដែរ
-យកការស្អី?
-គឺរឿងបងស្រីនិងបងប្រុសហ្នឹងណា
-ពួកយើងត្រូវទៅសណ្ឋាគារសិន ពេលទៅដល់សណ្ឋាគារហើយ ម៉ាក់ត្រូវទៅមើលហាងមួយភ្លែតសិន
-អ៊ីចឹងម៉ាក់យកខ្ញុំទៅដាក់មុខផ្ទះបងស្រីទៅ ណាម៉ាក់ណា ខ្ញុំមិនចង់គេងនៅសណ្ឋាគារទេ ណាម៉ាក់ណា!
-ឯងនេះ!
អ្នកស្រីស៊ីណាក៏នាំកូនប្រុសមកដល់ផ្ទះលោកវិបុត្រ។ គ្រាន់តែក្រលេកឃើញចន្រ្ទា ខេវិនបន្លឺឡើង៖
-បងស្រី!
-ម៉ាក់!
-ស៊ីណា!
-សួស្តីចរិយា! ជម្រាបសួរបង ម៉េចមិនជម្រាបសួរអ៊ំប្រុស អ៊ំស្រីឯងទៅ
-ជម្រាបសួរអ៊ំប្រុសអ៊ំស្រី
-ចាស! នេះជាកូនប្រុសឯងអ្ហេ?
-ចាស!
-អ៊ំប្រុសអ៊ំស្រី តើខ្ញុំអាចស្នាក់នៅទីនេះបានទេ?
-សូមទោសផង វាចេះតែចង់មកទីនេះជួបបងស្រីវា ហើយថាមិនចង់ស្នាក់នៅសណ្ឋាគារ
-មិនអីទេ! ឲ្យគេស្នាក់នៅទីនេះចុះ ចុះនាង?
-ខ្ញុំកក់សណ្ឋាគាររួចហើយបង ពេលនេះ ខ្ញុំត្រូវទៅមើលហាងសិន
-មិនអីទេ! ឯងទៅចុះ
-អ្នកណាកំពុងតែដើរចូលមកនោះបង?……….គឹបងវិសិទ្ធិមែនទេ?
-ត្រូវហើយ!
-ជម្រាបសួរអ្នកមីង!
-ចាស! វិសិទ្ធិមែនទេ
-បាទ!
-ធំដល់ហើយនេះ! មីងត្រូវទៅសិនហើយ បង! ខ្ញុំទៅហើយ ឯងកុំបង្ករឿង ផ្តេសផ្តាស ស្តាប់បានទេ?
-ម៉ាក់កុំបារម្ភអី!……………សួស្តីបងប្រុស!
-ឯងគឹ!
-cute boy!
-ម៉េចក៏ឯងមករកផ្ទះបងឃើញ?
-ពួកបងស្គាល់គ្នាអ្ហេ?
-គេជាមិត្តតាមface bookរបស់បង
-ស្លាប់ហើយ!
-ពួកឯងកំពុងជជែកអីហ្នឹង? វិសិទ្ធិ! នេះគឺប្អូនប្រុសចន្រ្ទា
-ថាម៉េច!
-ចុះកូនកើតអីហ្នឹង?
-គ្មានទេម៉ាក់!
-ក្មួយនៅបន្ទប់ជាមួយបងប្រុសចុះណា ឯងនាំប្អូនឡើងទៅ
-បាទ!
ខេវិនញញឹមដើរតាមវិសិទ្ធិ រហូតទៅដល់បន្ទប់ ទើបបន្លឺ៖
-បងត្រៀមខ្លួនហើយមែនទេ?
-អាល្អិតឯងនេះ! ការពិតឯងស្គាល់បងថាជានរណាមែនទេ?
-ប្រាកដហើយ!
-បងស្មានថា ឯងជាអ្នកជំនាញស្នេហាមែន បោកប្រាស់!
-អូយ! ចង់គេងណាស់
-ឆាប់ទៅងូតទឹកសិនទៅ ត្រូវហើយ! តើឯងមាននិយាយអីជាមួយបងស្រីឯងទេ?
-និយាយច្រើនណាស់ គាត់ថែមទាំងភ្នាល់ជាមួយខ្ញុំទៀតផង
-នេះឯង!
-ខ្ញុំទៅងូតទឹកហើយ
-ចំមែន!
ព្រលឹមឡើងយុវជន និងយុវតីចេញពីបន្ទប់ព្រមគ្នា។ អ្នកទាំងពីរឈរញញឹមស្មើៗដាក់គ្នា តែមិនព្រមនិយាយស្តីឡើយ។ ឃើញដូចនេះ ខេវិនបន្លឺ៖
-ពួកបងមិនអីទេអ្ហេ?
-បងទៅធ្វើការហើយ!
និយាយហើយ វិសិទ្ធិក៏ដើរចេញទៅ។ ខេវិននិយាយទៅកាន់បងស្រី៖
-បងថានាំខ្ញុំដើរលេងណា
-ចាំស្អែកទៅ បងទៅមើលហាងថ្នាំហើយ
វិនីតមានបំណងនាំប្អូនទៅលេងក្បាលស្ពាន។ ឃើញដូចនេះ លោកវិបុត្រក៏សម្រេចក៏ឲ្យកូនប្រុសបើកឡានជូនប្អូនទៅ។ ការពិតណាវី និងវាសនាមានគម្រោងទៅជាមួយដែរ ប៉ុន្តែវាសនាមានការងារបន្ទាន់ត្រូវឡើងទៅភ្នំពេញភ្លាម ណាវីក៏តេទៅចន្រ្ទា៖
-អាឡូ! ឯងមានការអីមែនទេ?
-សូមទោសផងណា ស្អែកនេះ ខ្ញុំមិនបានទៅទេ ព្រោះបងប្រុសរវល់ទៅប្រជុំ
នៅភ្នំពេញឯនោះ
-ម៉េចអ៊ីចឹង!
-ចាំលើកក្រោយចុះណា បើមានឱកាសគ្នានឹងទៅជាមួយឯង
-តែបងវាសនាទៅតែម្នាក់ឯងទេ មែនទេ?
-ត្រូវហើយ!
-អ៊ីចេះទៅ ឯងទៅជាមួយគ្នាទៅ ចាំគ្នាទៅយកឯង
-បានដែរអ្ហេ?
-មានអីថាមិនបាននោះ សម្រេចអ៊ីចឹងចុះណា!
-អ៊ីចឹងក៏បាន!
ព្រលឹមឡើង ឡានទៅដល់ផ្ទះណាវី។ គ្រាន់តែចេញពីក្នុងឡានភ្លាមចន្រ្ទាបន្លឺ៖
-នេះមិត្តភក្តិបង ឈ្មោះណាវី ប្អូនប្រុសគ្នា!
-សួស្តីណាវី
-ស្អីឯង!
យុវតីខោកក្បាលប្អូន រួចបន្លឺសារជាថ្មី៖
-និយាយម្តងទៀត!
-ជម្រាបសួរបង!
-ចាស!…………..
-ពួកយើងឆាប់ឡើងឡានទៅ
ឡានបើកឆ្ពោះតម្រង់ទៅរមណីយដ្ឋានក្បាលស្ពាន។ មិនយូរប៉ុន្មាន ក៏បានទៅដល់គោលដៅ។ មាណវីទាំងពីរទៅឈរចាំនៅជើងភ្នំមុន ចំណែកយុវជនទាំងពីរកំពុងយករបស់ចេញពីក្នុងឡានដូចជាទឹក និងអាហារជាដើម។ ខេវិនបន្លឺ៖
-ខ្ញុំសួរបងតាមត្រង់ បងគិតយ៉ាងម៉េចចំពោះបងស្រីខ្ញុំ?
-ឯងចង់យ៉ាងម៉េចទៀតហើយ?
-បើបងឲ្យខ្ញុំជួយ ខ្ញុំស្ម័គ្រចិត្តជួយ
-មិនចាំបាច់ទេ! បងចេះដោះស្រាយហើយ
-ដោះស្រាយយ៉ាងម៉េច! ខ្ញុំឃើញបងនៅតែស្ងៀមហ្នឹង?
-អាល្អិតឯងនេះ តោះ! ឆាប់ទៅៗ
-ដូចជាមិនល្អមើលសោះ…………….បងមើលងាយអាល្អិតខ្ញុំពេកហើយ
ទៅដល់លើភ្នំ ទិដ្ឋភាពទឹកជ្រោះ ពិតជាស្រស់ថ្លាណាស់។ ខេវិនហាក់មិនចង់ត្រឡប់ទៅផ្ទះឡើយ។ គេមុជទឹកជ្រោះមិនព្រមឡើងទាល់តែសោះ ឃើញដូចនេះ ណាវីក៏បន្លឺទៅកាន់មិត្តរបស់ខ្លួន៖
-ខ្ញុំមើលទៅប្អូនប្រុសឯងដូចជាសប្បាយណាស់
-គេបែបនេះឯង ធំហើយ តែដូចជាកូនក្មេងអ៊ីចឹង
-តែមើលទៅគេដូចជាស្រលាញ់ឯងណាស់
-ពិតមែនអ្ហេ!
-គេរៀនថ្នាក់ទីប៉ុន្មានហើយ?
-ចូលទីដប់ពីរនៅឆ្នាំក្រោយនេះ
-មើលទៅគេ ប្រហែលជារៀនឆ្លាតណាស់ហើយមែនទេ?
-វាយ៉ាប់ជាងខ្ញុំទៅទៀត
-ថាម៉េច!
-វារៀនឌុបថ្នាក់ទីដប់មួយមួយឆ្នាំ ម្តងនេះ បើកុំតែម៉ាក់ ព្រមឲ្យវាមកលេង កម្ពុជា ប្រហែលជាវាមិនខំរៀនទេ
-បង! ពួកបងមិនងូតទឹកទេអ្ហេ?
-គេនិយាយភាសាយើងបានច្បាស់ណាស់
-បា្រកដហើយ! បើមិនច្បាស់គឺម៉ាក់វ៉ៃហើយ
-អូ!
-តែមានប្អូនប្រុសដូចជាគេអ៊ីចឹង ក៏សប្បាយម្យ៉ាងដែរ
-ឯងចង់បានអ្ហេ! បើចង់បានគ្នាឲ្យ
-ឆ្កួតទេអ្ហេ! ចេះនិយាយទៅកើត…..ត្រូវហើយ! តើឯងនិងបងវិសិទ្ធិឈ្លោះគ្នា មែនទេ?
-………អត់ទេ!
-បើអត់ទេ គឺល្អហើយ…………..នែ! ម៉ោងបីហើយណា ពួកយើងល្មមត្រឡប់ទៅហើយអ្ហ៊ៃ?
-ចាំគ្នាទៅហៅខេវិនសិន!………………នែ! ឆាប់ឡើងមកយើងត្រឡប់ទៅវិញ
-ចាំបន្តិចទៀតសិនបង
-ឆាប់ឡើងមក!
-មិនទាន់ឆ្អែតផង!
ខេវិនឡើងពីទឹក ក៏ទៅឈរផ្លាស់សម្លៀកបំពាក់នៅម្ខាង តែមួយសន្ទុះហើយ នៅតែមិនឃើញចេញមកវិញសោះ យុវតីរៀបចំកន្លែងផងបន្លឺផង៖
-បង! យកកន្សែងឲ្យខ្ញុំបន្តិច
-ក្រែងកន្សែងឯងយកទៅហើយអ្ហ៊ៃ?
-ខ្ញុំដាក់នៅលើកាបូបបងឯនោះ ឲ្យលឿនឡើងបង!
-មិនអីទេ ចាំខ្ញុំយកឲ្យគេ
ណាវីកាន់កន្សែងដើរទៅកន្លែងរាងចោតបន្តិច ដែលកំលោះតូចកំពុងឈរ តែយុវជនមិនបានមើលក្រោមថានរណាកំពុងដើរមកនោះឡើយ។ នាយកាន់ទឹកក្រូចមួយកំប៉ុង តែមិនទាន់បានគាស់ផង ក៏របូតធ្លាក់ពីដៃចុះមក។ ណាវីជាន់ត្រូវកំប៉ុងក៏ដួលគ្រឹប ស្រែកបន្លឺឡើង ធ្វើឲ្យខេវិនបើកភ្នែកធំៗ បន្លឺ៖”ម៉េចជាបងទៅវិញ?”។ វិសិទ្ធិនិងចន្រ្ទាស្ទុះរត់ទៅលើកយុវតី៖
-ឯងយ៉ាងម៉េចហើយ? តើឯងធ្វើស្អីហ្នឹង?
-សូមទោស!
ខេវិនស្ទុះរត់ចុះមកយ៉ាងលឿន ហើយនិយាយយ៉ាងញាប់មាត់ទៅកាន់ណាវី៖
-ឲ្យខ្ញុំសូមទោសបង!
-មិនអីទេ!…………អូយ
-ប្រហែលជាគ្រេចហើយ! (វិសិទ្ធិឧទាន)
-មិនអីទេ ខ្ញុំអាចដើរបាន!
ចន្រ្ទាជួយគ្រាណាវីដើរចុះពីលើភ្នំ តែយូរៗទៅ ណាវីមានអារម្មណ៍ថាកាន់តែឈឺខ្លាំងឡើងៗ ហើយទឹកមុខក៏ដូចជាស្លេកស្លាំងដែរ។ ឃើញដូចនេះ ពួកគេក៏ឈប់សម្រាកសិន ចៃដន្យវិសិទ្ធិបានជួបមិត្តចាស់ ក៏ឈរជជែកគ្នាមួយសន្ទុះ។ ចន្រ្ទាស្រដី៖
-ឯងយ៉ាងម៉េចហើយ!
-ឈឺណាស់!
-អ៊ីចេះទៅ! ខេវិន ឯងអៀវនាងទៅ
-ថាម៉េច!
-មិនចាំបាច់ទេ
-ឯងជាអ្នកធ្វើឲ្យនាងរបួស ដូចនេះ ឯងត្រូវតែអៀវនាង
-មិនចាំបាច់ទេចន្រ្ទា
-បានៗ! ខ្ញុំអៀវបង
-មិនចាំបាច់ទេ
-បងឡើងមក!
-មិនចាំបាច់ទេ!
-ខ្ញុំសូមអង្វរបង បើបងមិនឲ្យខ្ញុំអៀវទេ បងស្រីខ្ញុំប្រាកដជាសម្លាប់ខ្ញុំ
ណាវីសម្រេចឲ្យខេវិនអៀវខ្លួន តែមុននឹងឡើងលើខ្នងយុវជន នាងក៏បន្លឺ៖
-ឯណាទឹកចន្រ្ទា?
-ទឹកអ្ហេ!……..វីវរហើយ ភ្លេចនៅខាងលើឯនោះ មិនអីទេ ខ្ញុំឡើងទៅយកវិញ
-មិនចាំបាច់ទេ!
-ឯងចាំត្រង់នេះហើយ
-គម្រោងការខ្ញុំជោកជ័យហើយ
-ឯងនិយាយអី?
-គ្មានទេ!
-ចុះឯណាចន្រ្ទា? (វិសិទ្ធិសួរ)
-នាងទៅ…………….
-គាត់ថាភ្លេចរបស់ ទើបឡើងទៅយកវិញ ពួកខ្ញុំឃាត់ហើយតែគាត់មិនស្តាប់
-អ៊ីចឹងពួកឯងនៅចាំត្រង់នេះហើយណា
-ម៉េចក៏ឯងនិយាយអ៊ីចឹង?
-តោះពួកយើងទៅ!
-ឯងមិនចាំពួកគាត់ទេអ្ហេ?
-មិនចាំបាច់ចាំទេ!
-តែបងចង់ចាំ
-ខ្ញុំថាមិនចាំបាច់ទេ មក!
ខេវិនចាប់អៀវណាវីដើរចុះទៅ តែណាវីនៅតែមិនសុខចិត្ត យុវជនដាក់នាងចុះហើយបន្លឺ៖
-បងយ៉ាងម៉េចហ្នឹង ខ្ញុំអៀវហើយនៅមិនសុខចិត្តទៀតអ្ហេ? ធ្ងន់សឹងស្លាប់
-ដាក់បងត្រង់នេះហើយ! ពួកយើងចាំពួកគេសិនទៅ
-តែមេឃនេះ ធ្លាក់ភ្លៀងឥឡូវហើយ
-ធ្លាក់ភ្លៀង តើវាយ៉ាងម៉េច? ឯងចង់ទៅចោលបងស្រីឯងអ៊ីចឹង?
-បងស្រីខ្ញុំមានបងប្រុសនៅការពារហើយ មិនអីទេ! តោះពួកយើងទៅទៀត
-អូយ! ………….ម៉េចក៏បងខាំដៃខ្ញុំអ៊ីចឹង?
-បងថាឲ្យនៅចាំពួកគេ
-មិនបានទេ! មិនងាយបានឱកាសល្អយ៉ាងនេះទេ ខ្ញុំសូមអង្វរបង ពួកយើងទៅៗ
-ឯងចង់បានន័យថាម៉េច?
-ខ្ញុំប្រាប់បងក៏បាន ការពិតខ្ញុំធ្វើឲ្យកំប៉ុងទឹកក្រូចធ្លាក់ គឺមានចេតនាឲ្យបងខ្ញុំដួល នរណាទៅដឹងថាគឺជាបងនោះ
-ហើយយ៉ាងម៉េចទៀត?
-មែនយ៉ាងម៉េច បើបងខ្ញុំជាអ្នករបួស គឺប្រាកដជាបងវិសិទ្ធិជាអ្នកអៀវគាត់ ប្រហែលមិនមែនខ្ញុំទេ………… ការពិតពួកគាត់គឺស្រលាញ់គ្នា
-ស្រលាញ់គ្នា!
-ស្នេហា មិនមែនបងប្អូនទេ! ខ្ញុំចង់ឲ្យគាត់នៅជាមួយគ្នាតែពីរនាក់ ដើម្បីដោះស្រាយបញ្ហាផ្លូវចិត្តមួយនេះ ខ្ញុំដឹង! ខ្ញុំធ្វើអ៊ីចឹង អ្នកដែលខកចិត្តគឺបងមែនទេ?
-ហេតុអីក៏បងត្រូវខកចិត្ត?
-ព្រោះបងស្រលាញ់បងប្រុសខ្ញុំ
-ឯងកុំនិយាយផ្តាស់!
-ឥឡូវបងយល់ហើយ តើបងទៅទេ?
-ចុះបើពួកគេរកយើងមិនឃើញនោះ
-បងកុំបារម្ភអី គាត់ប្រាកដជាតេរកពួកយើងហើយ………..បងកុំគិតច្រើនពេកមើល…………ឆាប់ឡើងមក!
ខេវិនអៀវណាវីដើរចុះពីលើភ្នំក្រោមដំណក់ភ្លៀងស្រិចៗ។ ការពិតអាល្អិតនេះក៏គួរឲ្យស្រលាញ់ណាស់តើ។ ណាវីបន្លឺ៖
-ពួកយើងសម្រាកសិនទៅអ្ហ៊ៃ?
-មិនអីទេ! ការពិតបងមិនធ្ងន់ណាស់ណាទេ
-ក្រែងឯងថា បងធ្ងន់អ្ហេ!
-ខ្ញុំនិយាយលេងតើ បងត្រជាក់ទេ?
-មិនត្រជាក់ទេ!
-មិនមែនមកពី កំដៅនៅក្នុងខ្លួនខ្ញុំទេ
-ឯងនិយាយស្អី!
យុវវ័យប្រុសស្រីនេះហាក់ដូចជារីករាយណាស់តើ។ ថ្លែងពីវិសិទ្ធិដែលមកដល់លើកំពូលភ្នំវិញ នាយបន្លឺទៅកាន់យុវតីដែលកំពុងឈរកាន់ឆ័ត្រឱនយកដបទឹក៖
-តើអូនភ្លេចរបស់អី?
-ហេតុអីក៏បងនៅទីនេះ?
-បងមកតាមអូនហ្នឹងណា តើអូនភ្លេចរបស់អី?
-គឺអូនមកយកទឹកនេះ
-គ្រាន់តែទឹកអូនឡើងមកលើភ្នំវិញអ៊ីចឹងអ្ហេ? ពួកយើងឆាប់ទៅវិញទៅ ឲ្យឆ័ត្រមកបង………….ប្រយ័ត្នផង!
យុវវ័យទាំងពីរនៅក្រោមដំបូលឆ័ត្រតែមួយ។ ព្រះភិរុណបង្អុរកាន់តែខ្លាំងឡើងៗ ផ្ទៃមេឃប្រែងងឹតស្លុប យុវតីចង់ឈប់មិនចង់ដើរទៅមុខទៀតទេ ព្រោះមានអារម្មណ៍គួរឲ្យខ្លាចណាស់។ ឃើញដូចនេះ យុវជនក៏ចាប់អង្អែលស្មានាងថ្នមៗ ហើយស្រដី៖”កុំខ្លាចអី! ដើរទៅមុខបន្តិចទៀតទៅ”។ ទាំងពីរនាក់ដើររហូតមកដល់ខ្ទមដែលជាកន្លែងដែលណាវី និងខេវិនរង់ចាំ តែពេលមកដល់មិនឃើញពួកគេទាំងពីរ ចន្រ្ទាបន្លឺឡើង៖
-ម៉េចមិនឃើញពួកគេអ៊ីចឹងបង?
-កុំទាន់ភ័យអី! ប្រហែលជាពួកគេចុះទៅមុនហើយ
-អ៊ីចឹងពួកយើងកុំសម្រាកអី
វិសិទ្ធិចាប់ដៃចន្រ្ទាជាប់៖
-អង្គុយមក! ចាំមេឃរាំងបន្តិចចាំយើងទៅ
-ប៉ុន្តែពួកគេ!
-ពេលនេះពួកគេប្រហែលជាចុះទៅដល់ហើយ ពួកគេមិនអីទេ តែសុខភាពអូនមិនល្អទេ អង្គុយទៅ…………អូនត្រជាក់ណាស់មែនទេ!
វិសិទ្ធិទាញក្បាលយុវតីមកដាក់លើទ្រូងខ្លួន។ ទាំងពីរនាក់ប្រែជាស្ងៀមឈឹងមិនស្រដីអ្វីទាំងអស់។ ឯខេវិនកំលោះស្ទើរតែលោះព្រលឹង ព្រោះណាវីស្ងៀមឈឹងមិនដឹងខ្លួនឡើយ។ នាយបន្លឺបណ្តើរ រត់បណ្តើរ៖”បង! បងកុំកើតអីណា បងទ្រាំបន្តិចទៅ”។ កំលោះតូចអៀវនាងរត់រហូតមកដល់ឃ្លីនិកមួយ៖
-លោកគ្រូពេទ្យជួយគាត់ផង!
-នាងកើតអី!
-នាងដួលគ្រេចជើង ហើយមកតាមផ្លូវក៏សន្លប់ទៅ
-ដាក់នាងចុះមក
ណាវីគេងនៅលើគ្រែនៅឡើយ ចំណែកខេវិនគឺនៅក្បែរគ្រែរហូត។ មួយសន្ទុះក្រោយលោកគ្រូពេទ្យក៏ចូលទៅ៖
-តើគាត់យ៉ាងម៉េចហើយលោកគ្រូពេទ្យ?
-អស់អីហើយ! នាងត្រជាក់ពេក ទើបធ្វើឲ្យសន្លប់
-ចុះជើងរបស់គាត់?
-ពីរបីថ្ងៃនេះ មិនទាន់អាចដើរបានទេ នេះថ្នាំ! ពេលដែលនាងភ្ញាក់ ឲ្យនាងលេបទៅ
-បាទ! អរគុណលោកគ្រូពេទ្យ
ងាកមកមើលយុវវ័យមួយគូនៅលើភ្នំវិញ។ នៅក្នុងរង្វង់ដៃយុវជន គឺពិតជាកក់ក្តៅណាស់ មិនចង់បម្រាស់ចេញឡើយ។ វិសិទ្ធិគិតច្បាស់ទើបស្រដីចេញមក៖”ចាប់ពីថ្ងៃអូនចាកចេញទៅនោះ ទើបបងដឹងថាអារម្មណ៍របស់បងចំពោះអូន នោះមិនមែនជាបងប្អូនទេ”។ ចន្រ្ទាបម្រុងងាកចេញពីយុវជន តែនាយបែរជាចាប់ស្មានាងជាប់ ហើយស្រដីត៖
-បងមិនហ៊ាននិយាយការពិត ព្រោះតែខ្លាចដូចជាពេលនេះអ៊ីចឹង អូននឹងគេចចេញពីបង មិននៅក្បែរបង មិនហ៊ានស្និទ្ធស្នាលជាមួយបង
-អ៊ីចឹងហេតុអីបងនិយាយពេលនេះ?
-ព្រោះពេលនេះ បងនឹងមានឱកាសឱបអូនជាចុងក្រោយ ទោះអូនចាត់ទុកបងជាអ្វីក៏ដោយ បងនឹងទទួលយកទាំងអស់
-អរគុណ ដែលបងបំពេញតួនាទីជាបងប្រុសអូនអស់រយៈពេលដប់បីឆ្នាំ អរគុណដែលបងស្រលាញ់អូន ….បេះដូងស្រីល្ងង់ម្នាក់នេះ ម៉េចនឹងអាចគ្មានពន្លឺព្រះចន្ទមួយនេះនោះ
ចន្រ្ទាក្រសោបឱបយុវជនដោយស្នាមញញឹម។ ពួកគេដឹកដៃគ្នាដើរចុះពីលើភ្នំក្រោមដំណក់ភ្លៀងស្រិចៗ។ចំណែកខេវិនអង្គុយក្បែរគ្រែ សម្លឹងមើលមុខណាវី ស្រដីទាំងទឹកមុខស្រពោន៖”សូមទោសផង! ខ្ញុំមិនគួរនាំទុកដល់បងយ៉ាងនេះទេ”។ យុវតីបើកភ្នែកឡើង ឃើញយុវជនយំ ក៏បន្លឺ៖
-ឯងកើតអី?
-បងភ្ញាក់ហើយអ្ហេ!
-អាល្អិតឯងនេះ ចេះយំដែរអ្ហេ!
-សូមទោស!
ណាវីហួសចិត្តណាស់ នាងងើបឡើង ហើយយកដៃទៅជូតទឹកភ្នែកឲ្យយុវជនដោយស្នាមញញឹម។ ភាពទន់ភ្លន់នេះ ហាក់ដូចជាដុតកម្លោចបេះដូងកំលោះតូចនេះ អ៊ីចឹង។ ហេតុអ្វីនាងបែរជាមិនខឹង ហើយនៅលួងលោមគេទៀត? តើអាល្អិតនេះ ប្រុងធ្វើស្អីហ្នឹង? នាយចាប់ដៃណាវីជាប់ ហើយសម្លឹងមុខនាងមិនដាក់ភ្នែក ធ្វើឲ្យមាណវីស្រដីទាំងរដិបរដុប៖”ឯងយ៉ាងម៉េចហ្នឹង?”។ មិនទាន់បានឆ្លើយតបផង វិសិទ្ធិនិងចន្រ្ទាក៏មកដល់។ ណាវីគ្រវាសដៃចេញពីខេវិនយ៉ាងលឿន ទើបតបទៅចន្រ្ទា៖
-ឯងមកហើយអ្ហេ!
-តើមានរឿងអីកើតឡើង?…………ឯងបង្ករឿងទៀតហើយមែនទេ?
-សូមទោសបង!
-បានហើយ! ឯងកុំបន្ទោសគេអី ទោះជាយ៉ាងណា ក៏គេខំអៀវខ្ញុំចុះពីលើភ្នំមកដែរ អស់អីហើយ ចុះឯងនិងបងមិនអីទេអ្ហេ?
-មិនអីទេ!
-ខ្ញុំអស់អីហើយ ពួកយើងត្រឡប់ទៅផ្ទះវិញទៅ
តាំងពីក្បាលស្ពានរហូតមកដល់ផ្ទះ ខេវិនមិននិយាយស្តីដូចកាលដែលជិះទៅឡើយ។ ឃើញសភាពប្អូនខុសពីធម្មតាដូចនេះ ចន្រ្ទាដូចជាបារម្ភណាស់។ ងូតទឹកហើយ នាងក៏ទៅរកប្អូននៅក្នុងបន្ទប់៖
-បងមានការអី?
-ឯងមិនអីទេអ្ហេ?
-គ្មានអីទេ
-ឬមួយខឹងនឹងបង?
-គ្មានទេ!
-ឯងគ្រុនទេដឹង?
-គ្មានទេ! បងកុំបារម្ភអី ពេលនេះខ្ញុំចង់គេងហើយ បងឆាប់ទៅគេងទៅ
-អ៊ីចឹងបងទៅវិញហើយ
ចន្រ្ទាដើរចេញមក ក៏ជួបនឹងវិសិទ្ធិល្មម៖
-អូនមករកខេវិនអ្ហេ?
-ឃើញវាមិននិយាយស្តី អូនបារម្ភពីវា
-ប្រហែលជាហត់នឿយហើយ ស្អែកឡើងប្រហែលជាអស់អីហើយ អូនឆាប់ទៅគេងទៅ
-អ៊ីចឹងអូនទៅហើយ
-កុំបារម្ភអី ចាំបងជួយមើលគេឲ្យ
ចន្រ្ទាចេញផុត វិសិទ្ធិក៏ស្ទុះទៅគេងលើគ្រែក្បែរខេវិន ហើយបន្លឺ៖
-តើអ្នកណាហ៊ានធ្វើឲ្យកំលោះតូចម្នាក់នេះ មិននិយាយស្តី?…….ប្រាប់បងមកមើល តើមានរឿងអី?
-បងនិយាយទៅ ពេលដែលបងមានស្នេហា តើបងមានអារម្មណ៍ដូចម្តេច?
-ឯងជាអ្នកជំនាញស្នេហា គួរតែដឹងច្បាស់ជាងបងហើយមែនទេ?
-បើបងមិនចង់និយាយក៏ហីទៅ
-បានបងនិយាយ! អារម្មណ៍ស្នេហា គឺដូចបេះដូងស្ថិតក្រោមពន្លឺព្រះចន្ទអ៊ីចឹង បើឯងចង់ដឹងច្បាស់ ឯងដាក់បេះដូងឯងឲ្យចំពន្លឺព្រះចន្ទទៅ នោះឯងនឹងយល់កាន់តែច្បាស់ពីអារម្មណ៍ស្នេហាហើយ បងគេងហើយ
-បេះដូងក្រោមពន្លឺព្រះចន្ទអ្ហេ! ការពិតបងនិងបងស្រីសុទ្ធតែមានអារម្មណ៍បែបនេះអ្ហេ? ខ្ញុំនឹងសាកល្បងមើល
អស្ចារ្យណាស់! អួតសុទ្ធតែខ្លួនអ្នកជំនាញស្នេហា តែដល់វេនខ្លួនឯង បែរជាល្ងង់មួយរំពេច។ ឱ!កំលោះតូចអើយ ពេលនេះពិតជាមកអង្គុយក្រោមពន្លឺព្រះចន្ទមែន មើលចុះ! ស្នាមញញឹមកំពុងលេចចេញនៅលើផ្ទៃមុខគេហើយតើ។ អូហូ! រឿងរ៉ាវទាំងឡាយដែលកើតមានឡើងកាលពីថ្ងៃ បានខារសារឡើងវិញហើយ។ បេះដូងក្រោមពន្លឺព្រះចន្ទ! គឺអារម្មណ៍នេះហើយ រំភើប កក់ក្តៅ និងមានក្តីសុខណាស់។ មិនខុសទេ វាគឺអារម្មណ៍ស្នេហា ស្នេហាយ៉ាងពិតប្រាកដ។
នៅទីបំផុតមិនត្រឹមតែវិសិទ្ធិទេ សូម្បីតែខេវិនកំលោះតូចនេះ ក៏ដឹងពីអារម្មណ៍របស់ខ្លួនដែរ។ ជាការពិតណាស់ គេមានសង្សារច្រើនរាប់មិនអស់ ប៉ុន្តែមិនដែលស្មោះមួយណាឡើយ ហើយក៏ពុំដែលធ្វើឲ្យគេមានអារម្មណ៍ខ្វាយខ្វល់ ឬគិតច្រើនដូចជាពេលនេះដែរ។ ចន្រ្ទាសង្គេតប្អូនពីរថ្ងៃហើយ សព្វដងយុវជននេះរំអុកនាងឲ្យនាំដើរលេងមិនឈប់ តែពេលនេះ មិនដូចមុនឡើយ គេសុខចិត្តទៅជួយមើលហាងម៉ាក់ ឬក៏ទៅចាំហាងឲ្យវិសិទ្ធិ ហើយពេលត្រឡប់មកដល់ផ្ទះ ក៏ចូលទៅក្នុងបន្ទប់បាត់។ យុវតីទាញដៃយុវជនចេញមក ទើបស្រដី៖
-បងនិយាយទៅ ថាខេវិនមានរឿងអី?
-បងមិនប្រាកដទេ
-មិនប្រាកដបានន័យថាបងដឹងខ្លះមែនទេ? បងនិយាយទៅ!
-ប្រហែលជាមានស្នេហាហើយ តែជានរណានោះ បងមិនដឹងទេ
-ថាម៉េច! …………ម៉េចនឹងអាចទៅ………ប៉ុន្តែវាប្លែកបែបនេះ គឺចាប់តាំងពីថ្ងៃ
ដែលមកពីក្បាលស្ពានវិញ បងថាមានស្នេហា………..
-ឬមួយ!
-វាស្រលាញ់ណាវីទេដឹង? មិនបានទេ អូនចូលទៅសួរវា
-នែ!
ចន្រ្ទាចូលទៅដល់ក្នុងបន្ទប់ ក៏ទៅអង្គុយលើគ្រែក្បែរប្អូនប្រុសដែលបង្ហប់ភួយជិតឈឹង។ ទោះយុវតីនិយាយអី ក៏នាយមិនតប។ ចន្រ្ទានឹកឃើញល្បិចមួយក៏បន្លឺ៖
-ត្រូវហើយ! ឯងនៅចាំណាវីមិត្តភក្តិបងដែលទៅលេងក្បាលស្ពានជាមួយយើងទេ? នាងជិតរៀបការហើយ
-បងថាម៉េច?
-យ៉ាងម៉េច! ក្រែងឯងមិនចង់និយាយជាមួយបងទេអ្ហេ បងទៅវិញហើយ
-បងនិយាយទៅ ថានរណាជិតរៀបការ?
-គឺបងស្រីដែលឯងអៀវចុះពីលើភ្នំហ្នឹងណា ឮថាកូនកំលោះជាអនិកជននៅប្រទេសបារាំង ថែមទាំងជាអ្នកមានស្តុកស្តម្ភទៀតផង
-មិនពិតទេ! បងឮមកពីណា?
-បងនិយាយទូរស័ព្ទជាមួយនាងអម្បាញ់មិញនេះឯង និយាយចប់ភ្លាម ក៏ចូលមករកឯងហ្នឹងណា មើលទៅឯងដូចជាចាប់អារម្មណ៍ណាស់ហ្ន៎
-គ្មានទេ!
-តើប៉ុន្មានថ្ងៃនេះ ឯងមានរឿងអី? ម៉េចមិននិយាយស្តីដូចមុនអ៊ីចឹង?
-ក្រែងបងមិនចង់ឲ្យខ្ញុំនិយាយអ្ហេ! បងនិយាយទៅមើល តើបងណាវីរៀនមហាវិទ្យាល័យឆ្នាំទីប៉ុន្មានហើយ?
-ឯងនិយាយប្រាប់បងតាមត្រង់មក ឯងចង់លេងសើចជាមួយណាវីអ្ហេ?
-អត់ទេ!
-ទីនេះកម្ពុជាណា ហើយម្យ៉ាងទៀតណាវីជាមិត្តភក្តិបង បងមិនអនុញ្ញាតឲ្យឯងទៅលេងសើចជាមួយនាងទេ បើហ៊ានធ្វើផ្តេសផ្តាស បងមិនលើកលែងឲ្យឯងទេ ស្តាប់បានទេ!
-បងការពារមិត្តភក្តិជាងប្អូនប្រុសទៅទៀត
-តែបងដឹងចរិតប្អូនរបស់បងច្បាស់ណាស់
-បានហើយ! បងកុំបារម្ភពីរឿងខ្ញុំអី ចុះរឿងរបស់បងនោះ? ស្អែកនេះ ម៉ាក់មកទីនេះហើយ ពួកបងគួរតែនិយាយប្រាប់គាត់ទៅ ហើយកុំភ្លេចថា បងចាញ់ខ្ញុំហើយ
-ខួរក្បាលឯងចងចាំបានល្អណាស់ហ្ន៎
-បើកុំតែជួយបង ម្ល៉េះខ្ញុំមិនក្លាយជា………………..
-ក្លាយជាអី! ឆាប់និយាយទៅ
-គ្មានទេ! បងឆាប់ចេញទៅវិញទៅ ខ្ញុំគេងហើយ
-អ៊ីចឹងបងទៅហើយ………….ធ្វើចរិតប្លែកៗ
ត្រឹមត្រូវណាស់ បើកុំតែជួយបង ម្ល៉េះកំលោះតូចនេះ មិនក្លាយទៅជាមនុស្សមានជម្ងឺស្នេហាបែបនេះទេ។ ពេលដែលបានដំណឹងថា ណាវីជិតរៀបការ យុវជនតូចនេះ ក៏ទៅដល់ផ្ទះយុវតីភ្លាម៖
-ឯងមកផ្ទះបងមានការអី?
-បងមិនហៅខ្ញុំចូលលេងសិនទេអ្ហេ?
-ចូលមកអ៊ីចឹង! អង្គុយសិនទៅ បងទៅយកទឹកមកឲ្យញ៉ាំ……….មានការអីមែនទេ? ឬចន្រ្ទាឲ្យឯងមក?
-តើខ្ញុំគួរចាប់ផ្តើមពីត្រង់ណា?…………………
-ឯងយ៉ាងម៉េចហ្នឹង?
-ត្រូវហើយ! បងស្រីខ្ញុំ ឮថាបងជិតរៀបការ ទើបឲ្យមកសួរបងថា តើបងរៀបការថ្ងៃណាឲ្យប្រាកដ ព្រោះអីគាត់ជិតត្រឡប់ទៅវិញហើយ
-ស្អីគេ! គេឮមកពីណាថា បងជិតរៀបការនោះ?
-អ៊ីចឹងមិនមែនទេ មែនទេ?
-អត់ទេ! បងមិនមែនជិតរៀបការឯណា ប្រាប់គេទៅ ថាមិនមែនទេ
-ប្រសើរណាស់អ៊ីចឹង
-ឯងមិនអីទេអ្ហេ?
-គ្មានអីទេ! ខ្ញុំត្រឡប់ទៅវិញហើយបង
-ថ្ងៃក្រោយ មានរឿងអី ឲ្យបងឯងតេមកបងមក មិនចាំបាច់រំខានឯងឲ្យមកដល់ផ្ទះបងយ៉ាងនេះទេ
-មិនអីទេបង!
ខេវិនត្រឡប់ទៅផ្ទះវិញដោយក្តីរីករាយ។ នាយដើរបណ្តើរហួចបណ្តើរ ស្រាប់តែទុចង៉ក់នៅពេលគ្រួសារកំពុងតែជួបជុំគ្នា។ គ្មាននរណានិយាយស្តីអ្វីសោះ ប្រហែលជាហួសចិត្ត ឬក៏គិតស្មានមិនដល់។ អ្នកស្រីចរិយាបន្លឺ៖
-ឯងប្រាប់ម៉ាក់តាមត្រង់មក ពួកឯងនៅជាមួយគ្នាហើយមែនទេ?
-អត់ទេម៉ាក់! (វិសិទ្ធិ និងចន្រ្ទាបន្លឺព្រមគ្នា)
-បើអត់ប្រសើរហើយ! ពួកឯងចេញទៅសិនទៅ
-ម៉ាក់!
-ម៉ាក់ថាឲ្យចេញទៅ
វិសិទ្ធិ និងចន្រ្ទាដើរចេញមកក្រៅ ក៏ជួបនឹងខេវិនដែលកំពុងឈរស្តាប់៖
-ពួកគាត់មិនយល់ព្រមទេអ្ហេ?
-មើលទៅម៉ាក់ មិនសប្បាយចិត្តទេ
-ចាំខ្ញុំជួយនិយាយឲ្យបង
-មិនបានទេ! ឯងនៅត្រង់នេះហើយ
ឃើញសភាពអ្នកស្រីចរិយាហាក់មិនសប្បាយចិត្ត អ្នកស្រីស៊ីណាក៏បន្លឺឡើង៖
-ការពិតម្តងនេះ ខ្ញុំគិតថា នាំកូនមករស់នៅស្រុកខ្មែរវិញ មិននឹកស្មានថា មានរឿងបែបនេះកើតឡើងទេ ឯងកុំបារម្ភអី ខ្ញុំនឹងនាំចន្រ្ទាទៅវិញ មិនឲ្យនាងជួប វិសិទ្ធិទៀតឡើយ
-ឯងនិយាយទៅ តើឯងពេញចិត្តឲ្យពួកគេរៀបការទេ?
-ថាម៉េច!
-គ្មានមូលហេតុអ្វី ដែលត្រូវបំបែកពួកគេទេ ការពិតពួកគេទាំងពីរមិនមែនជាបងប្អូនបង្កើតឯណា សូម្បីតែសាច់ឈាមបន្តិចក៏មិនជាប់ពាក់ព័ន្ធនឹងគ្នាផង រឿងអីដែលថារៀបការមិនបាននោះ?
អ្នកស្រីចរិយា និងអ្នកស្រីស៊ីណាសម្លឹងមើលលោកវិបុត្រទាំងអស់គ្នា៖
-បងនិយាយខុសអ្ហេ?
-មិនខុសទេ!
-អ៊ីចឹងមានរឿងអីត្រូវគិតច្រើន? មនុស្សដែលយើងស្រលាញ់ ទីបំផុតគឺនៅតែ នៅក្បែរយើងដដែល
ចម្លើយគឺចេញហើយ។ទាំងអស់គ្នាសម្រួលអារម្មណ៍ ក៏ជជែកគ្នាយ៉ាងរីករាយ៖
-ឯងថាមកនៅស្រុកវិញអ្ហេ?
-ត្រូវហើយ! ខ្ញុំទិញផ្ទះរួចហើយ នៅមិនឆ្ងាយពីហាងរបស់ខ្ញុំប៉ុន្មានទេ ការពិតខ្ញុំគិតយូរហើយ ខ្ញុំដឹងថា ចន្រ្ទាមិនទម្លាប់នៅស្រុកគេទេ ដូចនេះ ខ្ញុំចង់ឲ្យនាងមករៀនទីនេះវិញ ចំណែកខេវិន ខ្ញុំឲ្យគេទៅវិញ ពេលដែលគេរៀនចប់មហា-វិទ្យាល័យហើយ គេចង់មកនៅទីនេះក៏បាន
-ម៉ាក់និយាយអីហ្នឹង? ម៉ាក់បញ្ជូនខ្ញុំទៅវិញ ហើយទុកបងស្រីនៅទីនេះអ៊ីចឹង ខ្ញុំមិនសុខចិត្តទេ ខ្ញុំក៏ចង់នៅទីនេះដែរ
-មិនបានទេ! ពីរថ្ងៃទៀតឯងត្រូវត្រឡប់ទៅវិញហើយ
-ម៉ាក់!
-ម៉ាក់មានការនិយាយជាមួយអ៊ំឯង
-ហ៊ីស!
-ម៉េចឯងមិនឲ្យគេនៅរៀននៅទីនេះទៅ?
-មិនបានទេ! ខ្ញុំចង់ឲ្យគេ នៅជិតសាច់ញាតិរបស់គេសិន ដល់ពេលគេពេញ- វ័យហើយ នោះជាជម្រើសរបស់គេ គេចង់រស់នៅទីណាក៏បាន
-ខានស្អែកឯងទៅវិញហើយអ្ហេ!
-ចាស! ខ្ញុំនាំខេវិនទៅ រៀបចំទុកដាក់ឲ្យគេហើយ ខ្ញុំនឹងត្រឡប់មកវិញ ចំណែក
ចន្រ្ទា គឺខ្ញុំផ្ញើនាងនឹងពួកបងទៀតហើយ
-មិនអីទេ!
-ចុះរឿងមង្គលការនោះ?
-ចាំឯងត្រឡប់មកវិញ ចាំយើងនិយាយគ្នា
បេះដូង ដែលមិនបានទទួលពន្លឺព្រះចន្ទ ពិតជាងងឹតហើយ ហើយពន្លឺព្រះចន្ទ ដែលគ្មានបេះដូងទទួលយកប្រាកដជាងងឹតដូចគ្នា។ ដូចនេះ រវាងបេះដូង និងពន្លឺព្រះចន្ទត្រូវតែនៅជាមួយគ្នា ដូចជាវិសិទ្ធិនិងចន្រ្ទាជាដើម។ ចុះកំលោះតូចខេវិន? ពេលនេះកំពុងតែបាត់បេះដូង ឬក៏ពន្លឺព្រះចន្ទ? ពេលវេលាតែពីរថ្ងៃប៉ុណ្ណោះ តើយុវ-ជនអាចស្វែងរកពន្លឺព្រះចន្ទមកបំភ្លឺបេះដូងបានទេ? តែមើលទៅគេដូចជាប្រឹងប្រែងណាស់។ ពេលចេញពីធ្វើការ ណាវីតែងតែជួបខេវិន ពេលចេញពីរៀន ក៏នាងបានជួបនឹងខេវិន និយាយរួមស្ទើរគ្រប់ពេល ដែលកំលោះតូចនេះ ដើរតាមនាង ធ្វើឲ្យនាងមានអារម្មណ៍ថា ធុញទ្រាន់ណាស់ ក៏បន្លឺឡើង៖
-ឯងឈប់ដើរតាមខ្ញុំទៅបានទេ?
-បងមិនសួរមូលហេតុដែលខ្ញុំដើរតាមបងទេអ្ហេ?
-ឯងនិយាយទៅ ហេតុអីក៏ឯងតាមខ្ញុំ?
-ស្អែកនេះ ខ្ញុំត្រឡប់ទៅវិញហើយ
-មានអីទាក់ទងស្អីនឹងខ្ញុំ?
-បងជាមិត្តភក្តិទីមួយរបស់ខ្ញុំនៅកម្ពុជា ខ្ញុំប្រាកដជានឹកបង បងមិននឹកខ្ញុំទេអ្ហេ
យ៉ាងណាក៏ខ្ញុំធ្លាប់អៀវបងចុះពីលើភ្នំដែរ
-បាន! បងប្រាកដជានឹកឯង សូមឲ្យឯងត្រឡប់ទៅវិញដោយសុវត្ថិភាព ពេញចិត្តហើយនៅ? ឈប់តាមបងទៀតទៅ
និយាយហើយ ណាវីដើរចេញទៅ តែខេវិននៅតែតាមនាងដដែល៖
-ឯងចង់យ៉ាងម៉េចហ្នឹង?…………ខ្ញុំតេទៅចន្រ្ទាឲ្យមកយកឯងទៅវិញ
-កុំអី!
-នែ! ឲ្យទូរស័ព្ទមកបងវិញ
-ខ្ញុំសួរបង នៅថ្ងៃនោះ ហេតុអីក៏បងយកដៃមកប៉ះមុខខ្ញុំ?
-ប៉ះមុខឯង!…………អូ!……បងឃើញឯងយំ គ្រាន់តែជូតទឹកភ្នែកឲ្យឯងតើ
-គ្រាន់តែជូតទឹកភ្នែកទេអ្ហេ?
-ឯងយ៉ាងម៉េចហ្នឹង?
-បងមិនបានស្រលាញ់ខ្ញុំទេអ្ហេ?
-ថាម៉េច!…………ឯងកុំលេងសើចណា បងធ្វើម៉េចនឹងស្រលាញ់ឯងនោះ
-បើបងមិនស្រលាញ់ខ្ញុំ ហេតុអីក៏ប៉ះមុខខ្ញុំ? បងដឹងទេ ខ្ញុំមានសង្សាររាប់មិនអស់ តែពួកនាងទាំងអស់នោះ មិនដែលហ៊ានប៉ះមុខខ្ញុំទេ
-ហេតុអី?
-មានតែមនុស្សម្នាក់គត់ ដែលអាចប៉ះបាន លុះត្រាតែមនុស្សស្រីម្នាក់នោះ ជាមនុស្សដែលខ្ញុំស្រលាញ់
-អ៊ីចឹងទេអ្ហេ! ឲ្យបងសូមទោសផង តើឲ្យបងធ្វើយ៉ាងម៉េច?
-បងឲ្យខ្ញុំប៉ះមុខបងវិញមក
-ធ្វើអ៊ីចឹងគឺរួចគ្នាមែនទេ? តើអាចធ្វើអ្វីផ្សេងបានទេ ដូចជាបងប៉ាវឯងញ៉ាំអីក៏បាន?
-មិនបានទេ!
-អ្ហឺយ! ឯងសន្យាណា ពេលដែលប៉ះមុខបងរួចហើយ ពួកយើងរួចគ្នា ឈប់តាមបងទៀត ស្តាប់បានទេ?
-បងបិទភ្នែកទៅ!
-ហេតុអីចាំបាច់បិទភ្នែក?
-បងមិនខ្មាសខ្ញុំទេអ្ហេ?
-អាល្អិតឯងនេះ!
ណាវីសម្រចចិត្តបិទភ្នែក ហើយនៅស្ងៀមឲ្យយុវជនស្ទាបមុខរបស់ខ្លួន។ កែវភ្នែកស្រទន់ សាច់មុខម៉ដ្ឋខៃ មិនចង់ដកដៃទាល់តែសោះ។ យុវតីបើកភ្នែកឡើង បម្រុងនឹងស្រដី តែមិនអាចនិយាយបាន។ នាងបើកភ្នែកធំៗ ច្រានយុវជនចេញពីខ្លួន ចំណែកដៃម្ខាងខ្ទប់មាត់ជាប់៖
-ឯងធ្វើអីហ្នឹង?
-គឺថើបហ្នឹងណា!
-ឯងឆ្កួតទេអ្ហេ!
-ខ្ញុំប្រាប់ហើយ មនុស្សស្រីដែលប៉ះមុខខ្ញុំ គឺជាមនុស្សស្រីដែលខ្ញុំស្រលាញ់ តើបងយល់ទេ?
-ឯងស្រលាញ់ខ្ញុំ!
-ម៉េចក៏ខួរក្បាលបងអន់យ៉ាងនេះ!
-តែខ្ញុំមិនបានស្រលាញ់ឯងទេ
-តើបងអាចបំភ្លេចស្នាមថើបដំបូងនេះបានទេ?
-នរណាថា នេះជាស្នាមថើបដំបូងនោះ ឯងឈប់មកតាមខ្ញុំទៀតណា
ខេវិនត្រឡប់មកដល់ផ្ទះវិញដោយសប្បាយចិត្ត តែមិនទាន់ទៅបន្ទប់ភ្លាមទេ នាយចូលទៅបន្ទប់បងស្រីសិន៖
-មានការអីអ្ហេទើបមករកបងដល់បន្ទប់?
-ខ្ញុំចង់ប្រាប់បង បងមិនបាច់បារម្ភពីខ្ញុំទេ ពេលនេះ ខ្ញុំធំហើយ ខ្ញុំនឹងរៀនឲ្យជាប់ ហើយប្រឡងចូលមហាវិទ្យាល័យឲ្យបាន ពេលរៀនចប់ ខ្ញុំនឹងត្រឡប់មក
រស់នៅកម្ពុជាវិញ រកការងារធ្វើនៅទីនេះ ហើយក៏យកប្រពន្ធនៅទីនេះដែរ
-ឯងមិនអីទេអ្ហេ?
-តើខ្ញុំមិនសមនឹងនិយាយពាក្យនេះទេអ្ហេ?
-គឺសមណាស់! ឯងប្រាប់បងតាមត្រង់មកមើល តើអ្វីដែលអាចធ្វើឲ្យឯងមានការតាំងចិត្តបែបនេះ?
-បើខ្ញុំនិយាយ បងសន្យាទៅ ថាបងត្រូវតែជួយខ្ញុំ
-បាន!
-មុនពេលខ្ញុំត្រឡប់មកវិញ បងត្រូវមើលថែបងណាវីឲ្យខ្ញុំ មិនឲ្យគាត់រៀបការចោលខ្ញុំទេ
-ថាម៉េច! ឯងពិតជាស្រលាញ់ណាវីមែនអ្ហេ?
-ថ្វីត្បិតតែគាត់បដិសេធខ្ញុំ តែខ្ញុំថើបគាត់រួចហើយ ខ្ញុំជឿថា គាត់មិនបំភ្លេចខ្ញុំងាយនោះទេ បងសន្យាហើយណា ខ្ញុំទៅវិញហើយ!
-វាធ្វើមែនទែនអ្ហេ!
ចន្រ្ទាដឹងរឿងហើយ ដូចជាមិនស្រួលចិត្តសោះ នាងក៏ផ្ញើសារហៅវិសិទ្ធិចេញមកក្រៅបន្ទប់៖
-អូនមានរឿងអី?
-វីវរហើយ! អាល្អិតនោះ វាស្រលាញ់ណាវីពិតមែន
-វាប្រាប់អូនអ្ហេ?
-ចាស! វាថានឹងខំរៀនឲ្យចប់ ហើយត្រឡប់មកវិញ ហើយថែមទាំងឲ្យអូនមើលថែមិនឲ្យណាវីរៀបការទៀតផង
-ប្រសើរហើយអ៊ីចឹង
-បងនិយាយអី?
-ក្រែងអូនចង់ឲ្យខេវិនយកចិត្តទុកដាក់រៀនសូត្រ ឥឡូវគេសុខចិត្តបោះបង់ការដើរលេង ញ៉ែស្រី ហើយងាកទៅខំរៀនវិញ បើមិនមែនជារឿងល្អ អូនថាវាជារឿងអាក្រក់អ្ហេ?
-ប៉ុន្តែអូនមើលទៅណាវីមិនបានស្រលាញ់វាទេ បើនាងរៀបការចោលវានោះ តើលទ្ធផលនឹងទៅជាយ៉ាងណាទៅ? រយៈពេលប្រាំឆ្នាំគឺយូរណាស់
-តែទោះជាយ៉ាងណា គេបានតាំងចិត្តរួចទៅហើយ
-តើឲ្យអូនធ្វើយ៉ាងម៉េច?
-ចម្លើយគឺនៅលើណាវីហើយ
ជិតចេញដំណើរហើយ តែមិនឃើញខេវិនទាល់តែសោះ។ ការពិតនាយបង្ហាញមុខយ៉ាងស្រស់នៅចំពោះមុខណាវី៖
-ក្រែងឯងត្រូវចេញដំណើរហើយអ្ហេ! ហេតុអីក៏មកដល់ផ្ទះបងអ៊ីចឹង?
-ខ្ញុំមកលាបង! បងមិនហៅខ្ញុំចូលក្នុងទេអ្ហេ?
-មិនហៅទេ!
-យ៉ាងម៉េចបងខ្លាចខ្ញុំថើបបងទៀតអ្ហេ?
-ឯងឈប់រំលឹកទៅបានទេ បងមិននិយាយជាមួយឯងទៀតទេ
-ខ្ញុំត្រូវត្រឡប់ទៅវិញហើយ ហេតុអីក៏បងដាច់ចិត្តម្ល៉េះ?
-តើឯងចង់យ៉ាងម៉េច?
-ខ្ញុំដឹងថាបងមិនដាច់ចិត្តនោះទេ បងនៅចាំខ្ញុំណា ខ្ញុំនឹងត្រឡប់មកវិញ
-អាល្អិតអ្ហា៎! ខ្ញុំមានរឿងអីត្រូវចាំឯងត្រឡប់មកវិញនោះ?
-ខ្ញុំមិនដឹងទេ ជីវិតខ្ញុំគឺនៅក្នុងដៃបងហើយ បើបងហ៊ានរៀបការចោលខ្ញុំ បានន័យថាបងបំផ្លាញជីវិតមនុស្សម្នាក់ ពេលនោះ ទោះជាខ្ញុំក្លាយជាខ្មោច ក៏ខ្ញុំតាមបងដែរ
-នែ!
-ខ្ញុំដឹង ថាបងនឹងរង់ចាំខ្ញុំ បងមិនបំភ្លេចស្នាមថើបដំបូងនោះទេ ប្រាំឆ្នាំក្រោយខ្ញុំនឹងត្រឡប់មកវិញ ខ្ញុំស្រលាញ់បង
ខេវិននិយាយហើយ រត់ចេញទៅ។ តើស្រីពៅណាវី នាងគិតដូចម្តេច? ការពិតនាងពិតនឹកឃើញស្នាមថើបដំបូងនោះមែន។ ចុះបើនាងរៀបការចោលគេ តើនឹងមានរឿងអ្វីកើតឡើងចំពោះកំលោះតូចនេះ?
ពីរឆ្នាំក្រោយមក
ពិធីរៀបអាពាហ៍ពិពាហ៍សម្រាប់គូស្រករថ្មីមួយបានកើតឡើង។ ស្ថិតក្នុង សម្លៀកបំពាក់កូនក្រមុំ ចន្រ្ទាឈរញញឹមនៅមុខកញ្ចក់ ឃើញដូចនោះ ណាវីក៏បន្លឺឡើង៖
-សប្បាយចិត្តណាស់ តើមែនទេ?
-អ៊ឺ! ………………ខ្ញុំចង់សួរឯងរឿងមួយតើបានទេ?
-ថ្ងៃនេះជាថ្ងៃសប្បាយរីករាយ ឯងកុំធ្វើមុខអ៊ីចឹងបានទេ ចង់សួរអីសួរមក
-ឯងពិតជាសម្រេចចិត្តចាំខេវិនមែនអ្ហេ?
-ឯងខ្លាចខ្ញុំរៀបការចោលគេអ្ហេ គេគំរាមខ្ញុំរួចហើយ បើខ្ញុំរៀបការចោលគេ គេមិនលើកលែងឲ្យខ្ញុំទេ ឯងកុំបារម្ភអី ទោះមានរឿងអ្វីកើតឡើងក៏ដោយ ខ្ញុំមិនរៀបការមុនគេទេ
-អរគុណឯងហើយ
-នរណាឲ្យខ្ញុំស្គាល់គេនោះ ចំណាយពេលប្រាំឆ្នាំដើម្បីជួយក្មេងប្រុសម្នាក់ ឯងមិនគិតថា ខ្ញុំបានធ្វើរឿងដ៏អស្ចារ្យទេអ្ហេ?
-ពិតមែនហើយ! ឯងអស្ចារ្យណាស់
-ត្រូវហើយ! ថ្ងៃនេះជាថ្ងៃសំខាន់យ៉ាងនេះ ហេតុអីក៏គេមិនមកអ៊ីចឹង?
-គឺជាប់ប្រឡងហ្នឹងណា ឯងនឹកវាអ្ហេ?
-នឹកតិចៗដែរ
-ស្អែកនេះ គេមកដល់ហើយ
ពិធីរៀបអាពាហ៍ពិពាហ៍បានកន្លងផុតទៅ។ គូស្វាមីភរិយាថ្មីរស់នៅជាមួយគ្នាដោយសុភមង្គល។ បីឆ្នាំក្រោយមក យុវជនកំលោះស្រស់សង្ហារ មានពាក់វ៉ែនតាខ្មៅ កំពុងចុះពីលើយន្តហោះ តម្រង់ឆ្ពោះទៅរកក្រុមគ្រួសារដែលកំពុងឈរទទួលដោយក្តីនឹករលឹក។ សមាជិកគ្រួសារមកគ្រប់គ្នាអស់ហើយ តែបាត់ម្នាក់គឺណាវី។ ការពិតណាវីគេងឈឺនៅក្នុងផ្ទះទេតើ។ នាងតប់ប្រមល់ និងធុញថប់ណាស់។ អ្នកមីងនៅជាមួយម្នាក់បន្លឺ៖
-អ្នកនាងហូបបបរសិនទៅ!
-មីងទុកត្រង់ហ្នឹងហើយ ខ្ញុំមិនទាន់ឃ្លានទេ
អ្នកមីងទុកហើយ ក៏ដើរចេញទៅ មួយសន្ទុះក្រោយក៏ស្រាប់តែត្រឡប់មកវិញ៖
-អ្នកនាង………..
-បន្តិចទៀតខ្ញុំញ៉ាំហើយ មីងត្រឡប់ទៅវិញទៅ
យុវជនកំលោះដើរទៅអង្គុយចុងគ្រែយុវតី រួចបន្លឺ៖
-ធំហើយ នៅធ្វើដូចកូនក្មេងទៀត
-សំឡេងអ្នកណា?
យុវតីបើកភួយ ស្ទុះងើបអង្គុយ។ វាមិនគួរឲ្យជឿទេ នាងនៅតែមិននិយាយស្តី៖
-បងមើលខ្ញុំមិនស្គាល់ទេអ្ហេ?
-អាល្អិតឯងនេះ មកវិញហើយអ្ហេ!
-ខ្ញុំធំជាងបងណា បើបងមិនឱបខ្ញុំ ទុកឲ្យខ្ញុំជាអ្នកឱបបង
យុវជនឱបណាវីជាប់ សំណាងហើយ ដែលនាងឆាប់បម្រាស់ចេញ៖
-ប៉ា ម៉ាក់!
-ជម្រាបសួរលោកពូអ្នកមីង
-លើកដៃថ្វាយព្រះ
-ក្មួយមកយូរហើយអ្ហេ?
-បាទ! មួយសន្ទុះហើយលោកពូ
-អង្គុយលេងសិនទៅ ពូមីងទៅផ្លាស់សម្លៀកបំពាក់សិន
-បាទ!
ការពិតស្នេហា ពិតជាមានឥទ្ធិពលខ្លាំងណាស់។ ឆាកជីវិតគឺបែបនេះឯង។ មើលចុះ ព្រះចន្ទពេញបូរមីមូលក្រឡង់ គួរឲ្យចង់នែបនិត្យណាស់។ ហេតុអីក៏គ្រួសារមួយនេះ ចូលចិត្តមើលព្រះចន្ទម្ល៉េះ?
-ប៉ា! កាលពីតូច ប៉ាចូលចិត្តមើលព្រះចន្ទណាស់មែនទេ?
-ត្រូវហើយ! ប៉ាចូលចិត្តមើលព្រះចន្ទណាស់ កូនឃើញទេ សូម្បីតែហាងថ្នាំរបស់ប៉ា ក៏មានឈ្មោះថា ពន្លឺព្រះចន្ទដែរ
-ចុះម៉ាក់វិញ?
-ម៉ាក់ដូចគ្នា!
-ហេតុអីក៏ប៉ានិងម៉ាក់ចូលចិត្តមើលព្រះចន្ទ?
-អ៊ីចឹងប៉ាសួរកូន តើកូនចូលចិត្តមើលព្រះចន្ទឬអត់?
-អូនចូលចិត្ត
-ហេតុអីក៏កូនចូលចិត្ត?
-ព្រោះពន្លឺព្រះចន្ទស្អាតណាស់ ពេលដែលអូនមើលហើយ អូនមានអារម្មណ៍ថា កក់ក្តៅ ដូចជាប៉ាម៉ាក់នៅក្បែរអូនអ៊ីចឹង
-ត្រូវហើយ! ប៉ាដូចគ្នា ពេលប៉ាឃើញពន្លឺព្រះចន្ទ ប៉ាតែងតែនឹកដល់ម៉ាក់កូន ហើយនិងកូន ដូចនេះ ទោះបីជាពេលខ្លះ ប៉ានៅម្នាក់ឯង ក៏ប៉ាអត់អផ្សុកដែរ
-អ៊ីចឹងពេលប៉ាម៉ាក់មិននៅ អូននឹងមើលព្រះចន្ទដើម្បីកុំឲ្យអផ្សុក
-ពេលនោះ ឯងកុំភ្លេចហៅពូមកមើលផង ស្តាប់បានទេ?
-លោកពូ!
-មកពូពរ! មើលទៅគ្រួសារបង ដូចជាស្រលាញ់ព្រះចន្ទណាស់ហ្ន៎
-តើពូចូលចិត្តមើលព្រះចន្ទទេ?
-ពូប្រាកដជាចូលចិត្តហើយ ក្មួយដឹងទេ ពន្លឺព្រះចន្ទធ្វើឲ្យបេះដូងមានក្តីសុខណាស់ណា ដូចជាប៉ាម៉ាក់ឯងអ៊ីចឹង
-អូនក៏យល់ដែរ!
-ថាម៉េច! ក្មួយយល់ដែរ
-ឯងនេះ ចំមែន
-ពួកយើងចូលទៅក្នុងផ្ទះទៅ
|
បញ្ចេញមតិ
Comments 0